მთავარი

ჟურნალისტთა კავშირ ”ობიექტივის” საგანგებო განცხადება

ჟურნალისტთა კავშირი ”ობიექტივი” აპროტესტებს ტელეკომპანია ”ალანიასთვის” სახელწოდების შეცვლის ფაქტს და აცხადებს, რომ ეს ”ცვლილება” დაგეგმილია ხელიუფლების ძალოვანი შტოს მიერ.

6 წლის მანძილზე წარმოებულმა ჟურნალისტურმა გამოძიებამ ფაქტებით დაადასტურა, რომ ”ალანია” ჯერ ულიცენზიოდ და ,მოგვიანებით, წართმეული ლიცენზიით გადიოდა ”ობიექტივის” ჟურნალისტების კუთვნილ 35-ე დეციმეტრულ სიხშირეზე. ”ობიექტივის” ჟურნალისტების დაუღალავი ბრძოლისა და სამოქალაქო აქტივობის შედეგად, საზოგადოების დიდი ნაწილისათვის ცნობილი გახდა, რომ ”ალანია” წართმეულ ტელეარხზე მაუწყებლობს. ზემოხსენებული ტელეკომპანიისთვის სახელწოდების შეცვლას პირდაპირ ვაკავშირებთ ჩვენს გამოძიებასა და აქტივობასთან. ცნობილია, რომ ”ობიექტივი”- ”ალანიას” საქმე სულ მალე ევროსასამართლოში გადაიგზავნება. ხელისუფლების ძალოვან შტოს, რომელმაც თავის დროზე ”ობიექტივის” ჟურნალისტებს არხი წაართვა, სურს ”ალანიას” წართმეულის იმიჯი ჩამორეცხოს და ”სახელწოდება ”ალანია” საერთოდ გააქროს საინფორმაციო სივრციდან. არ იქნება ”ალანია”- არ იქნება პრობლემა! ვაცხადებთ სრული პასუხისმგებლობით, ჩვენ არ ვაპირებთ გაჩუმებასა და ბრძოლის შეწყვეტას. მოვუწოდებთ საქართველოს მთავარ პროკურორს გამოეხმაუროს ”ობიექტივის” დირექტორის მიხეილ აგლაძის წერილს, რომელიც პროკურატურაში რამდენიმე კვირის წინ შევიდა და გამოიძიოს ”ალანიას” ირგვლივ შექმნილი კრიმინალური ისტორია. მივმართავთ ”ალანიას” ხელმძღვანელობას: ტელეკომპანიისთვის სახელწოდების შეცვლა დღის წესრიგიდან პრობლემას არ ხსნის, პირიქით. ჩვენ შევეცდებით საზოგადოებას განვუმარტოთ, რომ ”რეგიონ.ტვ” სწორედ ”ობიექტივის” ჟურნალისტებისათვის წართმეულ 35-ე დეციმეტრულ არხზე მაუწყებლობს და ის იგივეა, რაც ”ალანია”.

[ჟურნალისტთა კავშირ”ობიექტივის”

ხელმძღვანელი ირმა ინაშვილი.

2009 წლის 22 დეკემბერი. თბილისი.]

მობილური ტელეფონით გადაღებული ქუთაისის ტრაგედია[video]

"დიდების მემორიალის" აფეთქებას ქუთაისში - ორი ადამიანის სიცოცხლე ემსხვერპლა. არიან დაჭრილები. მათგან ბევრის მდგომარეობა მძიმება. მაყურებელთა თხოვნის და ინტერესის გათვალისწინებით, გთავაზობთ ტრაგედიის ამსახველ დოკუმენტურ კადრებს, რომელიც მობილური ტელეფონით არის გადაღებული. რედაქცია ბოდიშს უხდის მომხმარებელს კადრების გამო, რომელიც საყურებლად მართლაც მძიმეა.

[itv]

ვინ გასცა ქუთაისში ძეგლის აფეთქების ბრძანება?!

19 დეკემბერს, 16:00 საათზე, ქუთაისში, ავტოქარხნის დასახლებაში საშინელი აფეთქების ხმა გაისმა. იმავდროულად გავრცელდა ინფორმაცია, რომ აფეთქებას მსხვერპლი მოჰყვა: თავის ქალის მრავლობითი დაზიანებების შედეგად ადგილზე დაიღუპა 11 წლის ნინო ჯინჭარაძე. ამას გარდა, მრავლობითი ჭრილობებით საავადმყოფოში გადაიყვანეს დედამისი – ეკა ცუცხვაშვილი-ჯინჭარაძისა და მათ მეზობლად მცხოვრები ირაკლი ჯინჭარაძე. სხეულის დაზიანებები მიიღო კიდევ რამდენიმე ადამიანმა, რომლებსაც სასწრაფო დახმარების ბრიგადებმა ადგილზე აღმოუჩინეს დახმარება.

ქუთაისში, ირაკლი აბაშიძის გამზირზე მდებარე “გამარჯვების მემორიალის” დემონტაჟი მოულოდნელად 12 დეკემბერს დაიწყო. მაშინვე დემონტაჟზე დასაქმებულმა მუშებმა ჩვენთან საუბარში განაცხადეს, რომ საბოლოოდ მემორიალი 21 დეკემბერს, პრეზიდენტის დაბადების დღეზე აფეთქდებოდა. ამ ინფორმაციის გავრცელების შემდეგ ქუთაისში 21 დეკემბრისთვის ფართომასშტაბიანი საპროტესტო აქცია დაიგეგმა, რომელშიც მონაწილეობა უნდა მიეღოთ როგორც პოლიტიკური პარტიების წარმომადგენლებს, ისე არასამთავრობო ორგანიზაციებს, შემოქმედებით კავშირებს და საზოგადოების სხვა ფენებს. ამის თაობაზე ოპოზიციის წარმომადგენლებმა 18 დეკემბერს გამოაცხადეს მერიის წინ გამართულ საპროტესტო აქციაზე. როგორც ჩანს, საპროტესტო აქციის თავიდან აცილების მცდელობას უნდა მიეწეროს ის ფაქტი, რომ ხელისუფლებამ ძეგლის აფეთქების პროცედურა დააჩქარა და განზრახვის სისრულეში მოსაყვანად ნიკოლოზობის დღესასწაული აარჩია (სხვათაშორის ამ დღეს პრეზიდენტის უმცროსი ვაჟის დაბადების დღეა).
ავტოქარხნის დასახლებაში სამართალდამცავები 19 დეკემბერს, დაახლოებით 14:00 საათზე გამოჩნდნენ. ისინი აფრთხილებდნენ მემორიალის მიმდებარე ტერიტორიაზე მცხოვრებ მოსახლეობას, რომ მათ სასწრაფოდ დაეცალათ საცხოვრებელი სახლები. 16:00 საათზე შპს “საქფეთქმრეწვმა” 27 მეტრიანი ბეტონის კონსტრუქცია (რაც “გამარჯვების მემორიალის” ერთკვირიანი დემონტაჟის შედეგად დარჩა) ააფეთქა. აფეთქებისას ბეტონის ნამსხვრევები რამდენიმე ასეული მეტრის მოშორებით, საცხოვრებელი სახლების მიმართულებით გადაცვივდა. სწორედ ამან გამოიწვია იქ მცხოვრები მოსახლეობის დაშავება და მსხვერპლი.
“ევაკუაცია რომ დაიწყეს, გამოგვიყვანეს ბინიდან, აფეთქება მოხდებაო და გამოვედით გარეთ – ქუჩაში, მოგვაშორეს ბინას და გავრბოდით “ბარაკებისკენ”. ამ დროს მოხდა აფეთქება. ეს საწყლები, ეზოში ყოფილან, სახლთან და ბავშვს ქვა მოხვედრია თავში და დაიღუპა. კმაყოფილია ახლა ჩვენი მთავრობა? რა ენაღვლებათ მაგათ? მაგათი შვილები არ მომკვდარან და! ეს არის მავნებლობა, რას აშავებდა ის ძეგლი იქ?” – აცხადებენ თვითმხილველები.
“მე ქალაქიდან მოვედი იმ წუთში და პოლიცია არ მიშვებდა სახლში, ვიფიქრე რაღაც ნივთებს მაინც გამოვიტან-მეთქი სახლიდან. ამ დროს მოხდა აფეთქება და რომ მივედი ადგილზე, დასისხლიანებული ხალხი ეყარა ძირს, თურმე ჩემი მეუღლეც იქ ყოფილა,” – ამბობს დაშავებული ირაკლი ჯინჭარაძის მეუღლე.
“შვილი მომიკლეს, ხალხო, ვაიმე, რა მეშველება?” – შველას ითხოვდა გარდაცვლილის მამა სოსო ჯინჭარაძე, რომელიც შემთხვევის ადგილზე მოგვიანებით მივიდა.
დაშავებულები სასწრაფო დახმარების ბრიგადებმა თავდაპირველად ავტოქარხნის საავადმყოფოში გადაიყვანეს, ხოლო მოგვიანებით – დასავლეთ საქართველოს ინტერვენციული მედიცინის ეროვნულ ცენტრში. ნინო ჯინჭარაძე კი ბავშვთა საავადმყოფოში იქნა გადაყვანილი, თუმცა მისი გადარჩენა ვეღარ მოხერხდა.

ვინ გასცა 19 დეკემბერს ძეგლის აფეთქების ბრძანება? – ამ კითხვაზე პასუხი ამ დრომდე არ არსებობს. ქუთაისის თვითმმართველობის წარმომადგენლებმა (საკრებულოს წევრებმა და მერიის თანამშრომლებმა) ჩვენთან საუბარში განაცხადეს, რომ მათ ამის თაობაზე არაფერი იცოდნენ და ინფორმაციის მისაღებად სამხარეო ადმინისტრაციისკენ გადაგვამისამართეს. ჩვენ რამდენჯერმე ვცადეთ ტელეფონით დაკავშირება იმერეთის გუბერნატორთან მიხეილ ჩოგოვაძესთან, თუმცა მან სატელეფონო ზარებს არ უპასუხა. ამის შემდეგ დავუკავშირდით გუბერნატორის ადმინისტრაციის ადმინისტრაციული სამსახურის უფროსს ზეინაბ ხაჩიძეს, რომელმაც განგვიცხადა, რომ დედაქალაქში იმყოფებოდა და მომხდარის თაობაზე ინფორმაციას არ ფლობდა. დედაქალაქში იმყოფებოდა გუბერნატორის პირველი მოადგილე ლაშა კილაძეც. შესაბამისად, უცნობია, თუ ვინ დაიქირავა ძეგლის ასაფეთქებლად თბილისური კომპანია “საქფეთქმრეწვი”. საქართველოს მთავარმა პროკურორმა მურთაზ ზოდელავამ იმავე დღეს საგანგებო პრესკონფერენციაზე განაცხადა, რომ აღნიშნული ფირმა ქუთაისის მუნიციპალიტეტის დაკვეთით ასრულებდა აფეთქებით სამუშაოს. მისივე განმარტებით, მომხდართან დაკავშირებით აღიძრა სისხლის სამართლის საქმე. წინასწარი ინფორმაციით, ასაფეთქებელი სამუშაოებისას დაშვებული იქნა შეცდომა, რამაც გამოიწვია მსხვერპლი.

[მაია მეცხვარიშვილი “ახალი გაზეთი”]

თეა თუთბერიძის მორიგი "მკრეხელური" განცხადება

“თავისუფლების ინსტიტუტის” წევრი, თეა თუთბერიძე საგნგებო განცხადება ავრცელებს, განცხადებაში ნათქვამია, რომ მიმდინარე წლის 22 დეკემბერს, საქართველოს საპატრიარქოში დაგეგმილია წმინდა სინოდის კრება, სადაც თუთბერიძის ინფორმაციით, პატრიარქის მამართ დასმულ კითხვებზე ხელმომწერი დეკანოზების; ზაზა თევზაძისა და კახაბერ კურტანიძისადმი დამსჯელი ღონისძიებების გატარება იგეგმება. თეა თუთბერიძის მიერ გავრცელებულ საგანგებო განცხადებას, “ჯეოტოპნიუსი” უცვლელად გთავაზობთ

“მიმდინარე წლის 22 დეკემბერს იმართება საქართველოს მართლმადიდებელი ეკლესიის წმინდა სინოდის კრება. არის ინფორმაცია, რომ საქართველოს საპატრიარქოს მიმართ საზოგადოებაში წლების მანძილზე დაგროვილი კითხვების შემცველ ღია წერილზე ხელის მოწერისათვის დეკანოზების ზაზა თევზაძისა და კახაბერ კურტანიძისადმი წმინდა სინოდის მიერ დამსჯელი ღონისძიებების გატარება იგეგმება.

ეს იქნება არამარტო სრულიად უკანონო რეპრესია ამ ორი მღვდელმსახურისა, არამედ წერილზე ხელისმომწერი დანარჩენი 233 ადამიანის და მთელი ქართული საზოგადოების შეურაცხყოფა.

აქედან გამომდინარე, ვფიქრობთ რომ საჭიროა სინოდის კრების გამართვამდე მივმართოდ სინოდს ოფიციალურად. შემუშავდა ერთგვერდიანი მიმართვის ტექსტი. აღნიშნული ტექსტის გაგზავნა საპატრიარქოში მოხდება ორშაბათს, სინოდის კრების წინა დღეს. ვფიქრობთ, კარგი იქნება მიმართვის ტექსტი ჟურნალისტებისათვის და საზოგადოებისათვისაც მედიის საშუალებით გახდეს ცნობილი.

ამიტომ, ორშაბათს, 2009 წლის 21 დეკემბერს, 14.00 სთ-ზე გაიმართება პრეს-კონფერენცია არტ კაფეში (მის: ორბელიანის ქ. 31. ყოფილი ამერიკის საკონსულოს ტერიტორია, კოლმეურნეობის მოედანზე). პრესკონფერენციაზე მოხდება მიმართვის წაკითხვა.

გთხოვთ მობრძანდეთ. ასევე ვთხოვოთ ეს ინფორმაცია მიაწოდოთ იმ ადამიანებს, ვინც ჩვენი თანამოაზრეები არიან ამ კუთხით და ვიცით რომ ეს საკითხი აღელვებს და ვთხოვოთ მობრძანება. ალბათ ჟურნალისტები ინტერვიუებსაც აიღებენ და ამაზედაც იქნებ იფიქროთ. დამატებითი ინფორმაციისათვის შეგიძლიათ დამირეკოთ ნომერზე: 899 627367

P.S. ვისაც სურვილი გაქვთ გაეცნოთ აღნიშნული მიმართვის ტექსტს, შევძლებ ხვალ გადმოგიგზავნოთ თუ მომწერთ თქვენს მეილებს. ტექსტი დარედაქტირებას ვთხოვ ვინმეს და. ასევე მოვიფიქროთ თუ ვინ წაიკითხავს მიმართვას.

[პატივისცემით; თეა თუთბერიძე, gtn]

საქართველოში თხის გრიპი დაფიქსირდა?

საეჭვო ვირუსის ნიშნებით დედოფლისწყაროს სტაციონარში ორი მცირეწლოვანი მოათავსეს.

მრავალშვილიანი ოჯახი უსახსრობის გამო ბავშვების თბილისში გადაყვანას ვერ ახერხებს. დედოფლისწყაროს საავადმყოფოში გიორგი და მარიამ ყოჩიაშვილები საეჭვო ვირუსის ნიშნებით მოათავსეს, მათი მშობლები წუხან, რომ ვირუსის დადგენა ადგილზე ვერ ხერხდება, თბილისში წასაყვანი სახსრები კი ოჯახს არა აქვს:

გოგიტა ყოჩიაშვილი: ,,ორი შვილი 1,6 თვის გიორგი და 5 თვის მარიამი საავადმყოფოში დავაწვინეთ. მესამე დღეა ორივეს მაღალი სიცხეები და პირღებინება აღენიშნება. ძალიან შევშინდით. ექიმებმა გვითხრეს ნაცხი თბილისში წაიღეთო, მაგრამ სამგზავრო ფული არ გვაქვს, ძალიან გვიჭირს. გამგებელი ლევან ბაღაშვილი დაგვპირდა თანხას გამოგიყობთო.
ანა ლამაზოშვილი პედიატრი: საშიში ნამდვილად არაფერია, ორივეს ბრონხო პნევმონია აქვს და ყოჩიაშვილების მდგომარეობა დამაკმაყოფილებელია.

დიტო ყოჩიაშვილი, მთავარი ექიმის მოადგილე: თხის გრიპის ვირუსს ჩვენ ადგილზე ვერ ვადასტურებთ და ამიტომ ვურჩიეთ, ნაცხი თბილისში წაიღონ.

მრავალშვილიანი ოჯახი საბოლოო დიაგნოზის დასადგენად გამგეობიდან გამოყოფილ დახმარებას ელის, რის შედეგადაც ავადმყოფი მოზარდების თბილისში გადაყვანას და მკურნალობის გაგრძელებას შეძლებენ.

[ინტერნეტ გაზეთი "ქიზიყი"]

მარინა სალუქვაძე სენსაციურ თემებზე ალაპარაკდა!

ქართული ჟურნალისტიკის ისტორიაში ასეთი პრეცედენტ ჯერ არ ყოფილა - რედაქტორი ინტერვიუს საკუთარი მოადგილისგან იღებს. ეს მავანთ შესაძლოა, “მედია-ნეპოტიზმად” მონათლონ, მაგრამ როგორც პრეზიდენტი სააკაშვილი იტყოდა, მერე რა?! ისე, ვიღაცებს შესაძლოა, რუბრიკის სახელწოდებაც არ მოეწონოთ, მაგრამ მერე რა?! დღეს ჟურნალისტთა სახელების გადაცემის სათაურში “გამოტანა” ხომ მოდურია?! ჰოდა, თუ მოდაა, მოდა იყოს...

მაშ ასე, “ქართული სიტყვა” და საინფორმაციო სააგენტო “ფაქტნიუსი” ერთობლივ პროექტს წარმოგიდგენთ.

...პირველი სტუმრის შერჩევაზე დიდხანს არ მიფიქრია. მარინა სალუქვაძეს ყურადღება არც ადრე აკლდა, მაგრამ მას შემდეგ, რაც შალვა რამიშვილმა “სიმართლის დროში” მსახიობ მიშა მესხს ჰკითხა, სალუქვაძესთან სექსზე გიოცნებია თუ არაო, ბავშვმაც კი იცის, ვინ არის “ტაბუ”-ს ყოფილი წამყვანი და ამჟამად საინფორმაციო სააგენტო “ფაქტნიუსის” მთავარი რედაქტორის, ანუ ჩემი მოადგილე... ისე, არსებობს მოკრძალებული მოსაზრება, რომ სექსი რაღაცით პოლიტიკას ჰგავს და, პირიქით. ეს, ერთი შეხედვით, უტოპია, შესაძლოა, რეალობად იქცეს. ყოველ შემთხვევაში, არსებობს ალბათობა, რომ მარინა სალუქვაძე მალე ახალ სკანდალში გაეხვას.

ყველაფერი კი ძალიან მარტივადაა: მარინას და, ქალბატონი მანანა ნინო ბურჯანაძის პარტიის სახეა. მარინა კი, სპიკერყოფილის და, საერთოდ, მისი პარტიის მიმართ, რბილად რომ ვთქვა, არაკეთილადაა განწყობილი.

რატომ არ მოსწონს ღვიძლი დის პოლიტლიდერი, რას სთავაზობდა კონსტანტინე გამსახურდია და რატომ აუგორა სკანდალი “ტელეიმედმა” საკუთარი მფლობელის ცოლს?

თქვენს წინაშეა მარინა სალუქვაძის სიმართლის დრო!

- მარინა, როგორ ხარ?

- არაჩვეულებრივად!

- არ მჯერა...

- დღეს ვინმე არაჩვეულებრიდავ რომ იყოს, დაუჯერებელია, არა?

- არც უმაგისობაა, მაგრამ არაჩვეულებრივად იმიტომ ხარ, რომ შენზე სექს-ტენდერია გამოცხადებული?

- (სერიოზულად) არა, მაგიტომ არა! სიმართლე რომ ვთქვა, ყურადღება არასოდეს მაკლდა, თუმცა ახლა საზოგადოებას ახალი თემა მიეცა... ისე, მაგ თემამ “ჩაიარა” და აღარც მაინტერსებს...

- შეიძლება, შენთვის ჩაიარა, მაგრამ ხომ იცი, მედალს ორი მხარე აქვს და ჰოდა, აბა, შალვა რამიშვილს ჰკითხე, რომელსაც “ცხოვრება დაუნგრიე”...

- მე დავუნგრიე ცხოვრება?

- აბა, მე? ადამიანი ციხიდან გამოვიდა, სამსახური იშოვა და... შენ კი უჩივლე...

- არ მიჩივლია. უბრალოდ, ვთქვი, შემიძლია, ვუჩივლო-მეთქი...

- ისე, ვინ წარმოიდგენდა, რომ მარინა სალუქვაძე შალვა რამიშვილს “შეაშინებდა”...

- ნამდვილად არ ვიცი, ჩემი რამიშვილს შეეშინდა, “იმედს”, “თიბისი ტვ”-ს თუ ყველას ერთად, მაგრამ დარწმუნებული ვარ, რომ შალვას გაშვებასთან დაკავშირებით რაღაც გადაწყვეტილება შიგნით მიიღეს და მე, ალბათ, ერთ-ერთი საბაბი ვიყავი.

- ანუ, იზიარებ კულუარებში გავრცელებულ ხმას, რომ შალვა რამიშვილის “იმედზე” გამოჩენამ შს მინისტრი ვანო მერაბიშვილი და თავდაცვის ექსმინისტრი დავით კეზერაშვილი ერთობ გააღიზიანა. ალბათ, ისიც გსმენია, რომ ნაპატიმრალი რამიშვილის ტელერეამინება გიორგი არველაძემ, თურმე, მიხეილ სააკაშვილს სთხოვა...

- არ მინდა, კულუარებში შევიხედო, რადგან ეს ჩემი საქმე არ არის, თუმცა ვანო, ჟურნალისტები ვართ და ჭორები მეც გამიგია...

- მარინა, ეს ინტერვიუ, როგორც შევთანხმდით, შენი “სიმართლის დროა”. ამიტომ პირდაპირ გკითხავ: მშვენიერი ქალი ხარ და რა გასაკვირია, შენს შემხედვარე მამრს სექსი რომ მოუნდეს? მსახიობ ია სუხიტაშვილის თქმისა არ იყოს, მაშინ უნდა გაბრაზებულიყავი, შენს დანახვაზე ვინმეს ხაჭაპური რომ მოუნდეს...

- შეიძლება, სუხიტაშვილს ესიამოვნოს, მის დანახვაზე ვინმეს ხაჭაპური რომ მოუნდეს, მაგრამ ჩემი სექს-სიმბოლოსთან ასოცირება, ჯერ ერთი, ღიმილისმომგვრელია. მეორეც, ამან ჩემს მშობლებში, მეუღლესა და ქალიშვილში სერიოზული აგრესია გამოიწვია.

- ესე იგი, შინ დაგტუქსეს, სექს-იმიჯი რატომ გაქვსო?

- ვანო, ასეთი ცინიკური ნუ ხარ...

- მე და ცინიზმი? კარგი, რა, მარინა?!..

- ამ გადაცემის ანონსი ეთერში პირველად რომ გავიდა, მამაჩემმა გაოცებულმა დამირეკა, მერე, ჩემი ქმარი გახდა “დასაბმელი” და როცა ჩემი შვილიც მოწყენილი დავინახე, უკვე აღარ მესიამოვნა. ისე, ეს კითხვა მხოლოდ გადაცემაში რომ ყოფილიყო დასმული, არავის არაფერი დაამახსოვრდებოდა, რადგან გადაცემას მაინცდამაინც დიდი რეიტინგი არ ჰქონდა, მაგრამ ეს კითხვა, ანონსის სახით, ეთერში მთელი კვირა ტრიალებდა, რასაც ინტერნეტში გვერდის გახსნა მოჰყვა და, შენი თქმისა არ იყოს, მართლა ტენდერი გამოაცხადეს. მე რომ, მაგალითად, “ფლეიბოის” ფოტო-სესიებში მიმეღო მონაწილეობა, რაც ახლა, სხვათა შორის, დაფასებულია, მაშინ...

- მარინა, შენ რომ “ფლეიბოისთვის” გეპოზიორა, დღეს, მინიმუმ, კულტურის სამინისტროს რომელიმე დეპარტამენტის შეფი იქნებოდი...

- არ მგონია, რომ ამ ქალბატონის კარიერა მხოლოდ და მხოლოდ “ფლეიბოიმ” განაპირობა, მით უმეტეს, ნინას მიმართ ცუდი დამოკიდებულება არ მაქვს...

- ნინა ვინ არის? მარინა, მე არც ნინა მიხსენებია და არც - ქსენია...

- (იცინის) ნუ, მე უფრო პირდაპირი აღმოვჩნდი... საერთოდ, პირდაპირობა მჩვევია...

- ჰოდა, ახლა პირდაპირ გკითხავ: რამიშვილს ზემოხსენებული კითხვა რომელიმე სუპერ-კაცისთვის, მაგალითად, ბრედ ბიტისთვის რომ დაესვა, მაშინაც გაბრაზდებოდი?

- იგივე რეაქცია მექნებოდა...

- ისე, ხმა დადის, მესხს, თურმე, აიძულეს, რომ ამ კითხვაზე ეპასუხა და დაპირდნენ, ფულს მოგაგებინებთო...

- ამას მიშა მესხი, თურმე, აღიარებს... სიმართლე რომ გითხრა, სადმე მიშა მესხს რომ შევხვდე, სიცილით მოვკვდები.

- რატომ?

- იმიტომ, რომ ბიჭმა თავისი ეროტიული ზმანებები სააშკარაოზე გამოიტანა...

- საერთოდ, შენზე ჭორები უხვადააა... თურმე, ერთი პოლიტიკოსიც “გეფარცქვალებოდა”...

- (გულიანად იცინის)

- ეს ისტორია საჯაროდ რომ მოვყვე, გეწყინება?

- რაც გინდა, მოყევი, დასამალი რა არის...

- მოკლედ, ახლა მიამბე, კონსტანტინე გამსახურდია როგორ “გაბავდა”...

- ეს “შებმა” არ იყო.

- აბა, რა იყო?

- მე და ბატონი კონსტანტინე ერთმანეთს ბატონიშვილის ქორწილში შევხვდით და მითხრა, მე თქვენი ტელეფონის ნომერი მაქვს და აუცილებლად დაგირეკავთო. მეორე თუ მესამე დღეს აფთიაქში ვიყავი, ტელეფონმა დარეკა და მამაკაცმა მითხრა, კოკო ვარო. რატომღაც ჩავთვალე, რომ ჩემი მეგობარი, კოკო კაპანაძე მირეკავდა და ვთხოვე, კოკო, ახლა რაღაცას ვყიდულობ და ცოტა ხანში დამირეკე-მეთქი... რამდენიმე წუთში, უკვე მანქანაში ვიჯექი, ტელეფონმა ისევ დარეკა და მივხვდი, რომ ჩემი მეგობარი კი არა, სხვა კოკო იყო. მოკლედ, კოკომ მკითხა, ქორწილში დიდხანს დარჩითო? მივუგე, - დიახ, ბატონო კონსტანტინე, ვიყავით მე და ჩემი მეუღლე მეგობრებთან ერთად, მერე, იქიდან ბარში წავედით-მეთქი. რამდენიმეწამიანი პაუზის შემდეგ, ყურმილში ბატონი კონსტანტინეს განხიბლული ხმა გაისმა, - ააა, ქმარი გყავთ?!

- რა ამის პასუხია და, გაპოლიტიკოსების სურვილი არასოდეს გქონია? აი, თუნდაც წელიწადნახევრის წინ, როცა “მზე” დაბნელდა და “ტაბუ” დაიხურა? სხვათა შორის, ახლა მოდურია: ჟურნალისტები პოლიტიკაში ბითუმად მიდიან. ყოველ შემთხვევაში, ინგა გრიგოლია, თურმე, ჩუღურეთში იყრის კენჭს, ლიკა ნაღებაშვილიც აპირებს არჩევნებში მონაწილეობას...

- დიდებული ამბავია, ინგას სიამოვნებით დავუჭერ მხარს...

- შენც იყარე კენჭი, მით უმეტეს, შენი და პოლიტიკოსია...

- ჩემმა დამ არჩევანი თვითონ გააკეთა, მე კი აპოლიტიკური ადამიანი ვარ!

- შეიძლება, მაგრამ ნინო ბურჯანაძის პარტიის ყრილობაზე, მახსოვს, იყავი...

- ყრილობაზე ჩემი დის საყურებალდ ვიყავი. სხვათა შორის, მთხოვა, რომ ყრილობისთვის მაკიაჟი გამეკეთებინა... ასე, საყურებლად ადამიანი სპექტაკლზეც დადის...

- ესე იგი, ბურჯანაძის პარტიას სპექტაკლად თვლი?

- რასაკვირველია!

- ასე რატომ ფიქრობ?

- ის ადამიანი, ვისაც არ ეცვლება გამომეტყველება, ჩაცმულობა, სამკაული და ისე აძაგებს იმ ადამიანს, რომელსაც ადრე იგივე ჩაცმულობით, გამომეტყველებითა და სამკაულით აქებდა, ჩემი პატივისცემის ღირსი არ არის?!

- შენ და შენი და ერთად ცხოვრობთ?

- არა. ერთად ზაფხულობით, წყნეთში, აგარაკზე ვართ ხოლმე.

- აგარაკი ვისი საკუთრებაა?

- ბაბუამ შთამომავლობით დაგვიტოვა.

- მაინც, ფრთხილად იყავი, რადგან პარტიული ბოსის, რბილად რომ ვთქვა, გაკრიტიკების გამო, შენმა დამ შესაძლოა, ამ აგარაკზე მისვლის ნება აღარ მოგცეს.

- ჩემმა დამ არაჩვეულებრიდავ იცის, რომ ქალბატონ ბურჯანაძეს, როგორც პოლიტიკოსს, პატივს არ ვცემ!

- ამის გამო გიჩხუბიათ?

- კი, გვიკამათია. საერთოდ, ჩემი დის არჩევანი არასოდეს მომწონდა.

- ვთქვათ, შენმა დამ, როგორც ბურჯანაძის პარტიის სახემ, ადგილობრივ არჩევნებში კენჭისყრა დააპირა. მის წინააღმდეფ გამოხვალ?

- ვანო, ხომ იცი, რომ აპოლიტიკური ადამიანი ვარ.

- ეს გავიგე, მაგრამ კონკრეტულად მიპასუხე: შენ დას, როგორც ბურჯანაძის პარტიის სახეს, გაუწევ აგიტაციას?

- მიუხედავად იმისა, რომ ჩემი და ძალიან მიყვარს, მან ეს არჩევანი დამოუკიდებლად მიიღო და ამ პოლიტიკური, ასევ ვთქვათ, ამბის გარდა, გვერდზე ყოველთვის დავუდგები! მოკლედ, ბურჯანაძე ჩემთვის იდეალს არ წარმოადგენს, ანუ არ არსებობს პოლიტიკური პარტია, რომლის პიარ-კამპანიაშიც ჩავერთვები, თუმცა ცალკეულ პოლიტიკოსებს შემიძლია, მეგობრული რჩევა მივცე, როგორ ჩაიცვას და როგორ მოიქცეს...

- მარინა, შენი და ჩემი მეგობარი, ლალი მოროშკინა ახალ ბეტსელერს წერს - “რევოლუციით განქორწინებულნი”. განსხვავებული პოლიტიკური მოსაზრებების გამო დები სალუქვაძეების “განქორწინებაც” შეიძლება მოხდეს?

- სხვადასხვა პოლიტიკური პოზიცია ერთმანეთის დაკარგავს არ ნიშნავს. სხვათა შორის, ქალბატონ ბურჯანაძეს ერთადერთხელ, ორი წლის წინ ნოვრუზ-ბაირამის დღესასწაულზე შევხვდი. იმხანად ქალბატონი ბურჯანაძე პარლამენტის თავმჯდომარე იყო, მე კონცერტი მიმყავდა და სცენაზე რომ ამოვიდა, ხელი ჩამომართვა...

- შენი და რას ამბობს?

- ის თვლის, რომ მისი არჩევანი სწორია...

- რამდენიმე თვის წინ, როცა ნინო ბურჯანაძის პარტიაზე ფარული ვიდეო-ჩანაწერები გავრცელდა, არ შეგეშინდა, რომ ძალოვანებს შეიძლება, თქვენი სახლიც გაეჩხრიკათ?

- ამაზე არასოდეს მიფიქრია, თუმცა როცა ეს კადრები ვნახე, არ მესიამოვნა. ისე, ჟურნალისტი ვარ და გადასარევად ვიცი, აგიტაციური მანქანა როგორც მოქმედებს... 6 მაისს, პაატა ბურჭულაძემ კონცერტზე დამპატიჟა. ამასობაში, ჩემმა ბიძაშვილმა დამირეკა და ტირილით მითხრა, ტელევიზორში აჩვენებენ, რომ ხალხს ესვრიან და მანჩო, ანუ ჩემი და ტელეფონზე არ მპასუხობსო. არ მახსოვს, ოპერიდან როგორ გამოვიქეცი, რადგან არ ვიცოდი, ჩემს დას რა სჭირდა და საოცარი შიში დამეუფლა...

- მარინა, ოჯახის სხვა წევრები შენს პოზიციაზე არიან თუ შენი დის?

- ოჯახი აბსოლუტურად ნეიტრალურია. ჩემი და 47 წლისაა და გადაწყვეტილებას დამოუკიდებლად იღებს. საკმაოდ პრინციპული ადმაიანია, თუმცა დარწმუნებული ვარ, უფრო სწორად ვგრძნობ, ხვდება, რომ არასწორი ნაბიჯი გადადგა.

- ეს კითხვა არ დაგისვამს?

- ამ თემაზე უკვე იმდენჯერ ვიკამათეთ, თან ვგრძნობ, რომ გაღიზიანებულია და ვცდილობ, ამ საკითხზე აღარ ვისაუბრო. სხვათა შორის, ვანო, ახლა გამახსენდა, რომ ბურჯანაძის ყრილობაზე შენც იყავი...

- კი, ბატონო, ვიყავი... მარინა, ალბათ, გრძნობ, რომ ამ ინტრევიუს გამო კიდევ ერთ სკანდალში გაეხვევი...

- არანაირი სკანდალის არ მეშინია, რადგან არ ვთამაშობ და რასაც ვამბობ, ჩემი პოზიციაა, ანუ ძალიან გულწრფელად ვამბობ, რომ დღეს სიმპათიას უფრო ხელისუფლება იმსახურებს, ვიდრე - ოპოზიცია.

- არ გირჩევია, იყო არაგულწრფელი და, სამაგიეროდ, გქონდეს კარგი სამსახური და უზრუნველი ცხოვრება?

- არ მირჩევია, რადგან თამაში სცენაზეა კარგი! მე კი თამაში არაფერში მჭირდება!

- ესე იგი, მარინა, შენთვის ტაბუდადებული თემები არ არსებობს, არა?

- დიახ.

- მაშინ გკითხავ: “რაკიინის” გენდირექტორის მოადგილე შენი ქმარია. "იმედის” 90 პროცენტს სწორედ “რაკიინი” ფლობს, ანუ საკუთარი ქმრის ტელევიზიამ “აგიგორა” სკანდალი. სად არის ლოგიკა? ოპოზიცია ამტკიცებს, ტელევიზიებზე ხელისუფლების დიქტატიაო და ამაზე მეტი დემოკრატია რაღაა?

- დარწმუნებული ვარ, არც შალვა რამიშვილმა, არც პროდიუსერმა და არც ფსიქოლოგებმა არ იცოდნენ, რომ დათო ჩემი მეუღლეა. ისე, ორი წლის წინ ჭორი გავრცელდა, რომ მე და დათო ერთმანეთს დავშორდით და იმდენი ილაპარაკეს, სანამ ჩვენს შორის სერიოზული უსიამოვნება არ დაიწყო...

- ბოლოს და ბოლოს, ქმარს გაცილდი თუ არა?

- (იცინის) ჯერ არა...

- აპირებ?

- არ ვიცი, ხვალ და ზეგ რას გავაკეთებ. ცხოვრებაში ყველაფრის შეცვლა შემიძლია - გარეგნობის, სამსახურის, ქმრის, მაგრამ წარსულს ვერ შევცვლი! მოკლედ, არ ვიცი, მომავალში რას გავაკეთებ!

- შარშან, ომის დროს, მახსოვს, ქმარზე ძალიან გაბრაზებული იყავი...

- კი, მართალია და ეს გაბრაზება გამომყვა... სიმართლე რომ ვთქვა, ამ ეტაპზე სხვა პრობლემებით ვარ დაკავებული და ახალი სიყვარულისთვის არ მცალია.

- რა ვიცი, რამდენიმე დღის წინ მითხარი, იანვარში ჩემზე რამე სკანდალურს გაიგებო...

- შეიძლება, გაიგო, შეიძლება - არა. საერთოდ, არაფრის დაგეგმვა არ მიყვარს და პარტისტორიასაც ამიტომ ვერ ვიტანდი, რომ ხუთი და ათი წლის გეგმები არსებობდა...

- როცა დათომ ეს კითხვა მოისმინა, არ იყვირა, ამ “სიმართლის დროს” ახლავე დავხურავო?

- ეს არ უთქვამს, მაგრამ შინ ყველაფერი დაამტვრია. მერე კი კი ლევან ყუბანეიშვილს დაურეკა და უთხრა, რომ ანონსი ამოეღოთ. ლევანმა ანონსი მაშინვე გადააკეთა... სხვათა შორის, მას შემდეგ, რაც ანონსი ლამის ათი დღის მანძილზე ტრიალებდა, “იმედის” დირექტორს, ოთარ ბუბაშვილს შევხვდი, რომელმაც შემომთავაზა, რომ “იმედზე” პროექტი გამეკეთებინა. გამეღიმა, რადგან “იმედზე” მუშაობა ნამდვილად არ მინდა!

საერთოდ, არ შეიძლება, ხალხი გააწბილო და აიყოლიო მხოლოდ საკუთარი ინტერესების დასაკმაყოფილებლად. ხალხი ფარა არ არის. მე ის ხალხი მომწონს, ვინც ყალბი არ არის. აი, წეღან ნანუკა ჟორჟოლიანის შოუზე ვსაუბრობდით. ჩემი აზრით, ნანუკა ყალბი არ არის და ამიტომ, მისი გადაცემა უფრო მომწონს და ბევრად უფრო მართალია, ვიდრე - ჩემი გადაცემა “ტაბუ” იყო, ანუ ვაღიარებ, რომ “ტაბუში” დაძაბული ვიყავი...

ყველაზე სამწუხარო კი, იცი, რა არის? ჩვენ ვცხოვრობთ საზოგადოებაში, რომლისთვისაც მთავარი ფული და სექსია, სხვა ღირებულებები კი მეორე და მესამე პლანზეა. ტელევიზიის საქმე ცუდად მაშინ წავიდა, როცა აქცენტი მხოლოდ სექსა და ფულზე აიღო. მე ასეთ საზოგადოებაში თავს ცუდად ვგრძნობ!

- აბა, როგორი საზოგადოება გინდა?

- ბევრად უფრო ლმობიერი და კეთილი, თუმცა ვიცი, ეს უტოპიაა!

- შენ ხარ ლმობიერი? მაგალითად, შენი და იმისთვის, რომ ბურჯანაძის სახეა, ხომ შეგიძლია, არ გააკრიტიკო?

- როდემდე უნდა მოვითმინო?

- ისე, რატომ გადაწყვიტე, რომ ყველაფერი ეს საჯაროდ გეთქვა?

- იმიტომ, რომ შენ მკითხე... ვანო, შენ ჩემი მეგობარი ხარ და საჭიროდ ჩავთვალე, მელაპარაკა.

- ამ ინტერვიუს წაკითხვის შემდეგ, შენი და ხომ ცუდ განწყობაზე დადგება?

- ჩემმა დამ ჩემი პოზიცია იცის და რასაც მე ვაკეთებ, აბსოლუტურად ჩვეულებრივი ნაბიჯია...

- შენს დას “ტაბუ” საჯაროდ რომ გაეკრიტიკებინა, გესიამოვნებოდა?

- “ტაბუ” ჩემი პროფესიული ქმნილება იყო, პოლიტიკა კი ჩემი დის პროფესია არ არის.

- რატომ წავიდა მანანა პოლიტიკაში? მოგების იმედი ჰქონდა?

- ვერ გეტყვი... ქალბატონი ბურჯანაძისგან ხელფასი არ მიუღია და მატერიალურ კომპენსაციაზე ლაპარაკიც არ არის... შეიძლება, პირადი მეგობრობა აკავშირებთ, თუმცა ეს ჩემი საქმე არ არის. უბრალოდ, ჩემი დის არჩევანი არ მომწონს და ხომ შეიძლება, ჩემი აზრი მქონდეს?!

- ცხადია, შეიძლება...

[ესაუბრა ვანო პავლიაშვილი]

თეა თუთბერიძე ბოდიშს იხდის?

თუთბერიძე მეგობრობის ორდენს გადასცემს გიგი თევზაძეს და ”მამა ბუასილს”...

ერიდეთ ჩვენს მოტყუებას! ნუ ეცდებით მახე დაგვიგოთ. ვიდრე თქვენი საბრალო ტვინი რამეს გაიფიქრებდეს, ჩვენ უკვე გვეცოდინება ყოველივე, რადგან მონიჭებული გვაქვს სასწაულებრივი ძალა ჩავწვდეთ ადამიანთა ფიქრსა და ზრახვებს. შუქი, გამომდინარე იმ კაცის გამჭვირვალე თვალიდან, ვისაც ფეხები შიშველი აქვს, სახეზე კი მხოლოდ ცალ მხარეს ეზრდება წვერი, ადგილზე გაგაქვავებთ, თქვენს ქვეყანაში უბედურებას უბედურებაზე დაატრიალებს. მისი მოძრავი კბილები პირიდან გადმოხტებიან და ტანში ჩაგესობათ, რომ შეგჭამონ არა მარტო თქვენ, არამედ თქვენი ცოლებიცა და შვილებიც. ჯადოსნური მილები კი საცერივით დაცხრილავენ თქვენს სხეულს.
(ჰენრი რაიდერ ჰაგარდი, “სოლომონ მეფის საგანძური”)

კოკობზიკა კუკუზნაკო... კიკოლიკო ზალიკო, აბა, ჩემო ვალიკო... აი, შე დევნილო, შენა... ულვაში რა უყავ, ბიჭო? პარლამენტის წევრი ხარ, ტო?! ბაქრაძეს შეხვდი და რამე? ხელი ჩამოგართვა და ხელი ჩამოართვი? დიდი კაცი ხარ და ქონებრივი დეკლარაცია უნდა წარადგინო? სანდრომ რაო – მიდი და მოვდივარო? აი, შე კოკობზიკა კუკუზნაკო, შენა! კანონები უნდა წერო? პულტი გექნება და რამე? პაეზდკებში ივლი და რამე? ვარდს გაეფურჩქნა კოკორი თუ კოკორს გადაეფურჩქნა ვარდი? და, რაო, მანანამ? რაო კლარამ, პატიოსნების განსახიერებამ? რაო, ფლორამ და ჯულიეტამ? კოკობზიკა კუკუზნაკო... ა, შენ, ბროლია, კაფენტი... ა, შენ, კიკუ, თუმანი და ეთამაშე მიშას კუკუდამალობანა – მიშა მოკუკავს, შენ დამალე.

“პარტია «თავისუფლების” ლიდერი პარლამენტის თავმჯდომარეს, დავით ბაქრაძეს ხვდება” - იყო ასეთი ნიუსი. ამ ნიუსს მას შემდეგ ველი, რაც პირველი პრეზიდენტის პირველი ვაჟი დევნილობიდან დაბრუნდა. პარტია “თავისუფლება”... ეს არც პარტიაა და არც თავისუფლება და არც ის უბედური იყო პრეზიდენტი და განა ეს პარლამენტია? დევნილობა არა, კვერცხი! პრეზიდენტი იყო მანანა, პარლამენტი არის მიშა. კაცი იყო მერაბ კოსტავა!

ის უბედური არ იყო პრეზიდენტი. ის უბედური იყო უბედური შემთხვევა.
- “საკანონმდებლო ორგანოში კონსტანტინე გამსახურდია რამდენიმე წუთის წინ სანდრო ბრეგაძესთან ერთად მივიდა, თუმცა სანდრო ბრეგაძემ პარლამენტის თავმჯდომარის ოთახი უკვე დატოვა. კონსტანტინე გამსახურდიას შეხვედრამდე ჟურნალისტებთან კომენტარი არ გაუკეთებია. სავარაუდოდ იგი პარლამენტის თავმჯდომარესთან პარლამენტში დაბრუნების შემდეგ სამოქმედო გეგმებზე ისაუბრებს. დღევანდელ შეხვედრაზე საუბარი შეეხება, ასევე, საქართველოს პირველი პრეზიდენტის, ზვიად გამსახურდიას სიკვდილის მიზეზების დამდგენი საპარლამენტო კომისიას”, - ესეც, ნიუსი.

შემდეგი ნიუსის ციტირებით თავს არ შეგაწყენთ, მხოლოდ სათაურს გეტყვით და მერე ერთად ვიფიქროთ. აი, ისიც: “დავით ბაქრაძე - დაინტერესებული ვარ, რომ პარლამენტში იყოს აქტიური ოპოზიცია”. პრინციპში, აქ საფიქრალი არც არაფერია. დავით ბაქრაძე დაინტერესებულია, ხოლო დავით ბაქრაძის დაინტერესებით დაინტერესებულია კოკო გამსახურდია, რომლის დაინტერესებას ხელი შეუწყო დაინტერესებულმა სანდრო ბრეგაძემ. ხოლო მე იმ ნიუსში ერთმა წინადადებამ დამაინტერესა - “იგი პარლამენტის თავმჯდომარესთან პარლამენტში დაბრუნების შემდეგ სამოქმედო გეგმებზე ისაუბრებს”.

ალბათ, იასაუბრა კიდეც. ანუ, ატჩოტები ჩააბარა, ამ კანონს დავწერ, იმ კანონში ცვლილებას შევიტან, ასეთი ინიციატივებით შემოვალ და ისეთი წინადადებებით გამოვალო. ჩანგლების მბრძანებელი ამ დროს თავს უქნევდა, აქებდა და ბოლოს უთხრა, თუ კარგად მოიქცევი, აუზში წყალს ჩაგისხავ და კომისიას მამაშენის მკვლელობის დასკვნას გამოვატანინებ, ოღონდ, არასოდეს დაივიწყო, რომ ჩვენი პარტია თქვენი პარტიის მესაჭეაო.

- “ნადვილად დაინტერესებული ვარ, რომ კონსტანტინე გამსახურდიას პარლამენტში შემოსვლა იყოს ის ნაბიჯი, რომელიც გააძლიერებს პოლიტიკურ დებატებს. ეს კი, გააძლიერებს საპარლამენტო ოპოზიციას და პარლამენტში მიმდინარე პროცესს”, - განაცხადა ბაქრაძემ.

ჩანგლების მბრძანებელს გულში ღრმად ჰქონია ამოჭრილი პარლამენტში ოპოზიციის გაძლიერება, ეს ყოფილა მისი სანუკვარი, ნალოლიავები ოცნება. ეს რაც შეეხება ჩანგლების მბრძანებელს. კოკო გამსახურდია ამის შემდეგ შეხვდა ხათუნა გოგორიშვილს – კოვზების მბრძანებელს, რომელმაც მას დაწვრილებით აუხსნა, რომ კოკო უკვე დიდი ბიჭია და უახლოეს ერთ თვეში საჯარო სამსახურის ბიუროში ქონებრივი დეკლარაცია უნდა წარადგინოს და სამშაბათს, პარლამენტის სხდომაზევე, პარლამენტის ფიცს მოაწეროს ხელი. “თავში ქვას არ ვიხლი?” - გულში გაუკვირდა კოკოს, ხმამაღლა კი თქვა: “თუ მიბრძანებთ, ისევ მოვუშვებ ულვაშს” და საულვაშეზე თითი მიშასებურად მოისვა.

ამ დროს თეფშებისა და ქვაბების მბრძანებელი პოლონეთში იმყოფებოდა და თავის კოლეგას, ლეხ კაჩინსკის ხვდებოდა. ამჯერად, ბებო არ წაიყვანა - ქუვეითის შემდეგ პოლონეთში აკლიმატიზაცია გაგიჭირდებაო. სააკაშვილმა კაჩინსკის, შეხვედრის შემდეგ გამართულ პრესკონფერენციაზე, მხარდაჭერის გამო მადლობა გადაუხადა და აღნიშნა, რომ ქართველი ხალხი მადლობელია იმ პოლიტიკური მესიჯებისთვისაც, რომელიც პოლონეთიდან მოდის.
ანუ, როგორც ვხვდები, მთელი პოლონეთი მიშას ემესიჯება.

რა თქმა უნდა, არ მჯერა, რომ სააკაშვილს მთელი პოლონეთი წერილებს წერს და სიყვარულს უხსნის, მაგრამ ვაღიარებ, რომ ნუგზარ წიკლაურისა და კოკო გამსახურდიას, ანუ ქვაბებისა და თეფშების მბრძანებელს, ნამდვილად ეხერხება საკუთარი თავის რეკლამირება.

გასულ კვირაში თბილისში რეკლამის, პოლიგრაფიისა და თანამედროვე ტექნოლოგიების საერთაშორისო გამოფენა გაიმართა. წარმოდგენილი იყო პოლიგრაფიული მასალები, დანადგარები, ტექნოლოგიები, აქსესუარები და პროდუქცია; სრული სარეკლამო მომსახურება უახლესი სარეკლამო ტექნოლოგიებით, სარეკლამო აქსესუარები და ბიზნეს სუვენირები... სერიოზული გამოფენა იყო და დიდი ინტერესი გამოიწვია.

ნამდვილი სენსაცია გამოიწვია ერთ-ერთმა ექსპონატმა, რომელიც პავილიონის ცენტრში იყო გამოფენილი და რომელსაც «ჩელინის ვენერას» მსგავსად პოლიცის გაძლიერებული რაზმები და სიგნალიზაციის უახლესი სისტემები იცავდნენ. ეს იყო მიხეილ სააკაშვილის ცრემლი, რომელიც მან ცნობილ სარეკლამო რგოლში გადმოაგდო. თავად სააკაშვილი ამ დროს ბრიუსელში იმყოფებოდა, სადაც, როგორც ითქვა, “სამუშაო შეხვედრები გამართა”. რა თქმა უნდა, ეს სარეკლამო ტრიუკია. მიშა და მუშაობა? მიშა ლამის ერთადერთი ადამიანია, ვინც არ მუშაობს და მაინც ჭამს. და მერე რამდენს ჭააამს... ესეც სარეკლამო ტრიუკია, აქაოდა, რადგან ვჭამ ე. ი. ვმუშაობო. რადგან ბევრს ვჭამ, ე. ი. ბევრსაც ვმუშაობო.
იმუშავეთ - ვირებო, ჭამეთ - ბრიგადირებო.

ზურაბ ნოღაიდელი მოსკოვში იმყოფებოდა, სადაც, როგორც მანამდე თვითონ ამბობდა, უნდა შეხვედროდა ოსებს და აფხაზებს. ნოღაიდელი შეხვდა მარსის, ვენერას და პლუტონის მოქალაქეებს, დიდი დათვის თანავარსკვლავედის წარმომადგენლებს, ორიონის სარტყელის სრულუფლებიან და საგანგებო ელჩს რუსეთსა და დსთ-ს ქვეყნებში, მაგრამ ვერ შეხვდა ოსებს და აფხაზებს. ჩამოვიდა თუ არა, მაშინვე გაავრცელა, რომ “მოძრაობა “სამართლიანი საქართველოსთვის” ლიდერი ზურაბ ნოღაიდელი მოსკოვში ვიზიტით კმაყოფილია”.

ეს მე ჩემებურად მესმის - ნოღაიდელი იმით კი არ არის კმაყოფილი, მოსკოვში რომ იყო, არამედ იმით, რომ რამდენიმე დღის განმავლობაში არ იყო საქართველოში.

- “ვიცი, რომ დავით ბოლქვაძე ვახტანგ ქობალიას არ მოუკლავს. ისიც ვიცი რა უნდა ხელისუფლებას მსგავსი შეკითხვებით, რომელთაც მისი დაკვეთით თქვენ მისვამთ. სააკაშვილს ანერვიულებს, რომ სამეგრელო წავართვით და ჯიბეში ვეღარ ჩაიდებს”, - განაცხადა ნოღაიდელმა “რია ნოვოსტის” ოფისში გამართული ტელეხიდის მსვლელობისას.

სამეგრელო წავართვითო... რას არ იტყვის დაღლილი კაცი... როცა პეტრე მამრაძე გაწევრიანდა ნოღაიდელის პარტიაში, ხისტმა-ზურაბამ ალბათ თქვა, სააკაშვილს ცხრა მთავრობა და სახელმწიფო კანცელარია წავართვითო.

ვიცი, რომ დავით ბოლქვაძე ვახტანგ ქობალიას არ მოუკლავსო... ეგ თუ იცოდი, სად იყავი ამდენ ხანს? მწვანეებში, მოქალაქეებში, ნაციონალებში... ვახტანგ არა ცელი!!! ლოთი და მორჩა. ბასიაკი. ამ ზვიადისტების შუბა რომ დავხიე...

საერთოდ, კოკობზიკურ-კუკუზნაკური კვირა იყო და ისე როგორ იქნებოდა, ზვიად ძიძიგურს რომ არ ეკოკობზიკ-ეკუკუზნაკა? გასულ კვირაში “კონსერვატორებმა” პარტიის დროშა შეცვალეს და ეს ცვლილება 28 ოქტომბრის არჩევნების 19 წლისთავს დაუკავშირეს, ყველაზე სამართლიანი არჩევნები იყოო, მას შემდეგ ეგეთი აღარ ჩატარებულაო. არ ვდავობ, მაგრამ ხა-ხა-ხა - ყველაზე სამართლიანი არჩევნები საქართველოს ისტორიაში კომუნისტებს ჩაუტარებიათ. არადა, შეგახსენებთ, ზვიად გამსახურდიამ ორი არჩევნები ჩაატარა - ადგილობრივი და საპრეზიდენტო.

აწი, კონსერვატორების დროშა სამფეროვანი იქნება. გავკადნიერდები და საკუთარ აზრს ღიად დავაფიქსირებ. ჩემი აზრით, კონსერვატორების დროშაზე გამოსახული უნდა იყოს სამტრედიის გადაკეტილი სარკინიგზო კვანძი, ხურჯინიანი ზვიად ძიძიგური (ხურჯინში ერთ მხარეს “ბორჯომის” ბოთლები დევს, მეორე მხარეს - ქართული შავი ბაიხის ჩაი) და მიხეილ გორბაჩოვი, რომელიც ტკივილით აღსავსე თვალებით შესცქერის სპეკულანტებში ნაყიდ კონტრაბანდულ ქართულ მინერალურ წყალს.

სხვათა შორის, მინდა გითხრათ, რომ ვლადიმირ პუტინმა ზვიად ძიძიგური თავის პირად მტრად გამოაცხადა, როგორც მეოცე საუკუნის ყველაზე დიდი გეოპოლიტიკური კატასტროფის ავტორი.

გასულ კვირაში პარლამენტში შევიდა რაღაც კანონპროექტი, რომელიც ნოტარიატის მოწყობის მოყვარულებს დააინტერსებს. კანონპროექტის ავტორები არიან პავლე კუბლაშვილი, ლაშა თორდია, კახა ანჯაფარიძე და ზვიად კუკავა. ეს ამბავი ზვიად კუკავას გამო გავიხსენე. კაცს ჯერ მისალმება არ დაემთავრებინა და უკვე კანონპროექტის ავტორად გამოაცხადეს. თურმე აქამდე მურთაზ ზოდელავა წერდა და ახლა ესტაფეტა კუკავამ გადაიბარა. მიხეილ მაჭავარიანმა იხუმრა კიდეც და განაცხადა, რომ ”ბუნებაში არაფერი იკარგება”. კუკავასი და ბუნების რა მოგახსენოთ, მაგრამ მიხეილ მაჭავრიანი რომ არ დაიკარგება, ამაში ნამდვილად დარწმუნებული ვარ.

კუკავას იურიდიულ კომიტეტში გაწევრიანების მიზნით, იურიდიული კომიტეტის შემადგენლობიდან დეპუტატ მარიკა ვერულაშვილის გაწვევაც მოხდა. ეს რომ ვერულაშვილმა გაიგო, ეწყინა - რატომ აქამდე არ მითხარით, იურიდიული კომიტეტის წევრი თუ ვიყავიო.

მაჭავარიანს დავუბრუნდები. პარლამენტის საკომიტეტო მუშაობაში ვიცე-სპიკერებიდან, მხოლოდ პირველი ვიცე-სპიკერი ვერ ჩერთვება. ეს გადაწყვეტილება საპროცედურო საკითხთა საპარლამენტო კომიტეტმა მიიღო და არგუმენტად პირველი ვიცე-სპიკერის გადატვირთულ გრაფიკს დასახელა. პარლამენტის პირველი ვიცე-სპიკერი კი მიხეილ მაჭავარიანია.

როდის აქეთ არის მიხეილ მეორე გადატვირთული? ალბათ, მაშინ გადაიტვირთა, როდესაც ობამამ და მედვედევმა თითი გადატვირთვის ღილაკს დააჭირეს. დედამიწის ერთ კუთხეში პეპლის ფრთების მოძრაობა დედამიწის მეორე კუთხეში ქარიშხალს იწვევს – ამას ”პეპლის ეფექტი ეწოდება”. ჰოდა, აშშ-ს პრეზიდენტად ობამას არჩევამ მიხეილ მაჭავარიანს დროის პრობლემა მოუხსნა. ახლა მას უკვე შეუძლია, შეაგროვოს საფოსტო და აქციზური მარკები, ასანთის კოლოფები, ანაც მიეხმაროს ხათუნა გოგორიშვილს შუშის სათამაშოების შეგროვებაში.

დავით ოქიტაშვილმა თავის კოლექციაში მორიგი სკანდალი შეიტანა - «რივერდანსის» ვარსკვლავების შოუ. ბანძი შოუ იყოო - ხალხმა თქვა. ”მაჩვენეთ აფიშა, სადაც წერია, რომ ბანძი არ იქნებოდაო” - ენამოსწრებულად უპასუხა ოქიტაშვილმა. ასეა - ზოგი ამაყობს, შვილები მომესწრენო, ოქიტაშვილს ენა მოესწრო.

გასულ კვირაში ლეიბორისტებმა ბევრი რამის გაპროტესტება მოასწრეს – თბილისის ზოოპარკის გადატანა თბილისის ზღვაზე, შრომის წიგნაკების გაუქმება, პენსიების ხუთი ლარით გაზრდა და კიდევ ის, რომ ნიკა გილაური თურმე ”ყავის სახლებს” აკონტროლებს. ლეიბორისტები წუწუნებდნენ, გილაურის უკითხავად ფინჯანი ვერ გადმოგვიბრუნებია და ადამიანურად ვერ გვიმკითხავიაო.

როგორც სოსო შატბერაშვილმა განაცხადა, ოპოზიციურმა პარტიებმა, რომლებიც ”ლეიბორისტებს” ერთობლივი ბრძოლის დაწყებას სთავაზობენ, აუცილებლად უნდა დააფიქსირონ პოზიცია მისი პარტიის ძირითად პრინციპებთან მიმართებაში. არ ვიცოდი, ლეიბორისტებს თუ პრინციპები ჰქონდათ. ვიცოდი, რომ ჰქონდათ ზაზა ბეგაშვილი, ჯონდი ბაღათურია, ჯუმბერ შენგელია და სხვები. პრინციპები ნამდვილად არ ვიცოდი.

პრინციპული თეა თუთბერიძის გვერდზე ჰაკერებმა მისი სახელით ბოდიშის განცხადება განათავსეს, ხოლო ასევე პრინციპულმა ედუარდ კოკოითმა ნიჟეგოროდის ოლქის გუბერნატორს მეგობრობის ორდენი გადასცა. მომავალ კვირაში კოკოითის საიტზე ჰაკერები შევლენ და კოკოითის სახელით საქართველოსადმი ბოდიშის წერილს დადებენ, ხოლო თეა თუთბერიძე მეგობრობის ორდენს გადასცემს გიგი თევზაძეს და ”მამა ბუასილს”.

ნინო ბურჯანაძის ყოფილი აგარაკი მერიას გადაეცა. მერია ამბობს, ბავშვებს უნდა გადავცეო, მაგრამ არ აკონკრეტებს - ვის ბავშვებს. საერთოდ, მერიას უყვარს ბავშვები, მაგრამ არ ამბობს, ვისი ბავშვები უყვარს. გასულ კვირაში მერიამ თქვა, ჩვენთან დღეში 2000 მოქალაქე მოდისო. დღეს, 2 ნოემბერს ზუსტად ორი წელი სრულდება, რაც მერიასთან 200 ათასი მოქალაქე მივიდა და უთხრა, ორ ბატს ვერ მოგაბარებთო.

ნამდვილად სასაცილოა ერთი ნამდვილი ამბავი: ”პარლამენტის ვიცე-სპიკერი გიგი წერეთელი ადის-აბებაში (ეთიოპია) მიმდინარე გაერო-ს მოსახლეობის ფონდის, ევროპის საპარლამენტო ფორუმისა (EPF) და აზიის საპარლამენტო ფორუმის მიერ ორგანიზებულ საპარლამენტო კონფერენციაში მონაწილეობს. აღნიშნულ ღონისძიებას 150-მდე ქვეყნის 300-მდე საპარლამენტო და სამთავრობო დელეგაციების წარმომადგენელი ესწრება”.

ვერ გეტყვით, წაიყვანა თუ არა გიგი წერეთელმა ეთიოპიაში მისი სათაყვანებელი პრეზიდენტის სათაყვანებელი ბებია (ვიცი, რომ სანდრა წაიყვანა. იქნებ, სანდრამ წაიყვანა გიგი?), მაგრამ ცნობილია, რომ ეთიოპელები ყველაზე მაგარი მორბენლები არიან მსოფლიოში. ამ წუთში მხოლოდ აბიბე ბიკილა მახსენდება. ჰოდა, იმედია, მათ გამოცდილებას იმედი მაქვს მალე გამოიყენებს არა მხოლოდ გიგი წერეთელი, არამედ ერთიანი ნაციონალური მოძრაობაც.

ტურიზმისა და კურორტების დეპარტამენტს ახალი ხელმძღვანელი ჰყავს. ზაალ აბაზაძე თანამშრომლებს ზურაბ პოლოლიკაშვილმა წარუდგინა. ეს სიუჟეტი ტელევიზიით ვნახე. ქართული ტურიზმის ახალი მამა საკმაოდ კარგი ბავშვი ჩანს. პოლოლიკაშვილმა დარცხვენილმა თქვა: ”ზაალ აბაზაძეს საკმაოდ სერიოზული გამოცდილება აქვს ტურიზმის სფეროში და დარწმუნებული ვარ, ახალ თანამდებობაზეც წარმატებულად გააგრძელებს საქმიანობას. მსურს მადლობა გადავუხადო ტურიზმის დეპარტამენტის ყველა ყოფილ ხელმძღვანელს და ავღნიშნო, რომ ტურიზმის განვითარების ახალი სტრატეგია არ იქნება რადიკალურად განსხავებული მანამდე არსებულისგან”.

რომ იტყვიან ხოლმე, ახლანდელი ბავშვები სხვანაირები არიანო, მეცინება, მაგრამ ახლა აღარ გამეცინება. ზაალ აბაზაძე ბავშვია, მაგრამ ”საკმაოდ სერიოზული გამოცდილება აქვს ტურიზმის სფეროში”. თუმცა, საყურადღებო ის არის, რომ ტურიზმში არაფერი იცვლება. ტურიზმმა იკითხოს, თორემ მე - რა?!

ახლა, წავედი. მივდივარ დაბადების დღეზე. 3 საათზე შამფურები უკვე მაყალზე იქნება, რაც იმას ნიშნავს, რომ დღეს მწვადს შევჭამ და ბევრ ღვინოს დავლევ. როცა ვსვამ, ბევრ სიგარეტს ვეწევი. დილით გავიგებ ახალ ამბავს, რომ ნიკოტინი, ალკოჰოლი და ქოლესტერინი უარყოფითად მოქმედებს ადამიანის ჯანმრთელობაზე. გავიგებ, გადავირევი და სასამართლოში ვუჩივლებ სიგარეტისა და ღვინის მწარმოებლებს, სასამართლოში ვუჩივლებ მწვადის მწარმოებლებს – ჩემს მეგობრებს, გუშინდელ იუბილარებს.

და ვიქნები ისეთივე თავხედი და მატყუარა, როგორც ჩანგლების მბრძანებელი, როგორც კოვზების მბრძანებელი, როგორც ვარდების მბრძანებელი და როგორც კოკორი, რომელიც გასულ კვირაში ვარდს გაეფურჩქნა.

გ.კ. (გესმის, კოკო?) მისმინეთ, გუდ, - უთხრა სერ ჰენრიმ, - თქვენ ამ მხარეში გარკვეული როლით გამოცხადდით და ეს როლი ბოლომდე უნდა შეასრულოთ, ვიდრე აქ ვიმყოფებით, შარვალს ვეღარ ჩაიცვამთ, დღეიდან მხოლოდ ეგ პერანგი და ფეხსაცმელი უნდა ატაროთ.
(ჰენრი რაიდერ ჰაგარდი, “სოლომონ მეფის საგანძური”)

[დიტო გელოვანი; “ვერსია“;]

READ MORE - თეა თუთბერიძე ბოდიშს იხდის?

იგორ გიორგაძე: ჩემთვის ცნობილია ზვიად გამსახურდიას მკვლელის ვინაობა!

შევარდნაძის ხელისუფლების ყოფილი მაღალჩინოსანი, იგორ გიორგაძე, ზვიად გამსახურდიას მოკვლის ვერსიას ამტკიცებს და აცხადებს, რომ იცის პრეზიდენტის მკვლელობის როგორც შემკვეთის, ისე შემსრულებლის ვინაობა და ისიც, თუ რა თანხაა ამაში გადახდილი.

ამის შესახებ პირWელს ზვიად გამსახურდიას დაღუპვის მიზეზების შემსწავლელი დროებითი კომისიის ხელმძღვანელმა კონსტანტინე გამსახურდიამ განუცხადა.

– სხვათაშორის, თავის დროზე იგორ გიორგაძემ პრეზიდენტის ცხედრის ექსპერტიზა მოითხოვა, ხოლო ოქმს, რომლშიც თვითმკვლელობაზეა საუბარი, ხელი არ მოაწერა და ამაზე უარი თქვა - აღნიშნა კონსტანტინე გამსახურდიამ.

როგორც კომისიის დღევანდელ სხდომაზე ექსპერტის რანგში მიწვეულმა, წინა ორი მოწვევის პარლამენტში საგამოძიებო კომისიის თავმჯდომარემ მიხეილ ოსაძემ პროკურატურის მასალებზე დაყრდნობით განაცხადა, საქმეში წარმოდგენილია ყოფილი მაღალჩინოსნის განცხადება, რომლის მტკიცებით, მან იცის, ვინ არის პრეზიდენტის მკველობის შემკვეთი, თავად მკვლელი და კონკრეტულად რა თანხაა ამაში გადახდილი.

მისივე თქმით, მისი ეს განცხადება უცხოურ მედიაში გამოქვეყნდა და პროკურატურაში აღძრული სისხლის სამართლის საქმის რვატომეულში დევს. საქმის ინტერესების გათვალისწინებით, მიხეილ ოსაძემ მეტი კონკრეტიკისგან თავი შეიკავა.

დღეს გოგიჩაიშვილის და ალხაზიშვილის სასამართლო პროცესი გაიმართება

დღეს, 18 დეკემბერს 11:30 საათზე, თბილისის სააპელაციო სასამართლოს სისხლის სამართლის კოლეგიაში მოძრაობა "7 ნოემბრის" ერთერთი ლიდერის ლევან გოგიჩაიშვილის და გიორგი ალხაზიშვილის სასამართლო პროცესი გაიმართება. სასამართლო სხდომის მსვლელობის პარალერულად კი, მოძრაობა "7 ნოემბერი" საპროტესტო აქციას გამართავს.

"ჩვენ საპროტესტო აქციით, მოვუწოდებთ სასამართლოს, იყოს ობიექტური და მიუკერძოებელი" – განუცხადა "ჯეოტოპნიუსს" მოძრაობა "7 ნოემბრის" ერთერთმა ლიდერმა, ჯაბა ჯიშკარიანმა

[აქციის ორგაზნიზატორი: მოძრაობა "7 ნოემბერი", საკონტაქტო პირი: ჯაბა ჯიშკარიანი ტელ: 899 400 850]

აფთიაქებში პირბადეების დეფიციტია, პრემიერ-მინისტრი იტყუება

საქართველოში H1N1 ვირუსით ინფიცირებულთა რაოდენობის მატებასთან ერთად მოთხოვნა მედიკამენტებსა და პირბადეებზე დღითიდღე იზრდება. დაავადებათა კონტროლის ეროვნული ცენტრის მონაცემებით, დღეისათვის ლაბორატორიულად 647 შემთხვევაა დადასტურებული. აქედან 8 მძიმე შემთხვევაა. საშიში ვირუსით 5 ადამიანის გარდაცვალებამ მოსახლეობა პანიკაში ჩააგდო.

პრემიერ-მინისტრ ნიკა გილაურის განცხადებით, საქართველოში მედიკამენტებისა და პირბადეების საკმარისი მარაგი არსებობს. ჩვენთან საუბრისას ამას ადასტურებს დაავადებათა კონტროლის ეროვნული ცენტრის დირექტორის მოადგილე შოთა ცანავა. თუმცა, ჩვენ ამ ინფორმაციაში ეჭვი შევიტანეთ და ქალაქის აფთიაქებში სპეციალური გამოკითხვა ჩავატარეთ. ექსპერიმენტმა სრულიად განსხვავებული სურათი გვიჩვენა. როგორც ირკვევა, პირბედეების სერიოზული დეფიციტია და პრემიერ-მინისტრი, ფაქტობრივად, იტყუება.

15-16 დეკემბერს თბილისის სხვადასხვა უბანში ჩვენს მიერ გამოკითხული 24 აფთიაქიდან პირბადეები მხოლოდ სამ აფთიაქში აღმოვაჩინეთ. ესენია - აფთიაქი „ჯიპისი“ (აღმაშენებლის 116), მისი პარტნიორი აფთიაქი „წითელი A“ (გლდანის მე-5 მკ/რ-ნი) და აფთიაქი „ნიუ ფარმა“ (გლდანის მე-3 მკ/რ-ნი). ფასი 27-დან 40 თეთრამდე მერყეობს.

პირბადეების დეფიციტი განსაკუთრებით პრობლემურია „ავერსისა“ და „პეესპეს“ აფთიაქებში, რომლებიც ქალაქში, როგორც წესი, გვერდიგვერდ არის გახსნილი. ჩვენ სრულად წარმოგიდგენთ იმ აფთიაქების სიას, სადაც პირბადეები არ ჰქონდათ.

„ავერსის“ სააფთიაქო ქსელი: ყაზბეგის გამზირი #5; ყაზბეგის გამზირი #8; მეტროსადგური „სამედიცინო ინსტიტუტი“, ხიზანიშვილის ქ #6, მეტროსადგურ „ახმეტელის თეატთან“, გლდანის მე-7 მიკრორაიონი, გუდამაყრის ქუჩა #4; გაგარინის მოედანი.

ყაზბეგის გამზირი #5-ის „ავერსის“ფარმაცევტმა ზურაბ კიკვაძემ გვითხრა: „უკრაინაში არსებული ვითარება რომ აჩვენეს ტელევიზიით და თქვეს, რომ იქ პირბადეებზე მოთხოვნა ძალიან გაიზარდა, შემიძლია ვთქვა, მეორე დღეს ჩვენთან არსებული პირბადეები მთლიანად გაიყიდა. ამჟამად კვლავ დეფიციტია. პირბადეები ბაზაშიც არ არის და ყოველდღე ველოდებით“.

„ავერსის“ ცხელ ხაზზეც დაგვიდასტურეს, რომ ქსელში პირბადეების დეფიციტია.

სერიოზული დეფიციტია „პეესპეშიც“, კერძოდ, პირბადეები შემდეგ აფთიაქებში არ ჰქონდათ: ყაზბეგის გამზირი #8; ხიზანიშვილის ქ. #6; აღმაშენებლის გამზირი 97; გლდანის მე-7 მიკრორაიონი; გაგარინის მოედანი.

პირბადეები ასევე არ ჰქონდათ: „სახალხო აფთიაქი“ მეტრო „პოლიტექნიკურთან“;

გლდანის მე-3 მიკრორაიონში, სუპერმარკეტ „მასივში“ არსებული აფთიაქი; გლდანის მე-5 მიკრორაიონში, აფთიაქში 36/6; „ჯიპისი“, ყაზბეგის #10; მეტროსაგური „ახმეტელთან“ სუპერმარკეტი „მარიამი“ - კერძო აფთიაქი.

„ბოლო 2 თვეა, პირბადეებზე მოთხოვნა გაიზარდა. ჩვენთან დიდი ხანია დეფიციტია“, - გვითხრა აფთიაქ „გეას“ (ყაზბეგის გამზირზე # 13) ფარმაცევტმა, ქეთი მაისურაძემ.

თბილისში პირბადეების დეფიციტი რომ შეიმჩნევა, ფაქტია. მოთხოვნაც არათუ მცირდება, არამედ ყოველდღიურად იზრდება. პირბადეები ძირითადად ჩინეთიდან შემოაქვთ.

ქალაქში არსებულ ვითარებაზე ინფორმაცია მივაწოდეთ დაავადებათა კონტროლის ეროვნული ცენტრის დირექტორის მოადგილეს, შოთა ცანავას და ამ პრობლემაზე კომენტარი ვთხოვეთ.

„მე კერძო აფთიაქებში არსებულ ვითარებაზე კომენტარს ვერ გავაკეთებ, მაგრამ იმის თქმა კი შემიძლია, რომ ჯანდაცვის სამინისტროს სამედიცინო ცენტრებში მედიკამენტების და პირბადეების საკმარისი რაოდენობაა“, - გვიპასუხა შოთა ცანავამ და დასძინა, რომ შესაბამისად, მოსახლეობამ პირბადეები არა კერძო აფთიაქებში, არამედ სახელმწიფო სამედიცინო დაწესებულებაში უნდა მოიკითხოს.

ჩვენ რამდენიმე პოლიკლინიკაში დავრეკეთ, სადაც გვიპასუხეს, რომ პირბადეები მხოლოდ თანამშრომლებისთვის აქვთ და მოქალაქეებზე კი არ გაიცემა. „მიაკითხეთ აფთიაქებს“, - გვირჩიეს პოლიკლინიკებიდან.

www.Humanrights.ge აგრძელებს ჟურნალისტურ მოკვლევას ამ თემაზე. ახალ ინფორმაციებს უახლოეს დღეებში მოგაწვდით.

[თაკო ხუციშვილი, ანა შეშაბერიძე. Humanrights.ge]

თურქეთი საგარეო პოლიტიკურ კურსს იცვლის?

”როგორ დაკარგა დასავლეთმა თურქეთი” - ამ და სხვა, მსგავსი სახელწოდებებით ქვეყნდება დასავლურ მედიაში სტატიები. ერთი კონკრეტული სტატიის ეს ერთი სათაურიც კი ნათლად მიუთითებს იმ შეშფოთებაზე, რომელიც ბოლო პერიოდში თურქეთის საგარეო პოლიტიკური თამაშებითაა გამოწვეული. ევროპასა და ამერიკაში - როგორც პოლიტიკურ ასევე, საექსპერტო თუ ჟურნალისტურ წრეებში - ვეღარ გაარკვიეს როგორია ამ დიდი და ძლიერი ქვეყნის საგარეო პოლიტიკური ორიენტაცია. რჩება ის პროდასავლურად თუ სულ უფრო და უფრო იხრება აღმოსავლეთისკენ.

ბოლო პერიოდის თურქეთის საგარეო პოლიტიკური ნაბიჯებით შეშფოთებულნი არიან ქართულ საექსპერტო წრეებშიც. მიზეზი მარტივია: ახლო აღმოსავლეთის პარალელურად, თურქეთი სულ უფრო და უფრო აქტიურად ერთვება სამხრეთ კავკასიურ პროცესებშიც. პარალელურად კი, აქტიური პოლიტიკური ფლირტი აქვს რუსეთთანაც.

დასავლეთი ახლა შეშფოთდა - ისინი დღევანდელი ფაქტებით აპელირებენ და ცდილობენ თურქეთის სამომავლო პოლიტიკური ორიენტაცია გამოითვალონ. არადა წესით, ჯერ კიდევ შარშან, რუსეთ-საქართველოს ომის დროს უნდა შეშფოთებულიყვნენ.

აგვისტოს ომის დღეებში, ამერიკის მაშინდელმა პრეზიდენტმა, ჯორჯ ბუშმა თავდაცვის მდივანს - რობერტ გეითსს - საქართველოსთვის ჰუმანიტარული ტვირთების მიწოდება სამხედრო გემებით დაავალა. ამერიკული გემები შავი ზღვის აკვატორიაში თურქეთის ტერიტორიულ წყლებამდე უპრობლემოდ მივიდნენ და... გაჩერდნენ. ნატოს სამხრეთის საზღვრების ფორპოსტმა, თურქეთმა, თუნდაც ჰუმანიტარული დახმარებით დატვირთულ, მაგრამ სამხედრო ამერიკულ გემებს თავის ტერიტორიულ წყლებში შესვლის უფლება არ მისცა. გაუგებრობის მოგვარებას დრო დასჭირდა.

იმავე პერიოდში გააქტიურდა თურქეთის პოლიტიკური ფლირტი რუსეთთანაც. თურქი მაღალჩინოსნები სულ რამდენიმედღიანი რუსულ-ქართული ომის დროს (და შემდგომ პერიოდშიც) რამდენიმეჯერ ესტუმრნენ რუსეთს. გაიხსენეს, ე.წ. ”მშვიდობიანი კავკასიის” გეგმაც და ის, რუსეთს შესათავაზეს. ქართველი ექსპერტების ნაწილი მაშინ ვარაუდობდა, რომ ეს სხვა არაფერი იყო თუ არა, რუსეთისთვის სამხრეთ კავკასიის ხელახალი გადანაწილების შეთავაზება. ექსპერტი უსაფრთხოების საკითხებში ირაკლი სესიაშვილი ამ მოსაზრებას არ ეთანხმება.

- “არა, მე ასე ვფიქრობ. თურქეთი სამხრეთ კავკასიაში ერთ-ერთი სერიოზული მოთამაშეა. მით უფრო, თუ გავითვალისწინებთ სამხრეთ-კავკასიის გეოპოლიტიკურ მდგომარეობას და იმას, რომ დასავლეთზე გასასვლელი თურქეთზე გავლითაა, ამიტომ ცხადია, თურქეთს აქვს თავისი ინტერესები და წონა ამ რეგიონში. მით უფრო, რომ ეს ეკონომიკურად ერთ-ერთი უძლიერესი ქვეყანაა და ევროკავშირში გაერთიანების პრეტენზია აქვს. ამიტომ, ის რეალურად არის დაინტერესებული, რომ ჩვენს რეგიონში რეალური ზეგავლენა ჰქონდეს” - ამბობს სესიაშვილი.

ექსპერტის თქმით, დღეს თურქეთს მკაფიოდ გამოხატული ორმაგი პოლიტიკა აქვს.

- ”ერთი მხრივ, ევროკავშირში გაწევრიანებას ცდილობს. იმ შემთხვევაში, თუ ევროკავშირში მასზე უარს იტყვიან, ის ცდილობს დასავლეთს აჩვენოს, რომ შესძლებელია რუსეთთან უფრო მჭიდრო ურთიერთობა დაამყაროს და ამით, სამხრეთ დერეფნის ალტერნატივაც კი მოსპოს. სქემა ასეთია: თურქეთმა განაცხადა, რომ მასაც სურს ენერგორესურსების გადამყიდველი იყოს ისევე, როგორც რუსეთი ყიდულობს ცენტრალურ აზიაში ნავთობსა, გაზს, იხდის მათ ტრანსპორტირებაში დიდ საფასურს და ფაქტობრივად, გადამყიდველია ამ ენერგომატარებლების. ეს ფაქტობრივად მთლიანად მოსპობს კონკურენციას რადგან თურქეთი რუსეთის პარტნიორი გახდება და ეს ორი ქვეყანა მთლიანად გააკონტროლებს ენერგომატარებლების ფასს დასავლეთში. სწორედ ამაში მდგომარეობს თურქეთის ორმაგი პოლიტიკა.

თუმცა ეს ყველაფერი თამაშია - არ დაგვავიწყდეს, რომ სამხრეთ კავკასიაში აქტორები არიან ამერიკა და რუსეთი. აშშ-ს და თურქეთს განსაკუთრებული ურთიერთობები აქვთ”, - აღნიშნა სესიაშვილმა.

როგორც ჩანს, ეს კარგად ესმით აშშ-შიც. შემთხვევითი არ იყო, რომ ერთ-ერთი პირველი ქვეყანა რომელსაც ბარაქ ობამა ინაუგურაციის შემდეგ ესტუმრა, სწორედ თურქეთი იყო.

ახლა კი, ორიოდე სიტყვით იმ ფაქტების შესახებ, რომლებმაც უკვე წელს გამოიწვია დასავლეთის საფუძვლიანი შეშფოთება.

ოქტომბერში თურქეთმა უარი თქვა ისრაელის სამხედრო-საჰაერო ძალების მანევრებში მონაწილეობაზე. ცოტა უფრო ადრე, შვეიცარიაში, დავოსის პრესტიჟულ ეკონომიკურ ფორუმზე, თურქეთის პრემიერ-მინისტრმა რეჯეპ-ტაიპ ერდოღანმა ისრაელის პრეზიდენტი ღაზას სექტორში სამხედრო მოქმედებების გამო გააკრიტიკა. თურქეთის ისრაელის წინააღმდე გადადგმულ ნაბიჯებს ნათელი და მარტივი მიზანი ჰქონდა.

უკვე ათი წელია თურქეთის სათავეში ისლამისტური პარტიაა. ამის გათვალისწინებით, ადვილი სავარაუდო იყო, რომ ისლამური სახელმწიფოების გარემოცვაში განლაგებული ისრაელის კრიტიკა ისლამისტური მთავრობის მიერ, მუსლიმურ თურქეთს ისლამურ ახლო აღმოსავლეთში არამარტო პოლიტიკურ წონას გაუმყარებდა, არამედ, დამატებით დივიდენდებსაც - გავლენის სფეროების გაფართოების სახით - შესძენდა.

დასავლეთის შეშფოთებას იწვევს აგრეთვე, თურქეთის მიერ ირანთან დაახლოებისკენ გადადგმული ნაბიჯებიც. ასე მაგალითად, ამა წლის ივნისში, ირანში ჩატარებული საკმაოდ საკამათო საპრეზიდენტო არჩევნების შემდეგ, მაჰმუდ აჰმადი ნეჯადს გამარჯვება ერთ-ერთმა პირველმა სწორედ ერდოღანმა მიულოცა. გარდა ამისა, გაფართოვდა ირანსა და თურქეთს შორის სავაჭრო და ეკონომიკური თანამშრომლობაც.

რამდენიმე ხნის წინ, თურქეთის პრემიერ-მინისტრმა, რეჯეპ ტაიპ ერდოღანმა წარმოადგინა გეგმა, რომლის მიხედვითაც, 2011 წლამდე თურქეთსა და ირანს შორის სავაჭრო ბრუნვა შვიდიდან ოც მილიარდ დოლარამდე უნდა გაიზარდოს. განსაკუთრებით აქტიური თანამშრომლობა იგეგმება ელექტროსადგურების მშენებლობის, საბანკო და სასარგებლო წიაღისეულის მოპოვების სფეროებში. ეს ყველაფერი მთლიანობაში, დასავლეთს ძალიან აშფოთებს. როგორც აღვნიშნეთ, იქ ფიქრობენ, რომ თურქეთი შესაძლოა, საგარეო პოლიტიკურ ორიენტაციას იცვლიდეს. თუმცა, არ არის გამორიცხული, თურქეთის ბოლო პერიოდის ქმედებებს სინამდვილეში სულ სხვა მიზანი და საფუძველი ჰქონდეს.

ერთის მხრივ თურქეთი, ნატოს სამხრეთის საზღვრების ფორპოსტია. პარალელურად, ის ფაქტობრივი რეგიონალური ლიდერია სამხრეთ კავკასიაშიც. ასე იყო აგვისტოს ომამდეც მიუხედავად იმისა, რომ მაშინ, დღევანდელთან შედარებით, საქართველოს ყველა თვალსაზრისით ბევრად უკეთესი მდგომარეობა ჰქონდა. პროდასავლური თურქეთი კი, დღესაც ლიდერობს. და მიუხედავად ამისა, ერთი რეგიონის ლიდერობა ვერ სძენს მას ისეთ პოლიტიკურ წონას, რომ მისი ევროკავშირში გაწევრიანებისთვის საკმარისი იყოს. არადა, თურქეთი ამაზე იმდენი ხანია ოცნებობს, რომ უკვე გაღიზიანებაც კი დაეწყოთ ამის გამო თურქ მაღალჩინოსნებს.

ცივილიზებულ მსოფლიოს სერიოზული პრობლემები აქვს ისლამისტური ირანის ბირთვულ განიარაღებასთან. გარდა ამისა, მნიშვნელოვანია, რომ რუსეთი ყველაფერს აკეთებს, რათა ირანი მისი გავლენის ორბიტაზე დარჩეს. და ისევ, როგორც სამხრეთ კავკასიის შემთხვევაში, თურქეთს და რუსეთს პოლიტიკური ინტერესების საერთო არეალი აქვთ - მარტივად რომ ვთქვათ, მათი ინტერესთა შეჯახება (მშვიდობიანი, ცხადია) საერთო გეოგარაფიულ წერტილებში ხდება.

სამხრეთ კავკასიასთან დაკავშირებით, ალბათ თურქეთ-სომხეთის დაახლოების ბოლო პერიოდის მცდელობები უნდა გავიხსენოთ. თუმცა, ამ პროცესს ორი უმნიშვნელოვანესი პრობლემა უშლის ხელს: ყარაბაღი-აზერბაიჯანისა და სომხეთის კონფლიქტი და სომხური საზოგადოების მხრიდან, თურქეთის მიერ სომხების გენოციდის აღიარების მოთხოვნა. ამ პროცესებში შუამავლად ამერიკა გვევლინება. თუ რაიმე ფორმით ( ისე რომ ეს მისაღები იყოს აზერბაიჯანისთვისაც და სომხეთისთვისაც) ამ პრობლემების მოგვარება მოხერხდა და პარალელურად, საქართველომ ის პოლიტიკური წონა მაინც დაიბრუნა რაც თუნდაც აგვისტოს ომამდე გვქონდა, არ არის გამორიცხული, ამიერკავკასიაში რუსეთის პოზიცია ძალიან შესუსტდეს.

- ”მთლად ასე პირდაპირ პარალელებს ვერ გავავლებთ. თურქეთს საკუთარი სახელმწიფოებრივი ინტერესი აქვს და მათგან ყველაზე მნიშვნელოვანი, ევროკავშირში გაწევრიანებაა. აქედან გამომდინარე, ის ბევრი სხვადასხვა სვლებით მანიპულირებს იმისათვის, რომ დასახულ მიზანს მიაღწიოს”-აცხადებს სესიაშვილი.

ახლა კი, იმ ყველაფრიდან გამომდინარე რის შესახებაც აქამდე ვსაუბრობდით, რამდენიმე ლოგიკური კითხვა დავსვათ:

რა მოხდება, თუ პროამერიკული თურქეთი - რომელიც ერთი რეგიონის, სამხრეთ კავკასიის, ლიდერად უკვე გვევლინება - ისლამურ ახლო აღმოსავლეთშიც იმდენად გაიმყარებს პოზიციას, რომ ეს, თავის მხრივ, ისლამისტური ირანის პოლიტიკაზე ზეგავლენის მოხდენის საშუალებას მისცემს? იმდენის, რომ ეს, ცივილიზებული მსოფლიოსთვის ირანის ბირთვული განიარაღების პრობლემაში რაიმე ტიპის რეალური ცვლილებების შანსად იქცეს?

საინტერესოა, რომ ამ ასპექტზე ყურადღებას დასავლურ მედიაშიც ამახვილებენ.

- ”თურქეთში შესანიშნავად ესმით, რომ ევროკავშირში გაწევრიანებისთვის მათ უპირველეს ყოვლისა, ეკონომიკური წარმატებები სჭირდებათ. გარდა ამისა, დამატებითი არგუმენტის სახით, თურქეთი ევროკავშირს მათი გავლენის გაფართოებას ახლო აღმოსავლეთის მიმართულებითაც ჰპირდება. თურქი პოლიტიკოსები და ინტელექტუალები ხშირად აღნიშნავენ, რომ თავისი მოკავშირეებისთვის თურქეთი უფრო სასარგებლო იქნება თუ შეინარჩუნებს და გააფართოებს თავის გავლენას ევროპის მტრებთან და ამით ითამაშებს ერთგვარი ხიდის როლს აღმოსავლეთსა და დასავლეთს შორის” – ”ფორინ ფოლისი”, სტატია ”როგორ დაკარგა დასავლეთმა თურქეთი”.

ახლა მეორე ასპექტი და ისევ, კითხვის სახით... რა მოხდება თუ მუსლიმური თურქეთი - რომლის სათავეშიც, აგერ უკვე ათი წელია ისლამისტური პარტიაა, ისლამისტურ ირანთან ურთიერთობაში მართლმადიდებლური რუსეთის ჩანაცვლებას შესძლებს? ბოლო პერიოდში, თურქეთის მიერ გადადგმულ ნაბიჯებს კარგად თუ დავუკვირდებით, აშკარად შეიქმნება შთაბეჭდილება, რომ მისი ქმედებების მიზანი ირანთან ურთიერთობაში სწორედ რუსეთის ჩანაცვლებაა. ყველაზე საინტერესო ისაა, რომ კონკრეტულ საკითხებთან დაკავშირებით, ირანსა და რუსეთს შორის უთანხმოება უკვე იკვეთება. ამის შესახებ ”პრესა.გე” ჯერ კიდევ ორიოდე კვირის წინ წერდა და ამიტომ ამ საკითხზე უფრო დაწვრილებით ახლა აღარ შევჩერდებით.

მოკლედ, თურქეთი ირანში რუსეთის ჩანაცვლებას ცდილობს და ეს საკმაოდ ადვილი დასანახია. თავისთავად, ამ მცდელობების თავი და თავი კი, თურქეთის ევროკავშირში გაერთიანების სწრაფვაა. ცხადია, რომ ორი რეგიონის - სამხრეთ კავკასიისა და ახლო აღმოსავლეთის - წამყვან მოთამაშეს ევროპა ასე მარტივად ვეღარ ეტყვის უარს. ამ მოსაზრებას ექსპერტიც ეთანხმება:

- ”რასაკვირველია: თურქეთი კიდევ უფრო იმყარებს პოზიციებს იმისათვის, რომ მერე ევროკავშირს ძლიერის პოზიციიდან ელაპარაკოს. ერდოღანის ვიზიტიც თეირანში და იქ გაკეთებული განცხადებებიც რასაკვირველია სწორედ ამაზე მიანიშნებს. სხვათაშორის, შეიძლება ითქვას, რომ თურქეთმა გარკვეულწილად თავის მიზანს მიაღწია – დასავლურ მედიაში ასეთი შეშფოთების გამოწვევა მათ ინტერესებშია. იქ ალბათ ახლა სიამოვნებისგან ხელებს იფშვნეტენ.

თუმცა ერთია მედია და მეორე – ოფიაციალური ბრიუსელის ოფიციალური პოზიცია. ვფიქრობ, იქ კარგად იციან თურქეთის ამ ნაბიჯების მიზნებიცა და ფასიც ასე რომ მოვლენათა შემდგომი განვითარების შესახებ დასკვნების გაკეთება ჯერ ნაადრევიც არის და სარისკოც”, - აღნიშნა სოსო ცინცაძემ.

ჯერ რთული სათქმელია, რამდენად სახიფათო ან სასარგებლო შეიძლება იყოს ეს ყველაფერი საქართველოსთვის. საბოლოო შედეგი ძალიან ბევრ ფაქტორებზეა დამოკიდებული. სამაგიეროდ, უკვე დღეს შეიძლება ითქვას, რომ თურქეთის პოლიტიკური სამიზნეები სწორედ ის რეგიონებია, რომელიც რუსეთს თავისად აქვს შეგულებული. შესაბამისად, თუ ვინმე უნდა იყოს შეშფოთებული თურქეთის ბოლოდროინდელი გააქტიურებით, ეს სწორედ რუსეთია.

- ”ყველაფერი იმაზეა დამოკიდებული, თუ ვინ ჩაიგდებს ხელში ინიციატივას და ვინ რამდენად მოახერხებს საკუთარი სახელმწიფოებრივი ინტერესების რეალიზებას. ყველა თავის თამაშს თამაშობს და ცხადია, რომ ეს ”თავისი თამაშები” არ ემთხვევა სხვა აქტორების ინტერესებს. სწორედ ამიტომაც არის ჩვენი რეგიონი ცხელი წერტილი და ამიტომაცაა აქ არსებული კონფლიქტები მოუგვარებელი ამდენი ხნის განმავლობაში. ყველას უნდა, რომ თავისი წილი ზეგავლენა ჰქონდეს”, - აღნიშნავს ექსპერტი ირაკლი სესიაშვილი.

[მანანა აბაშიძე, presa.ge]

“რონდინეს 14 პუნქტი" - მშვიდობისათვის

“მშვიდობა ის საერთო სიმდიდრეა, რომელსაც შეჰნატრის კავკასიის ყოველი ერი. იგი ურთიერთ თანამშრომლობით, პიროვნების პატივისცემითა და კულტურათაშორის დიალოგით აიგება.” – ასე იწყება “ლა-ვერნა”-ში ფრანჩესკო ასიზელის ტაძარში (იტალია) ჩატარებულ კავკასიის ხალხთა საერთაშორისო კონფერენციაზე (VENTIDIPACESUCAUCASO/მშვიდობის ქარები კავკასიაზე) შემუშავებული დოკუმენტის პრეამბულა.

ამ დოკუმეტს "რონდინეს 14 პუნქტი" - კავკასიაზე მშვიდობისათვის” ეწოდება. (“14 Punti per la Pace nel Caucaso”). მას სიმბოლურ საფუძვლად პრეზიდენტ ვისონის მიერ 90 წლის წინ შემუშავებული "14 პუნქტი" ჩაედო, რომელიც თავის დროზე გაერთიანებული ერების ორგანიზაციის შექმნის საფუდძვლად მოგვევლინა.

კონფერენციის ჩატარების იდეა დაიბადა, 2008 წლის აგვისტოში რუსეთ- --საქართველოს შორის წარმოებულ ომზე პასუხის გასაცემად. იდეის ავტორები გახლავენ ასოციაცია “Rondine Cittadella della Pace”-ს (რონდინე - მშვიდობის ციტადელის) კავკასიელი სტუდენტები. მათ შორის ქართველები, რუსები, აფხაზები, ოსები, ჩეჩნები და ინგუშები. აღსანიშნავია, რომ მათ მთელი სამუშაო პროცესის განმავლობაში გვერდით ედგნენ და აქტიურად ეხმარებოდნენ “რონდინეს” ასევე სხვა სტუდენტებიც: ახლო აღმოსავლეთიდან, ბალკანეთის ქვეყნებიდან და აფრიკიდან. სწორედ ამ ფაქტისა გამო, მოწვეულ იქნა ეს კონფერენცია, სადაც იტალიის საგარეო საქმეთა სამინისტროს და სენატის წარმომადგენლებიც აქტიურად მონაწილეობდნენ. მათ გარდა იყვნენ სტუმრები ამერიკის შეერთებული შტატებიდან, ევროკავშირიდან, რუსეთიდან და პრაქტიკულად ყველა კავკასიური ქვეყნიდან თუ ავტონომიური რეგიონიდან ჩრდილო კავკასიის რეგიონების ჩათვლით.

დოკუმენტის საწყისი ფორმა შემუშავებული იქნა სტუდენტების მიერ, ხოლო მისი საბოლოო სახით ჩამოყალიბებაში მონაწილეობა მიიღო კავკასიის სხვადასხვა რეგიონებიდან მოწვეულმა 150 სტუმარმა, რომლებიც 16 – 19 მაისის ჩათვლით “La Verna”-ში (იტალია) აქტიურად განიხილავდნენ მის თითოეულ პუნქტს.

კონფერენციაზე "რონდინეს 14 პუნქტი" – ის გარდა კიდევ ერთ ღირსშესანიშნავ ტრადიციას დაედო საფუძველი. გადაწყდა ჩატარებულიყო რთველი ტოსკანის (ცენტრალური იტალიის რეგიონი) მეღვინეობის ყველაზე პრესტიჟულ ზონაში “კიანტის ვენახებში”, სადაც რონდინეს სტუდენტების მიერ დაკრეფილი ყურძნიდან დამზადდებოდა "VIGNA DELLA PACE" (მშვიდობის ღვინო). ეს იდეა წარმატებით განხორციელდა და ამაწლის 21 ოქტომბერს ამ ღვისნი ნომერ 1 ბოთლი საპატიოდ გადაეცა რომის პაპს ბენედექტო XVI-ს “რონდინეს 14 პუნქტი-კავკასიაზე მშვიდობისათვის” დოკუმენტთან ერთად.

როგორც მოგეხსენებათ, რომის პაპი არა მარტო კათოლიკური ეკლესიის წინამძღოლია, არამედ იგი ამავდროულად სახელმწიფოს პირველი პირი გახლავთ. აქედან გამომდინარე ეს ჟესტი მნიშვნელოვან პოლიტიკურ დატვირთვასაც ატარებს.

კონფერენციის ჩატარებისა და დოკუმენტის საბოლოო ვერსიის მიღების შემდეგ ასოციაცია რონდინე, მუშაობის შემდეგ ეტაპზე გადავიდა, რომელიც გულისხმობს, დოკუმენტის ფართო პოლიტიკურ წრეებში გავრცელებას. ამ დროისთვის იტალიის საგარეო საქმეთა სამინისტროს დახმარებით, რომელიც ამავდროულად კონფერენციის ჩატარების მთავარი ხელშემწყობი გახლდათ, დოკუმენტი გადაცემულ იქნა იტალიაში საქართველოს, სასომხეთის, აზერბაიჯანისa და თურქეთის ელჩებისათვის, გუშინ კი 16 დეკემბერს ეს დოკუმენტი გადაეცა ქ. რომში, ამერიკის ელჩს იტალიაში. ისინი კი, თავის მხრივ, ზემოთაღნიშნულ დოკუმენტს მათი ქვეყნების მთავრობებს წარუდგენენ.

პოსტკონფერენციული სამუშაო პროცესის შემდგომ ეტაპად მოგვევლინება ასოციაციისა და მისი სტუდენტების ვიზიტი კავკასიის რეგიონში და “რონდინეს 14 პუნქტი-კავკასიაზე მშვიდობისათვის” ოფიციალური პრეზენტაცია.

აღსანიშნავია, რომ როგორც კონფერენციის ჩატარების პროცესი, ასევე მისი შემდგომი ეტაპები ფართოდ იქნა გაშუქებული იტალიისა და სხვა საერთაშორისო მასმედიით.

“რონდინეს 14 პუნქტი” არაერთჯეროვნად იქნა შეფასებული სხვადასხვა პოლიტიკურ და საზოგადოებრივ წრეებში, რომელთა შორის ფრიად აღსანიშნავია იტალიაში საქართველოს ელჩის ბატონ კონსტანტინე გაბაშვილის კომენტარი: “დოკუმენტის საწყის ფორმაში მეტწილად სტუდენტთა გრძნობები და ემოციები ჭარბობდა, ხოლო მისი საბოლოო ვესია ძლიერ პოლიტიკურ დოკუმენტადაა ჩამოყალიბებული. გილოცავთ”.

საერთაშორისო კონფერენციის მონაწილენი კავკასიაზე მშვიდობისათვის, რონდინე მშვიდობის ციტადელის ("Rondine Cittadella della Pace") სტუდენტთა თანაცხოვრების წარმატებულ გამოცდილებასა და მათ მიერ გამომუშავებულ დოკუმენტზე დაყრდნობით, იღებენ ვალდებულებას, პატივი სცენ, შეინარჩუნონ ჩვენი საერთო ისტორიული და კულტურული ფესვების ფასეულობები და გაამყარონ დამაახლოვებელი მახასიათებლები, ადამიანისა და ხალხთა ძირითადი უფლებების დაცვით.

“რონდინეს 14 პუნქტი" - კავკასიაზე მშვიდობისათვის...

მშვიდობა ის საერთო სიმდიდრეა, რომელსაც შეჰნატრის კავკასიის ყოველი ერი. იგი ურთიერთთანამშრომლობით, პიროვნების პატივისცემითა და კულტურათაშორის დიალოგით აიგება.

ამ მიზნის მისაღწევად ჩვენ გთავაზობთ პროგრამის შემდეგ პუნქტებს, რომლებიც მიგვაჩნია ყველაზე მნიშვნელოვნად კონფლიქტური სიტუაციების დარეგულირებისათვის.

1) საზოგადოებრივი აზრის მხარდაჭერა კავკასიასა და მსოფლიოში, რომლებიც უბიძგებს მთავრობებს კონფლიქტში ჩართულ მხარეთაშორის მოლაპარაკებათა მუდმივმოქმედი მაგიდის შექმნისაკენ, პოლიტიკურ, ეკონომიკურ და სოციალურ სფეროში არსებული წინააღმდეგობების მშვიდობიანი გადაწყვეტის გზების გამოსამუშავებლად.

2) კავკასიის რეგიონში კონფლიქტში ჩართული თითოეული მხარისათვის მოწოდება, ნებისმიერი უთანხმოების მოლაპარაკებათა მაგიდაზე გადატანისაკენ, რათა არსებობდეს ძალის გამოყენების გარეშე კონფლიქტების გადაწყვეტის საშუალება.

3) ხელსაყრელი პირობების შექმნა, იმისთვის, რომ მოლაპარაკებათა მუდმივმოქმედი მაგიდა გარდაიქმნეს ადგილად, სადაც შესაძლებელი იქნება ყველა ძალისხმევის გაერთიანება, ჰუმანიტარული, კულტურული, ეკონომიკური და პოლიტიკური ზრდისა და განვითარებისათვის, რეგიონის ეტაპობრივი და კოორდინირებული განიარაღების იმედით.
4) რეგიონის კონფლიქტებში დაზარალებულებისათვის სოციალური სტატუსისა და უფლებების აღდგენა, დაბრუნების უფლების გათვალისწინებით ყველასათვის, ვინც ომის შედეგად იძულებული იყო დაეტოვებინა საკუთარი სახლი, ყველა მხარისათვის უსაფრთხოების გარანტიით, დიალოგისა და სხვა ნებისმიერი მშვიდობიანი საშუალებით.

5) პირობების შექმნა, რომლებიც კავკასიის სხვადასხვა ტერიტორიის საწარმოთაშორის გაამარტივებენ თანამშრომლობას და საფუძველს ჩაუყრიან ერთიანი კავკასიური ეკონომიკური სივრცის შექმნას, რომელიც ხელს შეუწყობს ეკონომიკურ ინტეგრაციასა და ადამიანების, კაპიტალის, ნაწარმისა და მომსახურეობების თავისუფალ გადაადგილებას, ამავდროულად ბუნებრივი გარემოს დაცვის გარანტიით.

6) რეგიონში საერთაშორისო პირველ რიგში ევროპული კომპანიების შემოსვლის პირობების გამარტივება, რომლებსაც სურთ თავისი წვლილი შეიტანონ კავკასიური ეკონომიკის განვითარებაში, ასევე შემუშავება ფინანსური სტიმულების გეგმისა, რომელიც რეგიონის ეკონომიკური და სოციალური განვითარებისაკენ იქნება მიმართული.

7) საერთო პროექტების განვითარება მეცნიერების, განათლებისა და კულტურის სფეროში, დიალოგისა და ტოლერანტობის მხარდასაჭერად, რომელიც საჭიროა სირთულეებისა და არასწორი აზრის გადასალახავად, რაც ერთმანეთის კარგად არცოდნაზეა დამყარებული.

8) საერთო კულტურათაშორისი პროექტების მხარდაჭერა, რომლებიც მოიცავენ ენებისა და საზაფხულო, ადგილობრივ და საერთაშორისო სკოლებსა და ბანაკებს, რომლებსაც ექნებათ შეთანხმებული პროგრამები, რომლებიც სხვადასხვა ერის წარმომადგენლებს მისცემს ერთმანეთის გაცნობის, კულტურებისა და ენების განსხვავებულობის აღქმისა და ამავდროულად შენარჩუნების საშუალებას.

9) საუნივერსიტეტო ინიციატივების მხარდაჭერა, როგორც რეგიონის შიგნით მასწავლებლებისა და სტუდენტების გაცვლითი პროგრამების ორგანიზებისათვის, ასევე კავკასიელ სტუდენტთა გასაგზავნად საზღვარგარეთის უნივერსიტეტებში, და საუნივერსიტეტო კურსებისა და კვლევითი პროექტების შესაქმნელად მშვიდობისა და კონფლიქტების გადაწყვეტის თემაზე.

10) პლურალისტური, მრავალ ენობრვი და რეგიონთაშორისი ხასიათის ტელე-რადიო არხებისა და სხვა მასობრივი საინფორმაციო საშუალებების დაფინანსება და მხარდაჭერა.

11) გაერთიანების ერთ-ერთ საშუალებად, საერთაშორისო სპორტული ღონისძიებების ორგანიზება, ხმელთაშუაზღვის თამაშების მოდელით.

12) კულტურული ინიციატივებისა და ფესტივალების "კავკასიის დღეები"-ს ჩატარება (კინომატოგრაფიის, თეატრის, ფოლკლორის, ხელოვნების, ლიტერატურის, ეთნოგრაფიის, არქეოლოგიის), რომლებიც ხელს შეუწყობენ გაცნობასა და ხაზს გაუსვამენ რეგიონის საერთო კულტურულ ფონდს, ყოველი ხალხის თავისებურებების პატივისცემით.

13) რონდინეს სტუდენტთა გამოცდილება დაედოს საფუძვლად კავკასიაში არასამთავრობო ორგანიზაციების ქსელის მოღვაწეობას, რომელიც შესაძლებელს გახდის რეგიონის ყველა ხალხთა ერთიანი ახალგაზრდული ფორუმის ჩამოყალიბებას. რის ერთ-ერთ ხელსაწყოდ შეიძლება გამოყენებულ იქნეს ინტერნეტ საიტი, რომელიც გაამარტივებს რეგიონის სხვადასხვა ენაზე ინფორმაციის გაცვლას და უზრუნველყოფს პრობლემების შესახებ ობიექტური და დამოუკიდებელი ინფორმაციის ხელმისაწვდომობას.

14) რელიგიათაშორის დიალოგის განვითარების მხარდაჭერა საერთო მშვიდობისა და ძმობისათვის.

[დავით ჭუმბურიძე, პოლიტოლოგი]

ნაურუმ ე.წ. სამხრეთ ოსეთის დამოუკიდებლობა აღიარა

ნაურუს რესპუბლიკამ ე.წ. სამხრეთ ოსეთის დამოუკიდებლობა აღიარა. როგორც ცხინვალის ინფორმაციისა და ბეჭდვითი სიტყვის კომიტეტი იუწყება, ამის შესახებ ცხინვალის რეჟიმის ლიდერმა ედუარდ კოკოითიმ ცხინვალში ქართველ უფლადამცველებთან შეხვედრაზე განაცხადა.
“ნაურუმ სამხრეთ ოსეთის დამოუკიდებლობა აღიარა. დღეს ხელი მოეწერა სამხრეთ ოსეთსა და ნაურუს შორის დიპლომატიური ურთიერთობების დამყარების შეთანხმებას. ჩვენ ურთიერთობას ყველა სფეროში განვავითარებთ”, - განაცხადა კოკოითიმ.
მისივე მტკიცებით, უახლოეს მომავალში ე.წ. სამხრეთ ოსეთის დამოუკიდებლობას კიდევ 10-მდე ქვეყანა აღიარებს. საქართველოსთან ურთიერთობა კი, კოკოითის აზრით, ახლებურად, იმის გათვალისწინებით უნდა აიგოს, რომ “სამხრეთ ოსეთი აღიარებული დამოუკიდებელი სახელმწიფოა”.
“ეს ურთიერთობები კეთილმეზობლური უნდა იყოს და მაქსიმალურად უნდა ვეცადოთ, რომ ჩვენი მოქალაქეები ამ კეთილმეზობლობით არ იტანჯებოდნენ. ეს არის ყველაზე მთავარი”, - განაცხადა კოკოითიმ.

ნატო რუსეთს თანამშრომლობას სთხოვს

ნატოს გენერალური მდივანი ავღანეთთან მიმართებაში რუსეთს თანამშრომლობას სთხოვს. მოსკოვში მყოფმა ანდერს ფოგ რასმუსენმა რუსეთის საგარეო საქმეთა მინისტრს სერგეი ლავროვს განუცხადა, რომ საერთო ინტერესებიდან გამომდინარე, წარსულში დაპირისპირებამ უშიშროების საკითხებში თანამშრომლობას ხელი არ უნდა შეუშალოს. რასმუსენი რუსეთის პრემიერ-მინისტრს ვალდიმირ პუტინს და პრეზიდენტ მედვედევს დღეს შეხვდება.

[წყარო: ამერიკის ხმა]

გალის რაიონიდან კიდევ ერთი ქართველი გაიტაცეს

გატაცების მორიგი ფაქტი მოხდა გალის რაიონში. სოფელ ნაბაკევიდან ბაჩანა ეხვაია გაიტაცეს. მისი გათავისუფლების სანაცვლოდ ოკუპატები ოჯახს 100 ათას ლარს სთხოვენ. დღეს დილით ამავე რაიონში 7 ძარცვის ფაქტი მოხდა. სოფელ მზიურში 2 ოჯახს ოკუპანტები თხილსა და ფულს სთხოვდნენ. მათ ბულუების ოჯახში დიასახლისი და მისი მეუღლე სასტიკად აწამეს. ნაბაკევში კი რუსმა ჯარისკაცებმა ოჯახებიდან საყოფაცხოვრებო ტექნიკა - ტელევიზორები და მაცივრები წაიღეს. ოკუპანტებმა თაგილონში დღეს 2 მიკროავტობუსის მგზავრებიც უკანონოდ დააკავეს.

ამ კვირის ყველაზე კითხვადი სტატიები

ყველა დროის ყველაზე კითხვადი სტატიები

ეს საინტერესოა

რედაქტორის რჩევით

ეს საინტერესოა

არქივი