მთავარი

თეა თუთბერიძე: ჯერჯერობით თავისუფალი ვარ...

თავისუფლების ინსტიტუტის წევრი, თეა თუთბერიძე,მედიით გავრცელებულ ინფორმაცია, მისი დაკავების შესახებ უარყოფს. როგორც თუთბერიძემ, „ჯეოტოპნიუსთან’ სატელეფონო საუბარში განაცხადა, გავრცელებული ხმები მისაი დაკავების შესახებ, სიმართლეს არ შეესაბამება.

– „არ ვიცი ვის დაჭირდა ამ ინფორმაციის გავრცელება. არ გამოვრიცხავ, წინასწარ ავრცელებენ ხმებს, მაგრამ ჯერჯერობით თავისუფალი ვარ და მსგავსი არაფერი მომხდარა“, – აცხადებს თუთბერიძე.

შეგახსენებთ, რომ ინფორმაცია, თეა თუთბერიძის დაკავების შესახებ, მედიით დღის მეორე ნახევარში გავრცელდა.

რუსთაველზე 8 ათასამდე ადამიანი გამოვიდა

დარბევის 2 წლისთავზე თბილისის ქუჩებში 7-8 ათასამდე ადამიანი გამოვიდა და 2007 წლის 7 ნოემბერს რეზინის ტყვიებით, რეზინის ხელკეტებით, წყლის ჭავლით დარბევა და ტელეკომპანია ”იმედში” სპეცრაზმის შეჭრა, კიდევ ერთხელ გააპროტესტა. სამოქალაქო საზოგადოების ინიციატივით, პირველ არხთან 4-5 ათასი ადამიანი შეიკრიბა და ვარაზისხევით ავლით, პარლამენტის შენობასთან მივიდა, სადაც ”ეროვნული ფორუმის” ინიციატივით შეკრებილი, 2-3 ათასი ადამიანი დახვდა. მათ ხელში პარტიული დროშები ეჭირათ.

მანამდე, პოლიტიკური პარტიების ნაწილმა, ”საქართველოს გზას” ლიდერის, სალომე ზურაბიშვილის ინიციატივით, დარბევის 2 წლისთავი დარბაზში, კონფერენციის ჩატარებით აღნიშნა, რომელსაც საქართველოში აკრედიტებული სხვადასხვა საელჩოების წარმომადგენლებთან ერთად, საფრანგეთის და გერმანიის ელჩებიც ესწრებოდნენ.

სასტუმრო ”რედისონში” გამართულ კონფერენციაზე, სალომე ზურაბიშვილმა წარმოადგინა 35-გვერდიანი ”ვარდების რევოლუციის” დაპირებები, მათი შესრულების შეფასება და საქართველოში არსებული სიტუაციის ანალიზი”; ირაკლი ოქრუაშვილის მიერ დაფუძნებული მოქალაქეთა პოლიტიკური გაერთიანება ”მოძრაობა ერთიანი საქართველოსთვის” ლიდერმა ეკა ბესელიამ, ”მიხეილ სააკაშვილის პოლიტიკური რეჟიმის თაობაზე”, 22 -გვერდიანი დასკვნა დადო;

საქართველოს კონსერვატიულმა პარტიამ, ”მიხეილ სააკაშვილის დანაშაულებრივი საქმიანობის შესახებ”, ძირითადი ბრალდებებით მიმართა საქართველოს პარლამენტის თავმჯდომარეს, პარლამენტარებს და მთავარ პროკურატურას - კონსერვატორები ითხოვენ სააკაშვილის იმპიჩმენტის პროცედურის დაწყებას, თანამდებობიდან გადაყენების მიზნით, თუ წარდგენილი ბრალდებები დადასტურდება

ძირითადი ბრალდებების ჩამონათვალი აფრასიძეების საქმით იწყება და გენერალ კობა კობალაძის დაპატიმრებით მთავრდება. სულ 14 ბრალდებაა წარმოდგენილი. ტექსტურ ვარიანტთან ერთად, კონსერვატორებმა 8-წუთიანი ფილმიც წარმოადგინეს, რომელიც (ისევე, როგორც ტექსტური ვარიანტი) შეიცავს სააკაშვილის მოქმედებების შესახებ ინფორმაციას, სათანადო მტკიცებულებებს, სავარაუდო კვალიფიკაციას და სასჯელს.

”რედისონში” გამართულ კონფერენციაზე, სიტყვით ნინო ბურჯანაძე, ეკა ბესელია, სალომე ზურაბიშვილი, კობა დავითაშვილი, კახა კუკავა… გამოვიდნენ. ეს ღონისძიება 12 საათზე დაიწყო და 14-ზე დასრულდა.

კლიმიაშვილი: ”ოპოზიცია ცდილობს გაიაზროს რა მოხდა”

”რედისონში” გამართული ღონისძიების დასარულს, სანამ ხალხი პირველ არხთან შეიკრიბებოდა, პოლიტოლოგ რამაზ კლიმიაშვილს პრესა.გე-მ რამდენიმე კითხვით მიმართა.

რაზე მიანიშნებს 7 ნოემბრის ამ ფორმით აღნიშვნა?
რამაზ კლიმიაშვილი: ძალიან მომეწონა, რომ ამას კონფერენციის სახე მიეცა. ეს ნამდვილად კარგი იდეაა. ოპოზიცია ცდილობს გაიაზროს, რა მოხდა, როგორ მოხდა და მომავალში რა უნდა მოხდეს. ის, რაც კონსერვატორებმა გააკეთეს (ვიდეომასალის წარმოდგენას ვგულისხმობ) ყველასთვის მოულოდნელი იყო. როგორც ჩანს, ცოტა ჩქარობდნენ - ხარისხი უნდა გაუმჯობესდეს, მაგრამ, ფაქტია, რომ 7 ნოემბრისთვის ამის გაკეთება აუცილებელი იყო.

ამ ვიდეომასალის ჩვენების შემდეგ, კორესპონდენტები მოვიდნენ და მკითხეს - შეფასებითი დასკვნა რატომ არ არის წარმოდგენილი, კარკულატორები თან არ გვაქვს და შეკრებითობის სახით, სასჯელი რამდენი გამოდის, ეს ვერ დავადგინეთო. სასჯელის შეკრებითობა თავად სააკაშვილმა შემოიღო და საინტერესოა, ამ 14 ბრალდებით რამდენი წელი გამოვა - 147, თუ 321?

როგორ აღიქვამს საზოგადოება, ოპოზიციის ნაწილის ასეთ რეჟიმში გადასვლას - საპროტესტო აქციების შემდეგ, კონფერენციებს?
- დღეს აქ ”ალიანსი საქართველოსთვის” არ იყო. ”ეროვნულმა ფორუმმა” გუშინ განაცხადა, რომ არ მოვიდოდა, რაც ცოტა გაუგებარია, მაგრამ მათი გადასაწყვეტია. ტელევიზიით სცადეს დასაბუთება, რაც ძალიან ლოგიკური იყო, ვიჯერებ, მაგრამ მასისთვის ეს ძნელი აღსაქმელია, რადგან მასა უფრო ემოციურადაა განწყობილი. დღეს ამ დარბაზში, ”ფორუმთან” მიმართებაში წყენა გაისმა - რატომ არ არიანო.

”ალიანსზე” არ გამოუხატავთ, ასეთი წყენა?
- ”ალიანსზე” წყენა არ ყოფილა, რადგან იმათ, ასე ვთქვათ, თავიანთი ელექტორატი ჰყავთ. აქ ვინც შეიკრიბა, ეს არის სწორედ შეურიგებლების ელექტორატი.

თქვენ ასე მიგაჩნიათ?
- მე კი არ მიმაჩნია?! - ასეა, ვიზუალურადაც და ფაქტობრივადაც. ეს არის სწორედ ის ელექტორატი, რომელიც ეთანხმება აქ წარმოდგენილ ძირითად ბრალდებებს. კენჭისყრა, რომ ჩატარებულიყო, მგონია, თავს არავინ შეიკავებდა, ყველა ფეხზე ადგებოდა და იტყოდა - მხარს ვუჭერთო.

ერთი რამის თქმა მინდა - არჩევნებს ალტერნატივა არა აქვს. რეჟიმის შეცვლა არჩევნების გარეშე არ შეიძლება. ეს რეჟიმი ზედიზედ ორჯერ ძალადობით შეიცვალა და კიდევ ერთხელ იგივეს გაკეთება, დაუშვებელია. ვიმეორებ, რეჟიმი მხოლოდ არჩევნებით უნდა შეიცვალოს, ოღონდ, ადგილობრივი არჩევნებით შეცვლილი რეჟიმი, მსოფლიოში არავის უნახავს - ეს თემა იუმორისტებისთვის უფრო საინტერესოა, ვიდრე ანალიტიკოსებითვის.

როგორ აფასებთ სამოქალაქო სექტორის მიერ ორგანიზებულ აქციას - მსვლელობის მოწყობას პირველი არხიდან პარლამენტამდე?
- ეს არ არის პოლიტიკური პარტიების დღე, ეს უბრალო ადამიანების დღეა, იმათი, ვინც 7 ნოემბერს დაშავდნენ, ვისთვისაც 2007 წლის 7 ნოემბერი იყო სულში ჩაფურთხება. ორი წლის წინ, ეს იყო უბრალო, ელემენტარული, პოლიტიკური პროტესტი, ძალიან მშვიდი, წყნარი და გამომდინარე აქედან, დარბევის არანაირი მიზეზი არ არსებობდა. არ იქნებოდა სწორი, დარბევის წლისთავზე ხალხისთვის პოლიტიკურ პარტიებს დაეძახათ.

რუსთაველზე ხალხი თვითონ, ყოველგვარი დაძახების გარეშე უნდა გამოსულიყო. მე სრულიად არ მჭირდება, რომელიმე პოლიტიკური პარტიის დაძახება. 2007 წლის 7 ნოემბრის დარბევა ჩემთვის სრულიად აღმაშფოთებელი გახლდათ. მე ”იმედის” დარბევაში, ზუსტად შუაგულში მოვყევი და ეს ყველაფერი, ხელისუფლების მიერ, იმდენად მარაზმამდე იყო მიყვანილი, რომ ამჯერად, ვისაც მოქალაქეობრივი მოვალეობა აქვს, ის დღეს რუსთაველზე უნდა გამოვიდეს.

თქვენი აზრით, რამდენი ათასი ადამიანი შეიძლება გამოვიდეს, დღევანდელ საპროტესტო აქციაზე?
- არ ვიცი, ვერ ვიწინასწარმეტყველებ. აქ, ამ ადგილას (რესპუბლიკის მოედანი) 13 იანვარს, 200-300 ათასი კაცი იდგა, მაშინ როცა, იმ დღეს უმაგალითო ყინვა იყო. დღეს მეც ძალიან მაინტერესებს რამდენი ადამიანი მოიხდის მოქალაქეობრივ მოვალეობას.

მსვლელობა პირველი არხიდან პარლამენტამდე

სასტუმრო ”რედისონში” გამართული ღონისძიების შემდეგ, პოლიტიკური პარტიების ლიდერები, პირველ არხისკენ გაემართნენ, სადაც მოძრაობა ”7ნოემბრის” (ჯაბა ჯიშკარიანი, დაჩი ცაგურია, ირაკლი კორძაია), ”გადაარჩინე სიცოცხლეს” (იური ვაზაგაშვილი, ჯამბულ გამცემლიძე, სოსო რობაქიძე), ”ყოფილი პოლიტპატიმრები ადამიანის უფლებებისთვის” (ნანა კაკაბაძე, გელა ნიკოლაიშვილი), ჟურნალისტური გაერთიანება ”ობიექტივის” (ირმა ინაშვილი), ”კანონი ხალხისთვის” (ზაქარია ქუცნაშვილი), ”სამართალი და თავისუფლებას” (ირაკლი სესიაშვილი), ”ქართული აკადემიის” (თემურ ნანეიშვილი, ნინელი ჭანკვეტაძე, ნუკრი ქანთარია), ადვოკატთა პროფკავშირების (ზაზა ხატიაშვილი), ”საზოგადოებრივი დარბაზის” (ვახო ბეგიაშვილი) და ეროსი კიწმარიშვილის ინიციატივით, პარლამენტის შენობისკენ, ვარაზისხევის ავლით მსვლელობა მოეწყო.

ამ მანიფესტაციის დროს, ოპოზიციური პოლიტიკური პარტიის ლიდერები ხალხში იდგნენ. ”ალიანსი საქართველოსთვის” წარმომადგენლებმა, რომლებიც ”რედისონში” არ გამოჩენილან, მსვლელობაში მონაწილეობა მიიღეს. მსვლელობას, ქართულ მედიასაშუალებებთან ერთად, უცხოური საინფორმაციო საშუალებებიც აშუქებდნენ.

პარლამენტის წინ, სიმბოლური კედლის ფონზე (ნამდვილი კედლის აშენება დაგეგმილი იყო, მაგრამ დღევანდელ აქციაზე ამის გაკეთება ვერ შეძლეს), სიტყვით გამოსვლის, დიპკორპუსისა და საქართველოს ხელისუფლების სახელზე გაკეთებული მიმართვის შემდეგ, აქციის ლიდერებმა და მონაწილეებმა, ხელისმოწერები და ხელის სიმბოლური ანაბეჭდები დატოვეს, ქვაშვეთის ტაძარში გადაინაცვლეს და ქართველი ერის ერთიანობის პარაკლისი გადაიხადეს.

[ნინო მიქიაშვილი, presa.ge]

სამოქალაქო საზოგადოებამ აშშ-ს ელჩის სახელზე მიმართვის ტექსტი მიიღო

პარლამენტთან შეკრებილმა სამოქალაქო საზოგადოების წარმომადგენლებმა მიმართვის ტექსტი გაავრცელეს, რომელიც აშშ ელჩის სახელზეა შედგენილი.
სამოქალაქო საზოგადოება მიმართავს აშშ საელჩოს, როგორც სტრატეგიული პარტნიორის წარმომადგენლობას საქართველოში, მაქსიმალური ძალისხმევა გამოიჩინოს და მოსთხოვოს საქართველოს ხელისუფლებას აშშ სტრატეგიული თანამშრომლობის ქარტიის სრულფასოვანი შესრულება.
ასევე, შეასრულოს ყველა ის ვალდებულება, რაც საქართველომ აღნიშნული დოკუმენტით აშშ–სა და მთელი საერთაშორისო საზოგადოების წინაშე იკისრა.
მიმართვაში აღნიშნულია, რომ აშშ ვიცე–პრეზიდენტმა, ჯოზეფ ბაიდენმა საქართველოში ოფიციალური ვიზიტის დროს, პარლამენტში გამოსვლისას მკაფიოდ გამოხატა ქართველი ხალხისა და საქართველოს სახელმწიფოსადმი ამერიკის ახალი ადმინისტრაციის მხარდაჭერა.
ამასთან, როგორც მიმართვაშია აღნიშნული, ბაიდენმა ისიც განაცხადა, რომ საქართველოში რეალური დემოკრატიული ცვლილებების მისაღწევად საჭიროა აღმასრულებელი, საკანონმდებლო და სახელისუფლო შტოებს შორის გაწონასწორებული ბალანსის აღდგენა და გადაწყვეტილებების მიღების გამჭვირვალე მექანიზმის ჩამოყალიბება. ასევე, სასამართლოსა და მედიის გათავისუფლება სახელისუფლო კონტროლისა და წნეხისგან; ქვეყანაში ნორმალური და ჯანსაღი კონკურენციისთვის, აუცილებელია საარჩევნო გარემოს შექმნა, ოპოზიციისთვის პოლიტიკურ პროცესებში ჩართვის ქმედითი მექანიზმების შემუშავება და ამ მექანიზმის პრაქტიკული რეალიზაცია.
ოპოზიციის მიმართვის მიხედვით, ბაიდენმა სიტყვით გამოსვლისას ისიც აღნიშნა, რომ ამის გარეშე საქართველო ვერ შეძლებს, ერთი მხრივ, საერთაშორისო დემოკრატიული სტანდარტების დაკმაყოფილებას, ევროპულ და ევროატლანტიკურ სივრცეში ინტეგრირებას, ხოლო მეორე მხრივ - ვერ განვითარდება სახელმწიფოებს შორის საერთო ინტერესებზე დაფუძნებული მჭიდრო პარტნიორული თანამშრომლობა.
როგორც მიმართვაშია აღნიშნული, ბაიდენის ვიზიტის შემდეგ სამ თვეზე მეტი გავიდა და ქართველი საზოგადოება ვერ გრძნობს საქართველოს ხელისუფლების სურვილს, ქვეყანაში პრაქტიკულად განახორციელოს მეგობარი და პარტნიორი ქვეყნის ინიციატივები.
“გვსურს კიდევ ერთხელ მივაპყროთ თქვენი ყურადღება იმ გარემოებას, რომ ავტორიტარული მართვით ხელისუფლებას ქვეყანა ნაბიჯ-ნაბიჯ მიჰყავს ფართომასშტაბიანი დესტაბილიზაციისკენ, რომელიც რეალურად საფრთხეს უქმნის ქართველი ხალხის სწრაფვას ქვეყანაში დასავლური ფასეულობების დამკვიდრებისკენ”, – აღნიშნულია მიმართვაში.

თეა თუთბერიძე დააკავეს

შს–მ თეა თუთბერიძე დააკავა. როგორც „ღია ბოოქლომს“ აცნობეს დაუდასტურებელი ინფორმაციით თუთბერიძე დღეს 16 საათზე პატრიარქისთვის მორალური ზიანის მიყენების ბრალდებით დააკავეს. ამ დროისთვის თუთბერიძესთან დაკავშირებას, მისი ახლობლებიც ვერ ახერხებენ. შინაგან საქმეთა სამინისტროს კი ოფიციალური კომენტარი ჯერ არ გაუკეთებია.

READ MORE - თეა თუთბერიძე დააკავეს

ანალიზი – მედიის მდგომერეობა სამეგრელოში

გაზიარება

სამეგრელოში სიტყვის თავისუფლების გამოხატვის ხარისხი თითქმის ნულს უტოლდება. რეგიონში არსებული მედიასაშუალებები ნებით თუ უნებლიედ ხელისუფლების გავლენის ქვეშ იმყოფებიან. ზუგდიდში მოქმედი დამოუკიდებელი ტელერადიოკომპანია „ოდიში“ რაიონის გამგებლის, ალექსანდრე ქობალიას პირადი საკუთრებაა, შესაბამისად ამ მაუწყებლის ეთერით გავრცელებული ინფორმაცია მიკერძოებული და ტენდენციურია. იქ მომუშავე ჟურნალისტები კი ხელისუფლების მხრიდან განხორციელებულ ზეწოლას არ უჩივიან. „ბედს“ შეგუებული ჟურნალისტები გამგეობის კორპორაციული ნომრებით „დამსახურებულად“ სარგებლობენ, რომ არაფერი ვთქვათ იმ რეპორტაჟებზე, რომლებიც ხშირად „მადლობა ალექსანდრე ქობალიას“ სრულდება.

რადიო „ათინათი“, რომელიც მსმენელს საათში ერთხელ აწვდის დღის მთავარ ამბებს, ცდილობს ე.წ. ბალანსი დაიცვას, თუმცა ჩანს, რომ მათი ჟურნალისტური თავისუფლება იქ მთავრდება, სადაც ხელისუფლების ინტერესები იკვეთება.

უფრო რთული და საგანგაშო მდგომარეობაა ცენტრალური ტელეარხების (1-არხი, რუსთავი2, იმედი) კორესპონდენტებთან დაკავშირებით. მათ მიმართ უნდობლობა საზოგადოებაში მუდმივად არსებობს და იგი პირველ რიგში იმ დეზინფორმაციებს უკავშირდება, რომელიც პროფესიონალიზმისა და ჟურნალისტური ეთიკის ყოველგვარ ნორმებს სცილდება...

თავისუფალი აზრის გამოხატვით და კრიტიკით არც ბეჭდური მედია გამოირჩევა. არსებობენ ერთის მხრივ, ჟურნალ-გაზეთები, რომლებიც პირდაპირ ხელისუფლების დაკვეთით გამოიცემა და რედაქციების უმეტესი ნაწილი სამთავრობო შენობებშია განთავსებული და მეორეს მხრივ, ერთადერთი ჟურნალი, „ღია ბოქლომი“, რომელიც სიტყვის თავისუფლებისა და საკუთარი უფლებების დაცვას დიდი ზეწოლის ქვეშ ახერხებს.
„ღია ბოქლომის“ რედაქტორი, ილია ჩაჩიბაია ხელისუფლებისა და პოლიციის მხრიდან ძალადობის მსხვერპლი არაერთხელ გამხდარა.

ჩაჩიბაიას მიმართ განხორციელებული დევნის ფაქტები საქართველოს სახალხო დამცველისა და ამერიკის სახელმწიფო დეპარტამენტის დასკვნებშიც არაერთხელ ასახულა.

2007 წლის 4 დეკემბერს, გუბერნატორ ზაზა გოროზიას კაბინეტში დატყვევებულ ჩაჩიბაიას სახელმწიფო მოხელის დაცვის უფროსმა, დიმიტრი მარკოიძემ და პრესსამსახურის უფროსმა, ლალი გელენავამ ფიზიკური და სიტყვიერი შეურაცხყოფა მიაყენეს და გოროზია წინააღმდეგ გავრცელებული ინფორმაციის წყაროს დასახელება აიძულეს...

2008 წლის 27 იანვარს კონსტიტუციური უსაფრთხოების თანამშრომლებმა (ვახტანგ გაბელია) ჩაჩიბაიას სახის გამოსახულებით ქალის სხეულზე დამონტაჟებული შიშველი ფოტოები გაავრცელეს. პლაკატზე გაკეთებული წარწერის მიხედვით ჟურნალისტი კლიენტებს ინტიმურ მომსახურეობას შეღავათიან ფასებში სთავაზობდა...

2008 წლის 17 იანვარს, ამ დრომდე დაუდგენელმა პირებმა ილია ჩაჩიბაია გაიტაცეს და ქალაქის გარეუბანში რამდენიმე საათით დაატყვევეს. გამტაცებლებმა იგი სცემეს და ჟურნალისტისგან ხელისუფლების მიმართ კრიტიკული სტატიების გამოქვეყნების შეწყვეტა მოითხოვეს.

ამ ფაქტებს გახმაურებული სასამართლო პროცესები მოჰყვა, ოღონდ არა დაზარალებული ჟურნალისტის სარჩელებს, არამედ გუბერნატორ გოროზიას საჩივარს, რომელიც ჩაჩიბაიას მისი საქმიანობის წინააღმდეგ გამოქვეყნებული სტატიის გამო სასამართლოში უჩივლა და მორალური ზიანის ანაზღაურების მიზნით 10 000 ლარი მოითხოვა. გოროზიამ ეს პროცესი წააგო...

2009 წლის 9 მაისს ზუგდიდის ცენტრალურ საავადმყოფოში პოლიციის თანამშრომლებმა ილი ჩაჩიბაია სცემეს, ხოლო „პრესა.გე“ ჟურნალისტს, ნანა ფაჟავას და რადიო „მწვანე ტალღის“ კორესპონდენტს, სოსო ხოფერიას სიტყვიერი შეურაცხყოფა მიაყენეს და აპარატურა დაუზიანეს. ჟურნალისტები პოლიციის მიერ სასიკვდილოდ დაჭრილი ჯიმი მეგრელიძის ახლობლებსა და სამართალდამცავებს შორის მომხდარი დაპირისპირების გასარკვევად მივიდნენ...

2008 წლის 26 მაისს სოსო ხოფერია და ნანა ფაჟავა თბილისი-სენაკის საავტომობილო მაგისტრალზე, სოფელ თეკლათთან შეიარაღებული პირების მიერ განხორციელებული თავდასხმის მსხვერპლნი გახდნენ. ხუთმა ნიღბიანმა შეიარაღებულმა პირმა ავტომატის კონდახით იმ მიკროავტობუსის მინები ჩაამსხვრია სადაც ჟურნალისტები ისხდნენ. ხოფერიამ და ფაჟავამ სხეულის მსუბუქი დაზიანებები მიიღეს.

მიუხედავად იმისა, რომ სენაკის პოლიციაში მომხდარ თავდასხმასთან დაკავშირებით ს. ს. საქმე აღიძრა, გამოძიებას დღემდე ეჭვმიტანილები არ ჰყავს. ჟურნალისტები კი მიიჩნევენ, რომ თავდასხმა შსს თანამშრომლებმა წინასწარ დაგეგმილი სცენარის მიხედვით განახორციელეს.

2008 წლის 21 მაისს, საპარლამენტო არჩევნების დღეს, „რადიო იმედისა“ და „ადამიანის უფლებათა ცენტრის“ ჟურნალისტს, ნანა ფაჟავას აბაშის საოლქო საარჩევნო კომისიის თავმჯდომარემ და კომისიის წევრებმა ნორიოს საარჩევნო უბანში ფიზიკური და სიტყვიერი შეურაცხყოფა მიაყენეს. ჟურნალისტური საქმიანობისთვის ხელის შეშლის ფაქტზე სამეგრელოში პირველად აღიძრა ს. ს. საქმე, მაგრამ სენაკის რაიონულმა სასამართლომ საქმის განხილვა იმ მოტივით შეწყვიტა, რომ თითქოს ჟურნალისტს აბაშის რაიონში ჟურნალისტური საქმიანობის განხორციელების უფლება არ ჰქონდა...

2009 წლის 9 მაისს, ზუგდიდში, დადიანისეულ სასახლეში სამთავრობო გასვლითი სხდომის მიმდინარეობის დროს ზუგდიდისა და სამხარეო პოლიციის თანამშრომლებმა ტერიტორიაზე მხოლოდ ფაჟავა არ შეუშვეს, მაშინ როცა შენობაში ცენტრალური ტელევიზიების ყველა წარმომადგენელი იმყოფებოდა... პოლიციელებმა, ზაზა ხასაიამ და ლაშა ექონიამ ჟურნალისტს ჯერ ფიზიკური და სიტყვიერი შეურაცხყოფა მიაყენეს, ხოლო შემდეგ ეზოდან გააძევეს...

2006 წლის 30 აგვისტოს, ზუგდიდის ბაზრის მიმდებარე ტერიტორიაზე სამხარეო პოლიციის უფროსის, მერაბ გერგაიას მითითებით პოლიციის თანამშრომლებმა ნანა ფაჟავა ცემეს, წაართვეს მობილური ტელეფონი, რომლითაც პოლიციელების მხრიდან გარემოვაჭრეზე განხორციელებულ ძალადობას ასახავდა...

ხელისუფლების ზეწოლის შედეგად, 2004 წლის 3 მარტს და 2008 წლის 23 ივლისს „ტელე-იმედიდან“ და „რადიო-იმედიდან“ ნანა ფაჟავა კორესპონდენტის თანამდებობიდან უკანონოდ გაათავისუფლეს...

ინტერნეტ თავდასხმა ქართულ სააგენტოზე...

საინფორმაციო სააგენტო „GeoTopNews”-ის ინტერნეტ გვერდი ჰაკერებმა გატეხეს. როგორც „ღია ბოქლომს“ სააგენტოს რედაქტორმა რომან კევნიშვილმა აცნობა პორტალზე ახალი ამბების განთავსება ვერ ხერხდება. მისი თქმით საფუძვლიანია ეჭვი, რომ ვებ–გვერდი მწვავე სტატიების გამო კიბერ შეტევის ობიექტი გახდა.

"ვვარაუდობთ, რომ შეფერხება როგორც ბოლო დროს ჩვენს მიერ გავრცელებულ მასალებს, ასევე 7 ნოემბრის თარიღის მოახლოებას უკავშირდება. ჩვენი სისტემური ადმინისტრატორი, ამ დრომდე უშედეგოთ ცდილობს საიტის „ადმინპანელის“ ჩართვას, გვერდის განახლების მიზნით." –ამბობენ „ჯეოტოპნიუსის“ ჯგუფის წევრები.

პუტინსა და მედვედევს შორის დაპირისპირებამ კრიტიკულ ზღვარს მიაღწია

ბლოგერმა მედვედევმა თავის ბლოგში განათავსა ვიდეომასალა სახელწოდებით: ”ეროვნული ტრაგედიების ხსოვნა ისეთივე წმინდათა წმინდაა, როგორც ხსოვნა გამარჯვებების შესახებ”. პრეზიდენტმა მასში მწუხარება გამოთქვა იმის შესახებ, რომ ”რუსეთში ბევრმა დაივიწყა სტალინური ”წმენდების” საშინელება. აქვე, იგი გამოვიდა ინიციატივით იმის შესახებ, რომ მთელი ქვეყნის მასშტაბით გაგრძელდეს იმ პერიოდის მსხვერპლთა მასობრივი სამარხების ძებნა. პარალელურად კი, შეიქმნას სამუზეუმო–მემორიალური ცენტრები რომლებიც იმ პერიოდში ხელისუფლების მიერ ჩადენილი სიმხეცეების მოძიება – გამოაშკარავებაზე იმუშავებენ.

- ”დღემდე, შეიძლება მოისმინოთ, რომ ეს მსხვერპლი გამართლებული იყო რაღაც მითიური, სახელმწიფოს კეთილდღეობის დიადი მიზნებისთვის. მაგრამ არაფერი შეიძლება იყოს იმაზე უფრო დიადი და მნიშვნელოვანი, ვიდრე ადამიანის სიცოცხლეა”, – განაცხადა რუსეთის პრეზიდენტმა.

ეს ვიდეომასალა მედვედევის ბლოგში, რუსეთში პოლიტიკური რეპრესიების მსხვერპლთა ხსოვნის დღეს გაჩნდა. თუ გავიხსენებთ, რომ პუტინისა და მისი ხელისუფლების მხრიდან სტალინის მიმართ დამოკიდებულება აშკარად ბევრად უფრო ლოიალური იყო ვიდრე ელცინის პერიოდში, ნათელი გახდება, რომ მედვედევის მხრიდან ეს ვიდეობლოგი და მასში გაკეთებული განცხადებები სხვა არაფერი თუ არა: ერთის მხრივ პუტინისგან დისტანცირების მცდელობა, ხოლო მეორე მხრივ – მესიჯი დასავლეთისთვის იმის შესახებ, რომ ის მართლაც თანამედროვე მმართველია და ლიბერალების მოლოდინები ბოლომდე გაცრუებული არ არის.

29 ოქტომბერს, ”თაიმსში” გამოქვეყნდა სტატია სახელწოდებით: ”ლიბერალები მედვედევის იმედს კარგავენ, რადგან პუტინის დაბრუნების მოლოდინი გაჩნდა” . მედვედევის ბლოგში ეს მასალა სწორედ იმედგაცრუებული ლიბერალების გამხნევების მცდელობად შეიძლება ჩაითვალოს.

ბოლო პერიოდში, მედვედევის მხრიდან პუტინისგან დისტანცირებისა და მისგან რადიკალურად განსხვავებულ ლიდერად წარმოჩენის მცდელობები იმდენად ხშირია, რომ მათი ჩამოთვლა შორს წაგვიყვანს. მთლიანობაში, რუსულ დუმვირატში ვითარება უკვე იმდენად დაძაბულია, რომ ამის დანახვისთვის ღრმა ანალიზიც აღარ არის საჭირო. მხოლოდ მოვლენათა ქრონოლოგიას უნდა მივადევნოთ თვალი.
დაძაბულობის კიდევ ერთი, ხილული ეტაპი მევედევის საპროგრამო სტატიით დაიწყო.

10 სექტემბერს რუსეთის პრეზიდენტმა რუსულ ინტერნეტ–გამოცემებში სტატია გამოაქვეყნა სათაურით ”რუსეთო, წინ!” ეს, მისი საპროგრამო ხედვა გახლდათ. პრეზიდენტის თქმით, ნოემბერში, სახელმწიფო სათათბიროში სიტყვით გამოსვლისას, ის სწორედ ამ პრობლემებზე გააკეთებს განსაკუთრებულ აქცენტს. მანამდე კი, ნებისმიერ მსურველს შეეძლო თავისი შესწორება შეეტანა დოკუმენტში –უფრო ზუსტად, თავისი წინადადებები მიეწოდებინა ქვეყნის პირველი პირისთვის. იქვე, მითითებული გახლდათ ინტერნეტ საფოსტო ყუთის მისამართი, რომელზეც მოსახლეობას თავისი მოსაზრებების თუ შენიშვნების გაგზავნა შეეძლო. სანამ თავად სტატიაზე ვისაუბრებთ, ერთი საინტერესო დეტალი უნდა აღინიშნოს.

ექს–პრეზიდენტი პუტინი თითქმის არ ეკარება კომპიუტერს; ინტერნეტის კი, ლამის ცრუმორწმუნესავით ეშინია. მისთვის თანამედროვე ტექნიკაცა და ტექნოლოგიებიც ე.წ. ნანოტექნოლოგიებით იწყება და მთავრდება. სხვათაშორის, ამ ტერმინის არსი როგორც თავად რუსეთში, ასევე მსოფლიოშიც, ცოტას თუ ესმის. რაც შეეხება მედვედევს...ის ინტერნეტის აქტიური მომხმარებელია: მისი დილა პირადი საფოტო ყუთის შემოწმებით იწყება; როგორც ვთქვით, არის ბლოგერიც – ამ რამდენიმე დღის წინ, მის ბლოგს უკვე ერთი წელი შეუსრულდა. ამ ყველაფრის გათვალისწინებით, ჯერ კიდევ სტატიის შინაარსის გააზრებამდე შეიძლება ითქვას, რომ მედვედევის მხრიდან, ნაშრომის ინტერნეტში განთავსებაც კი ნათლად მეტყველებს პუტინისგან დისტანცირების მცდელობაზე.

ახლა რაც შეეხება სტატიას...
შემთხვევითი არ იყო, რომ დასავლურმა მედიამ მას ასეთი შეფასება მისცა: -”მედვედევი ღიად აკრიტიკებს მმართველობის რუსულ სისტემას”. ასეთი სახელწოდებით გამოქვეყნდა სტატია ”უოლ სთრით ჯორნალში”.

- ”თავისი საპროგრამო სტატიით, პრეზიდენტმა მედვედევმა ნათლად გამოხატა პრემიერ–მინისტრ ვლადიმერ პუტინისგან დისტანცირების სურვილი. მის წერილში ჩამოთვლილია რუსეთისთვის აუცილებელი ცვლილებები და მკვეთრად არის გაკრიტიკებული პუტინის მიერ შექმნილი სისტემა” – ნათქვამი იყო სტატიაში.

მართლაც, მედვედევის საპროგრამო წერილში გარკვევით იკითხებოდა სამი მიმართულება.
პირველი – პუტინის მიერ შექმნილი მმართველობის სტილის საკმაოდ გამჭვირვალე კრიტიკა და ამის საშუალებით, მისგან დისტანცირების სურვილი.

მეორე – ხმამაღალი განაცხადი დამოუკიდებლობაზე: მედვედევმა ჩამოთვალა დღევანდელი რუსეთის პრობლემები, დასვა კითხვები და იქვე თქვა: ”მე მაქვს პასუხები ამ კითხვებზე!” ეს უკვე აშკარა პრეტენზიაა მოქმედების თავისუფლებაზე.

მესამე – სამწუხაროდ, მედვედევმა ვერც ამჯერად გაბედა პუტინის მიერ წლების განმავლობაში წარმატებით აპრობირებულ რიტორიკაზე უარი ეთქვა და წინამორბედისგან თვისობრივად განსხვავებულ პოლიტიკურ მოთამაშედ წარმოჩენილიყო. მაგალითად, სტატიაში იყო ასეთი მონაკვეთი:

- ”რუსეთს არაერთხელ გაუწევია მფარველობა მცირე ერებისთვის როდესაც ისინი დაპყრობის ან საერთოდაც, ფიზიკური განადგურების საფრთხის წინაშე იყვნენ. ასე იყო სულ ახლახანს, როდესაც სააკაშვილის რეჟიმმა სამხრეთ ოსეთზე დანაშაულებრივი თავდასხმა განახორციელა. რუსეთს არაერთხელ გაუცამტვერებია მსოფლიო ბატონობაზე პრეტენზიების მქონეთა ავანტურისტული გეგმები”.

ამ სტატიით მედვედევმა მსოფლიო მედიის ყურადღება მიიპყრო. პუტინმა ამას ვერ გაუძლო. უკვე მეორე დღეს, 11 სექტემბერს, ცნობილ ”ვალდაის კლუბში”, ექსპერტებთან შეხვედრისას, რუსეთის პრემიერმა იმისთანა განცხადება გააკეთა, რომ მედვედევი ყველას დაავიწყდა.

– ”2007–2008 წ.წ. ხლისუფლების გადაცემა უმტკივნეულოდ გახორციელდა. 2012 წელს ჩემსა და მედვედევს შორის კონკურენცია არ იქნება – ჩვენ ერთნაირი პოლიტიკური შეხედულებები გვაქვს; ერთი სისხლის ვართ და 2012 წელს ერთად ვიფიქრებთ. გავიტვალისწინებთ იმ დროისთვის სექმნილ რეალობას, ჩვენს პირად გეგმებს, პოლიტიკურ ლანდშაფტს... და მივიღებთ გადაწყვეტილებას” – განაცხადა პუტინმა.

გარდა მისი ღია, პირდაპირი შინაარსისა, რუსეთის პრემიერის ამ განცხადებაში კიდევ ერთი, თითქოს ფარული დეტალია ძალიან საინტერესო: ეს იყო პირველი შემთხვევა, როდესაც რუსული დუუმვირატის ერთობას, მათ ”ერთ სისხლს” ხაზი პუტინმა გაუსვა. აქამდე ამას მედვედევი აკეთებდა ხოლმე. ამით ის, თითქოს, ერთი მხრივ ერთგულებას უმტკიცებდა პუტინს, ხოლო მეორე მხრივ წინამორბედის საქმის გამგრძელებლობას უსვამდა ხაზს.

მთლიანობაში, 10 სექტემბერს დაწყებული რუსული პოლიტიკური ”პინგ–პონგი” ძალიან სახალისო საყურებელია: ჩაწოდება მედვედევისგან – პასუხი პუტინისგან...ჩაწოდება პუტინისგან – მედვედევის საპასუხო სვლა და ა.შ.

პუტინის ”საკლუბო გამოხტომაზე” მედვედევის პასუხმაც არ დაახანა. პრემიერის განცხადებიდან ზუსტად მეორე დღეს, 12 სექტემბერს, დასავლელ ექსპერტებთან შეხვედრისას, რუსეთის პრეზიდენტმა 2012 წლის საპრეზიდენტო არჩევნებში მონაწილეობა არ გამორიცხა:

– ”არასოდეს მიფიქრია პრეზიდენტობაზე, მაგრამ ბედმა ასე განსაზღვრა. თუ კარგი პრეზიდენტი ვიქნები, რატომაც არა? მე არაფერს გამოვრიცხავ” – მედვედევის მხრიდან ასეთი განცხადება უკვე პუტინის წინააღმდეგ მიმართულ ღია ბუნტს ჰგავს. ასეთი გამოსვლა კონკრეტული უპირატესობების – ძალოვან უწყებებში, ეკონომიკურ ბლოკში და ა.შ – გარეშე, წარმოუდგენელია. არადა, ღიად და გაცხადებულად, მთავრობაში მედვედევის მხოლოდ ერთი კადრია: ვიცე–პრემიერი იგორ შუვალოვი. საინტერესოა, რომ ცვლილებებს მოწყურებული დამოუკიდებელი რუსული მედია ამ შუვალოვს ხან პრემიერ–მინისტრ პუტინის შემცვლელად ასახელებს ხანაც, მოსკოვის მერის, იური ლუჟკოვის...”

მიუხედავად დამოუკიდებელი მედიის ამ ლამის, კეთილი სურვილებისა, ჯერ–ჯერობით ქვეყნის შიგნით გავლენებისა და ძალაუფლების ბერკეტების ფლობის თვალსაზრისით, მედვედევს საკმაოდ მძიმე მდგომარეობა აქვს.

– ”თქვენ ვიცე–პრემიერი შუვალოვი ახსენეთ...დღეს მე მგონი ის ერთადერთი შუვალოვიც აღარ ჰყავს. გარდა ამისა, მინისტრთა კაბინეტის გარდა, რუსეთში სერიოზული გავლენა აქვს ეროვნულ უშიშროების საბჭოს და იქაც საკმაოდ სუსტია მედვედევის პოზიციები” – ამბობს პოლიტიკური ექსპერტი კახა კაციტაძე.

ოქტომბრის დასაწყისში, რუსეთში ადგილობრივი თვითმმართველობის ორგანოების არჩევნები ჩატარდა. მათი შედეგებით, პუტინის პარტიამ ”ედინაია რასსიამ” ხმათა 80% მიიღო. აღშოთებულ ე.წ. საპარლამენტო ოპოზიციას –”ლიბერალ–დემოკრატიული პარტია”, ”სპრავედლივაია რასსია” და ”კომუნისტები” – ოპოზიციონერის სტატუსი გაახსენდა. ერთობლივად, ერთდღიანი დემარში მოაწყეს, სათათბიროს სხდომათა დარბაზი დატოვეს და მედვედევთან შეხვედრა მოითხოვს.

– ”რაოდენ პარადოქსულადაც უნდა ჟღერდეს, მედვედევის მხარდამჭერებად გამოდიან არა იმდენად ”ედინაია რასია” რამდენადაც ოპოზიციონერები. გავიხსენოთ ზუგანოვის ბოლო ინიციატივა, როდესაც საპარლამენტო ოპოზიციამ მედვედევთან შეხვედრა მოითხოვა... ეს თავისთავად, ძალიან საინტერესო ფაქტი იყო. განსაკუთრებით, იმის გათვალისწინებით, რომ როგორც ამბობენ, ოპოზიციის ამ დემარშში მედვედევის ადმინისტრაციის ერთ–ერთი უმაღლესი პირის, სურკოვის ხელი ერია. რაც შეეხება ”ედინაია რასსიას”, თუ ისინი თავისუფალი არჩევანის წინაშე დადგნენ, უმრავლესობა აირჩევს პუტინს, უმცირესობა – მედვედევს” – ამბობს კაციტაძე.

თუ გავითვალისწინებთ, რომ ნოემბერში პრეზიდენტში სახელმწიფო სათათბიროში ტრადიციულად ყოველწლიური სიტყვით უნდა გამოვიდეს, ეს ”ოპოზიციური ბუნტი” ძალიან ჰგავდა მედვედევთან ვაჭრობის მცდელობას. ექსპერტი ამ მოსაზრებას არ ეთანხმება.

– ”იმდენად ვაჭრობას ვერ ვიტყვით რამდენადაც იმას, რომ დუმაში მედვედევის პოზიციების გამყარების მცდელობა იყო. ვაჭრობის დასაწყებად საჭიროა, რომ მედვედევს რაღაცის მიცემა შეეძლოს... დღეს კი, ჯერ კიდევ გასარკვევია რისი მიცემა შეუძლია მედვედევს”– ამბობს კახა კაციტაძე.

პუტინსა და მედვედევს შორის დაპირისპირება ყველაზე თვალშისაცემი მაინც, ამერიკასთან ირანის ბირთვული განიარაღების საკითხში ურთიერთობისას ხდება ხოლმე. ასე მაგალითად, 23 სექტემბერს ამერიკელ კოლეგასთან შეხვედრის შემდეგ, ირანის წინააღმდეგ სანქციების შემოღებასთან დაკავშირებით განაცხადა:
– ”სანქციები რეალური შედეგების მომტანი არ არის ხოლმე, მაგრამ ხანდახან ისინი აუცილებელია”.

პუტინის პასუხმა ცოტა დააგვიანა, მაგრამ ისეთ დროს გაისმა როცა ყველაზე უფრო მტკივნეული იქნებოდა არამარტო ამერიკისთვის, არამედ, მედვედევისთვისაც.

13–14 ოქტომბერს მოსკოვს ამერიკის სახელმწიფო მდივანი, ჰილარი ქლინთონი სტუმრობდა. ამ დროს პუტინი ე.წ. ”შოს”–ის ხელშეკრულების (შანხაის ურთიერთთანამშრომლობის ორგანიზაცია) ქვეყნების მორიგ შეხვედრაზე იმყოფებოდა პეკინში. სწორედ იქ განაცხადა მან, რომ ”ირანის წინააღმდეგ სანქციების ამოქმედება ნაადრევია”.

ეს ერთის მხრივ თითქოს, პუტინსა და მედვედევს შორის არსებულ დაპირისპირებაზე მიუთითებს ხოლო მეორე მხრივ, რიგ სერიოზულ საკითხებთან დაკავშირებით, რუსეთის საბოლოო პოზიციის გარკვევას თითქმის შეუძლებელს ხდის და ქვეყანას ლავირების შესაძლებლობას აძლევს. სწორედ ამიტომაც გაჩნდა დასავლურ მედიაში მოსაზრება, რომ შესაძლოა სინამდვილეში დაპირისპირება არც არსებობს და მედვედევ–პუტინი უბრალოდ ძალიან კარგად დადგმულ ”ბოროტი–კეთილი პოლიციელის” პიესას ასრულებენ. ქართველი ექსპერტი ამ მოსაზრებას არასერიოზულად მიიჩნევს.

– ”არა, ეს სისულელეა. ასე ამბობდნენ, გორბაჩოვისა და ელცინის შესახებაც, დაპირისპირება არ არის, როლებს თამაშობენო. დრომ აჩვენა, რომ მათ შორის მართლაც იყო სერიოზული წინააღმდეგობა. ასე რომ ეს ”ბოროტი–კეთილი პოლიციელის როლების” თამაშის თეორია ყურით მოთრეულად მეჩვენება”– აცხადებს კაციტაძე.

მართლაც, მთელი რიგი ფაქტორებისა და მოვლენათა გათვალისწინებით, პუტინ–მედვედევის დაპირისპირება აშკარად რეალურად გამოიყურება. ამის გათვალისწინებით, შეიძლება ითქვას, რომ მასში ძალიან სერიოზულ ცვლილებებს შეიტანს და მნიშვნელოვან აქცენტებს გააჩენს ნოემბერ–დეკემბრისთვის დაგეგმილი ორი ღონისძიება. პირველი უკვე ვახსენეთ: პრეზიდენტის სიტყვით გამოსვლა სახელმწიფო სათათბიროში. მალევე, დეკემბერში პუტინის პარტიის ”ედინაია რასსიას” ყრილობაც გაიმართება. ეს ორი მოვლენა და მათი შედეგები ბევრ კითხვას გასცემს პასუხს. მაგალითად ასეთებს: როგორ აპირებს რეალური ძალაუფლების ანუ დამოუკიდებლობის მოპოვებას მედვედევი? როგორ აპირებს რეალური ძალაუფლების ბერკეტების ანუ 2012 წელს პრეზიდენტის პოსტზე დაბრუნების შესაძლებლობის შენარჩუნებას პუტინი? და ასევე: ვინ ლიდერობს დუუმვირატში მოცემული მომენტისთვის? ეს, სამომავლოდ. დღეისათვის კი ექსპერტის თქმით, უპირატესობა პუტინის მხარესაა.

- ”მოდით ასე ვთქვათ: ჯერ–ჯერობით, მიუხედავად იმისა რაც უკვე ვთქვი, ტენდენცია ნელია, მაგრამ მედვედევის სასარგებლო, მაგრამ მთლიანობაში სერიოზული გარდატეხა ჯერ არ მომხდარა. უპირველეს ყოვლისა კი საკადრო სფეროში. მოცემულ მომენტში პუტინის გავლენა აღემატება მედვედევისას. პრაქტიკულად, მედვედევი ვერც ძალოვან ბლოკს აკონტროლებს და ვერც ეკონომიკურს” – მიიჩნევს კახა კაციტაძე.

[მანანა აბაშიძე, presa.ge]

შსსს თანამშრომლის მამა, ვანოს შვილის მკვლელის მფარველობაში ადანაშაულებს

თბილისში, 15 თვის წინ მოკლული ლევან ოდიკაძის მამა, შინაგან საქმეთა მინისტრს, ვანო მერაბიშვილს მკვლელის მფარველობაში ბრალს სდებს და აცხადებს, რომ მისი შვილის მკვლელობის ბურუსით მოცულ საქმეში, ”სანამ ესენი იქნებიან, არაფერი გაირკვევა”.

25 წლის ლევან ოდიკაძის განზრახ მკვლელობის მუხლით აღძრულ საქმეში, ოფიციალური ვერსია ჯერჯერობით არ არსებობს, მაგრამ მოკლულის მამას, ნოდარ ოდიკაძეს აქვს თავის ვერსია, რომელიც მან პრესა.გე-სთან შეხვედრისას ასე ჩამოაყალიბა:

- ”2008 წლის 7 აგვისტოს ღამეს დედას მობილური ტელეფონით ელაპარაკა. მოგეხსენებათ 7-ში საქართველოში რა ხდებოდა. შიდა ტელეფონით რატომ არ მირეკავო, - ჰკითხა დედამ და აქ ისეთი ამბავია, ზოგი მკვდარი მოჰყავთ, ზოგი დაჭრილიო, - მიუგო. არანაირი შანსი არ არსებობს, გარდა ერთისა, რომ ჩემი შვილი ზემდგომის მითითებით მოკლეს. ე.წ. მოდულში დაინახა რაღაც ისეთი, რაც არ უნდა დაენახა და მოკლეს. აბა სხვა რა უნდა ვიფიქრო?!”

ლევან ოდიკაძე შსს-ს გარე პერიმეტრის დაცვის სამმართველოში მსახურობდა - ე.წ. მოდულის შენობას იცავდა. 2008 წლის 8 აგვისტოს დილას, სამსახურიდან სახლისკენ გაემართა, მაგრამ ვერ მიაღწია, 11 აგვისტოს, თბილისის პატარა და დიდი ზღვის შესართავთან, თემქის ტერიტორიაზე არსებულ მთის ძირში, ნაძვნარში, მწყემსებმა ლევან ოდიკაძის ცხედარი იპოვეს, რომელიც მისივე კუთვნილ ”ჟიგულის” მარკის ავტომანქანაში ესვენა.

განზრახ მკვლელობის (108-ე) მუხლით აღძრულ საქმეს, შსს-ს თბილისის მთავარი სამმართველოს დეტექტივების სამმართველო იძიებს. საქმის მასალებს მოკლულის მშობლებსა და მათი უფლებების დამცველ ადვოკატს, გელა ნიკოლაიშვილს, მათივე განმარტებით, არ აცნობენ.

საქმის ვითარების ირგვლივ, მათ ხელთ არსებული ერთადერთი დოკუმენტია, დეტექტივების სამმართველოდან, 2009 წლის 7 აგვისტოს, სახალხო დამცველის ოფისში გაგზავნილი სს №001083577-ზე საქმეზე შედგენილი ცნობა, რომელშიც აღწერილია მოკლულის მეგობრების, თანამშრომლების, თვითმხილველების დაკითხვის დეტალები, ჩატარებული ექსპერტიზების შედეგები, მოკლულის კუთვნილი მობილური ტელეფონის სიმბარათზე დაფიქსირებული შემავალი და გამავალი ზარები…

როგორც რვაგვერდიანი ცნობიდან ჩანს, თბილისის ზღვაზე, 8 აგვისტოს, დაახლოებით 15 საათზე, გაშლილ სუფრასთან და იქვე დანთებულ ცეცხლთან, 7 მამაკაცი ქეიფობდა, რომელთაგან ერთ-ერთი ლევან ოდიკაძე იყო. სუფრაზე საუბრის დაძაბვის შემდეგ, სუფრის ერთ-ერთ წევრს მოშორებით გაუყვანია ის პიროვნება, რომელსაც ქამარში იარაღი ჰქონია ჩადებული.

რამდენიმე წუთში, ჩხუბის და 2 გასროლის ხმის შემდეგ, სუფრის დანარჩენი წევრებიც იქ მისულან, ჩხუბი რამდენიმე წუთს გაგრძელებულა. გ. ადეიშვილს, რომელიც თბილისის ზღვაზე მსხვილფეხა რქოსან პირუტყვს მწყემსავდა, დაუნახია თავში ქვის ჩარტყმით როგორ მოკლა ლევან ოდიკაძე ვინმე ლადომ.

- ”მათ სავარაუდოდ გვამი მანქანის უკანა სავარძელზე დაუსვამთ და თავისივე ავტომანქანით წაუყვანიათ თემქის მიმართულებით. მანამდის კი, სიკვდილით დამუქრებიან შემსწრე გ. ადეიშვილს და მიწაზეც წაუქცევიათ. ადეიშვილი აცხადებს, რომ ვინმე გიორგის და იარაღიანი მამაკაცის ამოცნობა შეუძლია”, - წერია შსს-დან სახალხო დამცველის აპარატში გაგზავნილ 8-გვერდიან ცნობაში.

მკვლელობიდან 4 თვის შემდეგ, ადეიშვილი დანაშაულის შეუტყობინებლობის მუხლით (376-ე) დააკავეს, გაასამართლეს და 7 თვის შემდეგ, საპროცესო შეთანხმების საფუძველზე გაათავისუფლეს.

ლევან სამხარაულის სახელობის სასამართლო ექსპერტიზის ეროვნული ბიუროს მიერ ჩატარებულ, 2008 წლის 4 სექტემბრით დათარიღებულ დასკვნაში, ლევან ოდიკაძის სიკვდილის მიზეზად მითითებულია: ”ქალა-ტვინის ბლაგვი ტრავმა, სახისა და ქალის ფუძის ძვლების მრავალფრაგმენტოვანი მოტეხილობით… აღნიშნული დაზიანებები განვითარებულია რაიმე მკვრივი, ბლაგვი საგნის მოქმედების შედეგად და განეკუთვნება დაზიანებათა სიცოცხლისათვის სახიფათო მძიმე ხარისხს, რასაც შედეგად მოჰყვა სიკვდილი”.

ნოდარ ოდიკაძე: - ”შსს-ში მუშაობა 2008 წლის იანვარში დაიწყო და 8 თვე ვერ გაძლო. ხშირად იმეორებდა - მამა, ეს სად მოვედიო, მაგრამ არაფერს აკონკრეტებდა. მოდულის შენობას 80 ჯარისკაცი იცავდა. ლევანი ცვლის უფროსი იყო, სამ დღეში ერთხელ მორიგეობდა. 2008 წლის 7 აგვისტოს, ომი რომ დაიწყო, მორიგე იყო. გვაინტერესებდა ომში ხომ არ წაიყვანეს და ჩემი მეუღლე ელაპარაკა.

-”არ მივდივართ, ყაზარმულზე გადაგვიყვანეს და ყოველ მეორე დღეს სახლში მოვალ, დავიბან და უკან დავბრუნდებიო”, - უთხრა დედას. 8-ში შეიცვალა. მეუღლემ დამირეკა - გაიგე როგორ არის, მოდის თუ არა სახლშიო.

დილით დავურეკე და ”რა მოგივიდათ?! მოვდივარ, სახლთან ვარო”, - მითხრა, მაგრამ აღარ მოვიდა.

ეს ზარი ამოშლილია და რატომღაც აღარ ფიგურირებს, ისევე, როგორც მის ტელეფონში შემავალი კიდევ ერთი ზარი - ვიდეოთვალიდან ამოღებულ კადრებში ჩანს, ე.წ. თათრების ბაზრობასთან, გაჩერებულ მანქანაში, 10 წამის განმავლობაში როგორ ელაპარაკება ვიღაცას, ვინც სავარაუდოდ იქიდან წაიყვანა.

მეორე დღეს, ანუ 9 აგვისტოს გზებზე დაყენებული ვიდეოთვალის მეშვეობით გავარკვიეთ, რომ ისან-სამგორის რაიონში, ჯავახეთის ქუჩამდეა მოსული, თათრების ბაზრობას, რომ ეძახიან, აი, იმ ადგილამდე. ჩვენ ვაზისუბნის დასახლებაში ვცხოვრობთ. ჯავახეთის ქუჩიდან მანქანის კვალი იკარგება”.

მოკლულის მამა ამბობს, რომ არ სჯერა იმ ვერსიების, რომელსაც სამართალდამცავები მასთან საუბრის დროს ახმოვანებდნენ, რომ ვითომ თბილისის ზღვაზე, ტოტალიზატორში მომხდარი გაუგებრობის გასარჩევად ავიდა.

- ”მგონია რომ ეს საქმე შეკერილია. ტოტალიზატორში ერთი ლარი არ დაუდევს, არასდროს და ამ ვერსიას გამოვრიცხავ. თავიდან ადვოკატი ჩემი შვილის სამსახურმა დამინიშნა. ის მეუბნებოდა, ”აქ ქალის ამბავიაო” და 5 თვე გამაცდინა. შემდეგ გელა ნიკოლაიშვილი ავიყვანეთ და ახლა ის იცავს ჩვენს უფლებებს. მერაბიშვილმა ჭიანჭველა სად დადის, ეს იცის და ჩემი შვილი ვინ და რატომ მოკლა, ეს ვერ დაადგინეს?! მით უმეტეს, მისი უწყების თანამშრომელი იყო, მაგრამ ჩემი აზრით, ამის დადგენას, არც არავინ აპირებს.

ერთხელ შალვა ნათელაშვილმა ბრიფინგი ჩამატარებინა, გელა ნიკოლაიშვილი ტელევიზიით გამოვიდა და ამ საქმეზე ილაპარაკა, მაგრამ მაინც არავინ მაქცევს ყურადღებას. შემდეგ იური ვაზაგაშვილის ოფისში მივედი და ღმერთი უშველის, თავისი შესაძლებლობის ფარგლებში დამეხმარა - ახალგაზრდა იურისტთა ასოციაციაში დარეკა და შეიძლება ამ საქმეში ისინიც ჩაერთნონ.

ბატონ იურის ჩემი შვილის ფოტო მივუტანე, დიდ პლაკატს აკეთებს. ყოპველ აბათ-კვირას შვილმკვდარი მშობლები ვიკრიბებით. ”გადაარჩინე სიცოცხლეში” გაერთიანებას ვაპირებ, მეტი აღარაფერი დამრჩენია, ერთადერთი ბიჭი ხელიდან წამგლიჯეს.

- ”იმიტომ კი არა, რომ ჩემი შვილია?! მტერი ვერ უპოვეს, უპატიოსნესი კაცი იყო. რისთვის, რატომ მომიკლეს? ამაზე გამცენ პასუხი, სხვა არაფერი მინდა. ფიზკულტურის ინსტიტუტი დაამთავრა, მანამდე სპეციალური საფეხბურთო სკოლა. ნაკრებში თამაშობდა. მინისტრ მერაბიშვილისგან მადლობაც აქვს მიღებული. მიხეილ სააკაშვილი ხშირად ამბობს, ჩვენს თანამშრომელს რამე რომ მოუვიდეს, ამას ვიზამთ, იმას ვიზამთო და რატომ არ აკეთებენ არაფერს? დაინტერესება ხომ უნდა იყოს?! ჩემი შვილის მკვლელობიდან წელიწადი და 3 თვე გავიდა. ბოლო 6 თვე არავინ შემხმიანებია.

28 ოქტომბერს გამომძიებელმა - დამირეკა მობრძანდითო. მივედი და მეკითხებიან: ”რამე ვერსია ხომ არ გაქვთ? ეზოში მეზობლები, მეგობრები ხომ არ ჭორაობენ რაიმესო?” წარმოგიდგენიათ, რა კითხვებს მისვამენ?! ეს საქმე პროკურატურიდან კონტროლზეა აყვანილი და იმის გამო შემეხმიანნენ, რომ საბუთებს მტვერი არ ადევს. ეგ იყო და ეგ, მეტი არაფერი”.

ნოდარ ოდიკაძემ სამ მეგობარ პარლამენტარს დახმარება სთხოვა. სამივე მათგანი ”ნაცმოძრაობის” წევრია. მათგან ერთ-ერთი შს მინისტრს შეხვდა. ამ უკანასკნელის დაპირება ასეთი ყოფილა - ”მკვლელს მიწიდან ამოვიღებთო”, მაგრამ, მოკლულის მამა ამბობს, რომ შს მინისტრი მკვლელს მიწის ზემოდანაც არ ეძებს, რადგან, ალბათ, ის არის, რომლის მხილებაც ამ უწყებას ხელს არ აძლევს, ან მისი 25 წლის შვილი ”ზემოდან” წამოსული დავალებით მოკლეს, რადგან, მისივე განმარტებით, როგორც ზემოთ აღვნიშნეთ, ის დაინახა, რაც არ უნდა დაენახა. ნოდარ ოდიკაძის სატელეფონო ზარებს პარლამენტარი მეგობრები აღარ პასუხობენ; მოკლულის მამა ფიქრობს, რომ ალბათ სიმართლე გაიგეს, არაფრის გაკეთება არ შეუძლიათ და მასთან საუბარს თავს არიდებენ.

ადვოკატ გელა ნიკოლაიშვილის განმარტებით, სამართალდამცავები საქმის მასალების გაცნობაზე უარს იმ მოტივით ეუბნებიან, რომ გამოძიება მიმდინარეობს და კანონში არ წერია, რომ მასალები დაზარალებულ მხარეს, ანუ მოკლულის მშობლებსა და მათი უფლებების დამცველ ადვოკატს უნდა გააცნონ.

გელა ნიკოლაიშვილი: ”წერია რომ საქმის მასალებს მხარე უნდა გაეცნოს, მაგრამ დაზარალებულიც, რომ მხარეა, ესენი ასე არ თვლიან. პოლიციელი რომ იყო ამ მკვლელობაში ჩარეული, ეს აშკარაა, რადგან შეუძლებელია სამოქალაქო ტანსაცმელში გამოწყობილი ადამიანი იარაღს გამოსაჩენად ატარებდეს, თუ პოლიციელი არ არის. მწყემსის გადმოცემით, ერთ-ერთს იარაღი ჰქონდა.

ამოცნობაც შეუძლია, მაგრამ ვეჭვობთ რომ მას უთხრეს არ უნდა ამოეცნო ის თანამშრომელი, რომელსაც იარაღი ჰქონდა. ამ მკვლელობაში ვიღაც ისეთია ჩარეული, რომლის გამოჩენაც ხელს არ აძლევთ, მალავენ. ანდა, თავის შეწუხება და სიმართლის დადგენა არ უნდათ”.

[ნინო მიქიაშვილი, presa.ge]

რა ხდება საქართველო-სომხეთის საზღვარზე?

საქართველო-სომხეთის საზღვარზე მომხდარ ინციდენტთან დაკავშირებით გავრცელებულ ინფორმაციას საქართველოს სასაზღვრო უწყება არ ადასტურებს.

როგორც ”ინტერპრესნიუსს” სასაზღვრო პოლიციის პრესსამსახურში განუცხადეს, ქართველ და სომეხ მესაზღვრეებს შორის ინციდენტზე გავრცელებული ინფორმაცია სიმართლეს არ შეესაბამება. არასწორია, ასევე, ინფორმაცია, თითქოს სასაზღვრო უწყების ხელმძღვანელი ზაზა გოგავა შემთხვევის ადგილზე ჩავიდა.

ინციდენტის შესახებ დღეს სომხური და აზერბაიჯანული სააგენტოები იუწყებოდნენ.

მათი ცნობით, საზღვარზე სომხური მხარე ცდილობდა სასაზღვრო ბოძების დადგმას, თუმცა ისინი ქართული მხრიდან წინააღმდეგობას წააწყდნენ. უფრო მეტიც, საზღვრის მახლობლად ქართული სამხედრო ნაწილიც გამოჩნდა.

- ”სიტუაცია იმდენად დაიძაბა, რომ ადგილზე საქართველოსა და სომხეთის სასაზღვრო სამსახურების ხელმძღვანელი პირები მივიდნენ. მოგვიანებით ინციდენტი განიმუხტა”,-იუწყებიან სომხური და აზერბაიჯანული სააგენტოები.

[ინტერპრესნიუსი]

ჯვარი აქაურობას – მამა ბუასილმა ახალი ვიდეორგოლი გაავრცელა[video]

თეა თუთბერიძის facebook–ზე "მამა ბუასილის" ახალი ვიდეორგოლი გამოჩნდა კომენტარით : "აი ესეც , მაგრამ მე "მოხუცის მძევალნი" უფრო მომწონს :))))))))))))))))))))))))))))))))))".

აქვე ორიოდ სიტყვით მოგახსენებთ "ღია ბოქლომის" პოზიციას, ჩვენი რედაქცია უარყოფითად აფასებს პატრიარქის მიმართ წამოწყებულ შეყურაცმყოფველ კამპანიას...

საქართველოს საპატრიარქოს საპასუხო განცხადება[video]

Facebook-ის სკანდალი - რელიგიურ-პატრიოტული ისტერია...

Facebook-ის სკანდალი - რელიგიურ-პატრიოტული ისტერია თუ ბრძოლა სიტყვის თავისუფლებისთვის

საქართველოს მთავრობა იმ ვიდეო-კლიპებთან დაკავშირებით, რომლებიც Facebook-ზე გამოქვეყნდა და რომელიც შეურაცხმყოფელი იყო საქართველოს მართლმადიდებლური ეკლესიის პატრიარქისთვის, გამოძიებას ატარებს. კლიპებმა საქართველოში საფუძველი დაუდო დებატებს, გამოხატვის თავისუფლების საზღვრების შესახებ.

ვიდეო, რომელიც YouTube-ზე ”მამა ბუასილმა” გამოაქვეყნა, პროსამთავრობო ანალიტიკური ორგანიზაციის, ”თავისუფლების ინსტიტუტი”-ს თავმჯდომარის თეა თუთბერიძის Fაცებოოკ-ის გვერდზე დაიდო. თეა თუთბერიძემ განაცხადა, რომ მან ვიდეო იმ დისკუსიის ფარგლებში გამოაქვეყნა, რომელიც მასწავლებლების ჯგუფთან ილია მეორის გამოსვლის შემდეგ დაიწყო. ამ შეხვედრაზე ილია მეორემ მასწავლებლებს უთხრა, რომ რუსეთთან 2008 წლის ომი შეცდომა იყო, რომლის თავიდან აცილებაც შეიძლებოდა. კლიპში, რომელმაც ყველაზე მეტად მიიპყრო ყურადღება, პატრიარქის გამოსახულებაზე დადებული ხმა მკრეხელური გამოთქმებით მსმენელებს მოუწოდებდა, ერთად წასულიყვნენ და სააკაშვილი (გამოთქმა წაშლილია).

”კლიპის წარმოებასა და გავრცელებაზე ოფიციალური გამოძიება 1 ნოემბერს დაიწყო,” - განაცხადა ხათუნა იოსავამ, გენერალური პროკურორის ოფისის სპიკერმა. ”გამოძიების დაწყება იმან განაპირობა, რომ კლიპების საკითხი საზოგადოებისთვის საინტერესო იყო,” - ამბობს იოსავა.

ილია მეორე, ალბათ, საქართველოში ყველაზე გავლენიანი საჯარო ფიგურა და ქვეყნის ნაციონალური იდენტობის ძლევამოსილი სიმბოლოა.

ორი პიროვნება, რომელთა იდენტობაც იუსტიციის სამინისტროს ვებ-საიტზეა გაცხადებული, სკოლის მასწავლებელი და სტუდენტი, დაკითხვაზე 1 ნოემბერს მიიყვანეს. საიტზე გამოქვეყნებული ინფორმაციის თანახმად, ასევე ამოღებულია კომპიუტერული აღჭურვილობაც. თუთბერიძემ EურასიაNეტ-ს განუცხადა, რომ კლიპებთან დაკავშირებით ისიც დაკითხეს.

გენერალური პროკურორის სპიკერმა, იოსავამ განაცხადა, რომ ოფიციალურად კრიმინალური გამოძიება ჯერ არ დაწყებულა და დასძინა, რომ ჯერ არავინ დაუპატიმრებიათ, მაგრამ დამატებით ისიც აღნიშნა, რომ გამოძიება ”აჩვენებს”, იარსებებს თუ არა ვინმეს დაპატიმრების საფუძველი.

ილია მეორის სპიკერმა EurasiaNet-ს განუცხადა, რომ გამოძიება ეკლესიის სურვილით არ დაწყებულა.

”ჩვენ მათთვის საქმის გახსნა არ გვითხოვია,” - განაცხადა მამა დავით შარაშენიძემ და დასძინა, რომ არც კი იცოდა გამოძიების დაწყების შესახებ.

ვიდო-კლიპების შესახებ უფრო ადრე გაკეთებულ განცხადებაში ილია მეორემ მორწმუნეებს მოუწოდა, რომ ამ ”სისულელეებისთვის” არ მიექციათ ყურადღება. ის ასევე, ამტკიცებდა, რომ კლიპების მიზანი იყო ეკლესიისადმი რწმენის შელახვით, ”ძირი გამოეთხარა საქართველოს სახელმწიფოებრიობის საფუძვლებისთვის”.

თუთბერიძე გამოძიებას ”სრულ აბსურდს” და უსაფუძვლოს უწოდებს.

”ამ ვიდეოებში არაფერია კრიმინალური, - ამბობს ის, - ეს ყველაფერი სიტყვის თავისუფლების გამოხატულებაა… რასაც საქართველოს კანონი იცავს”. დაახლოებით 200 პიროვნება მის მხარდასაჭერად დარეგისტრირდა მისი Facebook-ის გვერდზე, აცხადებს თუთბერიძე.

პირველი ნოემბრის დებატები, რომლებიც თუთბერიძისა და პატრიარქის მხარდამჭერებს შორის უნდა გამართულიყო, გაურკვეველი მიზეზებით გაუქმდა.

საზოგადოებრივი აზრი ამ უთანხმოებასთან დაკავშირებით მკვეთრად გაიყო, რადგან თემა ქართულ საზოგადოებაზე რუსულ გავლენასაც შეეხო. ქართული მართლმადიდებლური ეკლესიის კრიტიკოსებს დიდი ხანია ეჭვი შეაქვთ დემოკრატიული ღირებულებებისადმი მის ერთგულებაში. ისინი ასევე ცუდი თვალით უყურებენ ქართული ეკლესიის ძლიერ სულიერ კავშირებს რუსეთის მართლმადიდებლურ ეკლესიასთან.

ქართულ-რუსული ეკლესიების კავშირების შესახებ კითხვების გაჩენას, ილია მეორის მიერ ოქტომბერში გაკეთებულმა კომენტარმაც შეუწყო ხელი. მაშინ მან განაცხადა, რომ შეიძლებოდა რუსეთთან 2008 წლის ომის თავიდან აცილება. ზოგიერთი ექსპერტის აზრით, პატრიარქის სიტყვები პრეზიდენტ მიხეილ სააკაშვილისათვის დარტყმა იყო. ეკლესიის წარმომადგენლები მთელი ძალით უარყოფენ, რომ ქართულ-რუსული ეკლესიების მჭიდრო კავშირებმა გავლენა მოახდინა პატრიარქის პოზიციაზე.

საქართველოს ბევრ გაღატაკებულ რეგიონში, საქართველოს პატრიარქისადმი მხარდაჭერა ძლიერია. იქ ილია მეორე, რომელიც 1977 წლიდანაა პატრიარქი, ქართული სუვერენიტეტის დამცველად განიხილება და მიჩნეულია, რომ მისი ღირსება თავდასხმებისგან დაცული უნდა იყოს - თუნდაც ვიდე-ოკლიპების ავტორების პატიმრობითაც კი.

თბილისში ამ საკითხთან დაკავშირებით აზრი უფრო გაყოფილია. ჟურნალ ”ლიბერალ”-ში გამოქვეყნებულ კომენტარში ნათქვამია, რომ კლიპების გამო ატეხილმა ”რელიგიურ-პატრიოტულმა ისტერიამ აპოგეას” მიაღწია. განსხვავებული აზრისადმი შემწყნარებლობის მოწოდებით, ავტორი თავის თავს სომეხს, აფრიკელს, ჩინელს, თურქ-მესხს, ჰომოსექსუალს და ლესბოსელს უწოდებს, ანუ იმ ჯგუფების სახელებს, რომელთაც ქართულ საზოგადოებაში ხშირად აყენებენ სიტყვიერ შეურაცხყოფას”. სტატიის ავტორი ბასილ კობახიძეა, ყოფილი მართლმადიდებელი მღვდელი.

გია ნოდია, პოლიტოლოგი და სააკაშვილის მთავრობის განათლების ყოფილი მინისტრი მათ შორისაა, ვინც ვიდე-ოკლიპების საქმის გამოძიებამ შეაშფოთა. ის ამტკიცებს, რომ გამოძიება სერიოზულ დარტყმას აყენებს საქართველოში ”სიტყვის თავისუფლებას”.

ეს პიველი ნაბიჯია, რომელიც მთავრობამი ინტერნეტის თავისუფლების წინააღმდეგ გადადგა და იმ პრეცედენტის შექმნას ცდილობს, რომ შეიძლება გამოძიების საფუძვლად კონკრეტული ადამიანის ღირსება განიხილებოდეს, - განაცხადა ნოდიამ, - ეს ორივე შემთხვევაში ძალიან ცუდი პრეცედენტია.

"პატრიარქის გამო" დაკავებული ახალგაზრდები გაათავისუფლეს

სრულიად საქართველოს კათოლიკოს პატრიარქის, ილია მეორის გაშარჟებული ვიდეორგოლების დამზადებისა და ინტერნეტით გავრცელების ფაქტზე დაკავებული ორი ახალგაზრდა გაათავისუფლეს. როგორც “ჯეოტოპნიუსს” “თავისუფლების ინსტიტუსტის” წევრმა, თეა თუთბერიძემ აცნობა, მათ ”მამა –ბუასილობა” არ დაუმტკიცდათ. აქვე თუთბერიძემ, ერთერთი ახალგაზრდის მამის მონაყოლიც მოგვაწოდა, რომელიც პროკურატურამ და შსს-მ ე.წ. “მამა ბუასილის” საქმეზე დაკითხა.

–”ჯერ დარეკეს, იკითხეს გიორგი, მე ვუთხარი, რომ მეზობელთან იყო გასული და მალემოვიდოდა. ერთი საათის შემდეგ კიდევ დარეკეს, ისევ გიორგი იკითხეს, გიორგი უკვე სახლში იყო, არ უთქვამთ ვინ იყვნენ. 5 წუთში ამოვიდნენ, ექვსი კაცი შემოვიდა სახლში თითქმის ძალით. არაფერი არ აუხსნიათ, მოგვიანებით გაგარკვევთ რაშია საქმე, უნდა წამოვიდესო! არ უთქვამთ რატომ უნდა წასულიყო გიორგი. ბუნებრივია წინააღმდეგობა გავუწიე, არც იმას ამბობდნენ ვინ იყვნენ. ერთ-ერთი, ვისაც ნომერი ჰქონდა მიმაგრებული, ( ნომერი 08223) ვინმე ზურაბ პავლიაშვილი იყო. ზოგი უშიშროებიდან, ზოგიც მთაწმინდის პოლიციიდან, ზოგიც კი პროკურატურიდან იყვნენ. მივედით ძველი თბილისის პროკურატურაში, რკინიგზის სამამართველოს პირდაპირ. მე გამომკითხეს ჩემი სარწმუნოება, რა მწამს, დავდივარ თუ არა ეკლესიაში, სად დავდივარ და როგორ დავდივარ, ერთი სიტყვით ყველაფერი. რატომ მეკითხებითმეთქი, –”სატანისტებთან აქვს თქვენს შვილს კავშირი, მერე გაიგებთო. ბევრი აბდა–უბდა ლაპარაკის შემდეგ, გიორგი დაკითხვაზე შეიყვანეს. ნაცნობ ადვოკატს დავურეკე, ვთხოვე მოსულიყო. მალევე მოვიდა, მაგრამ ის არ შეუშვეს დაკითხვაზე. დაკითხვის დროს გიორგის უთქვამს, რომ კომპიუტერი ჰქონდა სახლში. ჩემი შვილი კომპიუტერულ ფირმაში მუშაობს, პროგრამისტია. რომ გაიგეს პროგრამისტი იყო, გამოვიდნენ და მითხრეს, სახლში უნდა წამოვიდეთ თქვენთან და კომპიუტერი ამოვიღოთო. არ წამოვყევი, იმიტომ რომ ბავშვი არ მინდოდა დამეტოვებინა. შვიდი კაცი შემოსულა სახლში, მეუღლე მარტო იყო, მთელი სახლი გაუჩხრეკიათ, ბოლოს დისკები და კომპიუტერი წამოიღეს”.

– პოლიციას ჰქონდა ჩხრეკის ორდერი?

–”არანაირი სანქცია, არაფერი არ წარმოუდგენიათ ჩემი მეუღლისთვის. ჩემი სამუშაო ნოუთბუქი და ციფრული ფოტო აპარატიც წაიღეს, არაფერი არ დაუტოვებიათ. ორი ძველი ვინჩესტერი წამოიღეს, , ძველი კომპიუტერები ჰქონდა ჩემს შვილს, რაც ნახეს ყველაფერი მოკრიბეს და აღარაფერი აღარ დაუტოვებიათ. ყოველგვარი მტკიცებულების გარეშე დაგვაწიოკეს, როგორც ბანდიტური დაჯგუფება ისე დაგვესხნენ თავს, წაიღეს ეს კომპიუტერები, წავიდნენ და დაიკარგნენ. ვის მივმართოთ? ისიც ვიფიქრე შინაგან საქმეთა მინისტრისთვის მიმემართა, რადგან იქ იყო სოდიც, უშიშროებაც, მთაწმინდის პოლიციაც და პროკურატურაც. ყველანი გაქრნენ, ეხლა როგორ მოვიქცე არ ვიცი უკვე”,–ამბობს გირგის მამა.

ნიჭიერი

შოუს შესახებ

Got Talent ფრენჩაიზი ბრიტანული ტელეფორმატია, რომელიც სიმონ კოუელის კომპანია SIYO-მ შეიმუშავა. დღესდღეობით შოუ 30-ზე მეტ ქვეყანაში გადის. 2010 წლის პირველი თებერვლიდან კი ამ ქვეყნების სიას საქართველოც შეემატება – შოუს ჩვენთან “ნიჭიერი” ჰქვია.

“ნიჭიერის” შესარჩევი კასტინგი საქართველოს 24 ქალაქში ჩატარდა და მონაწილეობა დაახლოებით 7 ათასმა ადამიანმა მიიღო.

შოუში არ არის ასაკობრივი შეზღუდვა – “ნიჭიერის” ყველაზე პატარა მონაწილე – 3 წლის, ხოლო ყველაზე ასაკოვანი – 86 წლისაა.

“ნიჭიერი” ერთადერთი შოუა, სადაც კასტინგებს ესწრება ცოცხალი აუდიტორია.

პირველი ეტაპი

მონაწილე წარსდგება დარბაზისა და ჟიურის წინაშე. ნომრის მიმდინარეობისას ჟიურის წევრებს შეუძლიათ გამოხატონ უკმაყოფილება და დააჭირონ წითელ იქსს. თუ სამივე იქსი წითლად აინთო, ამ შემთხვევაში ნომერი წყდება.

ჟიური მონაწილეს აფასებს ერთი სიტყვით: “კი” ან “არა”. შემდეგ ტურში გადასასვლელად მონაწილემ უნდა მიიღოს ორი ან სამი “კი”.

მეორე ეტაპი

პირველი ტურის დასრულების შემდეგ ჟიურის სამივე წევრი საბოლოო გადაწყვეტილების მისაღებად იკრიბება. ისინი კიდევ ერთხელ გადახედავენ იმ კონკურსანტებს, რომლებმაც წარმატებით გაიარეს პირველი ტური და გადაწყვეტენ, იმსახურებს თუ არა ესა თუ ის მონაწილე ნახევარფინალში მოხვედრას.

ნახევარ-ფინალი

“ნიჭიერის” 5 ნახევარ-ფინალი კონცერტის სახით გადაიცემა პირდაპირ ეთერში. თითო ნახევარ-ფინალიდან ფინალში გადადის ორი მონაწილე: ერთი ის, ვინც ყველაზე მეტ ხმას დააგროვებს კონკურსის მსვლელობისას, ხოლო მეორე ფინალისტს ჟიური შეარჩევს.

ფინალი

ნახევარ-ფინალებში გამარჯვებული 10 კონკურსანტი ერთმანეთს ფინალურ კონცერტზე შეხვდება. ამჯერად მათი ბედი მთლიანად მაყურებლის ხელთაა – “ნიჭიერის” გამარჯვებული და ბინის მფლობელი ის მონაწილე გახდება, რომელიც ყველაზე მეტ ხმას მიიღებს.

6 თებერვალი

”კოპირებამ” რა ჰქმნა

ამ ბლოგზე ნებისმიერ ადამიანს აქვს საკუთარი აზრის დაფიქსირების საშუალება. გასული კვირის მანძილზე თქვენ უამრავი კომენტარი დაწერეთ და ჩვენი ბლოგერების ზოგი კრიტიკული, ზოგი არც ისე პოსტებიც წაიკითხეთ.

ეს პირველი სატელევიზიო პროექტია, რომელსაც ამხელა ინტერნეტ-მხარდაჭერა აქვს, პროექტის შემქმნელებიც აქტიურად ადევნებენ თვალს აქ დაწერილ კომენტარებს და ფეისბუქის გვერდზე გამოხმაურებებს. შეიძლება ძნელი დასაჯერებელია, მაგრამ ისინიც ადამიანები არიან და საკუთარი აზრის გამოთქმის სურვილი გაუჩნდათ. ამიტომ დღეს “ნიჭიერის” გუნდის ერთ-ერთი წევრის, პირობითად “იქაურის” პოსტს გთავაზობთ:

ამ პოსტის დაწერას “მაიძულებს” სხვადასხვა სოციალურ ქსელებში, ფორუმებზე და ჩვენს ბლოგზე ატეხილი ისტერიკა, თითქოს გულნაზი გოლეთიანი “აიღეს” “ნიჭიერის” შემქმნელებმა და მისგან სუზან ბოილი “გამოაცხვეს”… ზოგიერთის ფანტაზია ყოველგვარ საზღვარსაც ცდება და ამტკიცებს, თითქოს ქალბატონ გულნაზის ხიშტის ძალით აჭამეს ხაჭაპური. ინტერნეტში უკვე დაწყევლეს და შეაჩვენეს ოპერატორი, რომელმაც კადრი გადაიღო და მემონტაჟე, ვინც ეს ისტორია გააკეთა.

კარგი ის არის, რომ ოპერატორმაც და მემონტაჟემაც ხეზე დააკაკუნეს და წყევლა აცდათ, ცუდი კი ის არის, რომ კონსტრუქციული კრიტიკა გასული ერთი კვირის მანძილზე ძალიან, ძალიან ცოტა იყო.

ზოგი “იღწვის”;

ზოგი წვალობს:

ზოგს ვერ გაუგია საერთოდ რა უნდა:

“ან ეს მაყურებელი ყველაფერზე ტაშს რატომ უკრავს?”

და სანამ ხალხმა იცის ტაში რას დაუკრას, ორი მოკრძალებული კითხვა:

1. ნეტავ რა რეაქცია ექნებოდა რიგით ბრიტანელს ან რიგით ამერიკელს, როდესაც ორივე ქვეყნის პირველ (!) სერიაში ამ ორ ადამიანს იხილავდა?

ბრიტანულში პოლ პოტს:

ამერიკულში ნილ ი ბოიდს

ან ისევ ამავე ეპიზოდებში:

ბრიტანულში

ამერიკულში

2. რას იფიქრებდა რიგითი ამერიკელი, როდესაც აღმოაჩენდა, რომ არა მარტო პოლ პოტსი და კრეიგ ვორმისლეი “დაუკოპირებიათ”, არამედ ჟიურიც ?

Britain’s Got talent

America’s got talent

თუ ქართული პუბლიკის რეაქციებიდან გამომდინარე ვიმსჯელებთ, ვინმე ჯონ სმიტი გამწარდებოდა და რაღაცა მსგავსს ან, საკუთარ თავს გამოვუტყდეთ, ცოტა უკეთეს ვიდეოს მაინც გააკეთებდა:

მაგრამ არა, არა და ნწ!

აი, რა მოხდა:

შეიძლება გულნაზიმ და სიუზანმა ვერასოდეს იმღერონ ერთად სცენაზე, მაგრამ თუ ამერიკას ჰყავს თავისი პოლ პოტსი… რატომაა ცუდი, რომ ჩვენც გვყავდეს ჩვენი სიუზანი? ან ბრიტანელებს ჰყავდეთ გულნაზი? : )

ორიოდე სიტყვით ლიცენზირებასაც მინდა შევეხო. ლიცენზირება ლათინური სიტყვაა და ქართულად კოპირებას ნიშნავს… ოღონდ ლეგალურად. რუსთავი2-მა ბრიტანულ ფრენჩაიზს, “Got Talent”-ს გადაუხადა მწვანე პრეზიდენტების გარკვეული რაოდენობა და მიიღო ე.წ. “პროექტის ბიბლია” – ანუ, რა და როგორ უნდა გაკეთდეს შოუში, რომ უნდა იყოს სამი ჟიურის წევრი და არა ხუთი, უნდა ენთებოდეს X-ები და არა ბოლნური ჯვრები, გადაცემაში სრულად უნდა ჩანდეს მონაწილეების გარკვეული რაოდენობა და ა.შ. ამ წესების შეცვლის შემთხვევაში ეს უკვე Got Talent ფორმატი კი არა, უნიჭო კოპირება გამოდის, რითიც სხვა არხები ისედაც საკმარისად გვამარაგებენ.

მოკლედ სანამ ლიცენზირებულისა და კოპირებულის ერთმანეთისგან განსხვავებას ვისწავლით, სანამ “მათი ფიცი ფიცია და ჩვენი ფიცი – ფიცი არა”, და მაინც ყველა უყურებს- ყოველ ორშაბათს 22:00-ზე “ნიჭიერი” რუსთავი 2-ზე : )

ტეგები: got talent, ლიცენზია, ნიჭიერი, პოლ პოტსი, სუზან ბოილი, ხაჭაპური

54 კომენტარი →

5 თებერვალი

ვერ დაიჭირავს ნიჭსაო, გზა ვიწრო – ვერცა კლდოვანი

საბა, ბლოგერი fazanda.wordpress.com-იდან

როგორც უკვე იცით, ჩემამდე არაერთხელ დაწერეს და თქვენც ალბათ ნახეთ, ორშაბათს გავიდა ჩვენი პირველი გადაცემა. უნდა აღვნიშნო, რომ მოლოდინს არ გადაუჭარბებია – მე ყოველთვის მჯეროდა თქვენი… ქართველები ნიჭიერები რომ ვართ, ამას დიდი მოლოდინი არ უნდა. ამას იმიტომ კი არ ვამბობ, რომ გულწრფელად მჯერა გამონათქვამის: ”რაც კარგები ვართ – ქართველები ვართ,” არა! უბრალოდ ჩვენც ისეთივე ადამიანები ვართ, როგორებიც დანარჩენ მსოფლიოში არიან – შესაბამისად არც ვინმეზე მეტად ნიჭიერები ვართ და არც – ნაკლებად.

მაშ ასე, წარმოგიდგენთ ჩემს შთაბეჭდილებებს:

New Style – უნდა აღინიშნოს, რომ მართლა ძალიან ნიჭიერები არიან. თუმცა მათი გამოსვლა რეალში უფრო სანახაობრივი და ეფექტური იყო. ტელევიზორში რომ ვუყურე, ასე მეგონა რაღაც სხვა ჯგუფი გამოდიოდა – ეს ალბათ მონტაჟის ბრალია, ვერ იყო კარგად… ჩემი აზრით. ძალიან გასახარია, რომ ამის მიუხედავად ბავშვებმა ძალიან მაღალი შეფასება მიიღეს ტელემაყურებლებისგან – ახლა წარმოიდგინეთ რა სანახაობა იქნებოდა მათი ლაივში ცქერა. ჩემგან დიდი კი ”ნიუ სთაილს”

გულნაზი გოლეთიანი – სიმართლე რომ გითხრათ თავიდან დიდად არ მომეწონა მისი ხმა. ძალიან სუსტი მეჩვენა – მაგრამ მისამღერზე რომ მიდგა საქმე… არ გადავაჭარბებ და ვიტყვი, რომ ყელში ბურთიც გამეჩხირა! დასაწყისში მისი სისუსტე ალბათ ნერვიულობის ბრალი იყო, მითუმეტეს ქალბატონ გულნაზის მანამდე არ უცდია სასიმღერო კარიერაში ბედი – განსხვავებით სუზან ბოილისგან, რომელსაც ახალგაზრდობაში დისკიც აქვს გამოშვებული და კლუბშიც მღეროდა. მითუმეტეს უელსში (თუ არ ვცდები, უელსიდან იყო ბოილი) და საქართველოში (განსაკუთრებით კი მაღალმთიან რაიონში) სოფელში ცხოვრება ძალიან გასნხვავდება ერთმანეთისგან. შესაბამისად (გულწრფელი ვარ როცა ამას ვამბობ), ჩემი პატივისცემის უფრო დიდი დოზა ქალბატონ გულნაზს ეკუთვნის. მართალია ის, რომ იყო რამდენიმე მსგავსება სუზენ ბოილის და გულნაზ გოლეთიანის სიუჟეტებში, სუზანიც რაღაცას მიირთმევდა ლოდინის დროს, ისიც უკან მოაბრუნა ჟიურიმ და ა.შ. ეს შეიძლება დამთხვევაა, შეიძლება სპეციალურად დადგმული, მაგრამ რა მნიშვნელობა აქვს? ჯერ ერთი ეს არის შოუ და მის შემქმნელებს ხანდახან უმართლებთ და ასეთი დამთხვევები ხდება, ხანდახან კი დადგმაც უწევთ. მთავარი აქ ქალბატონი გულნაზის მიერ გამოვლენილი ნიჭია.

ირაკლი ძამუკაშვილი – ”ნიჭიერის” ეტალონად, პირადად მე, ამ გადაცემის ბრიტანული ანალოგი მაქვს აღებული – განსაკუთრებით კი ჟიურის საკითხში. ამ მონაწილეს საიმონი (რომელიც ფუნქციაც წესით გეგამ უნდა იტვირთოს) არ გაუშვებდა და პირველივე აკორდზე გააწითლებდა.

აი ასე მოექცეოდნენ მას. საიმონი ქოუელი მე ძალიან მომწონს, მაგრამ ვფიქრობ, რომ ხშირად ზედმეტად სერიოზულად უდგება საქმეს. ძამუკაშვილის გამოსვლის შესახებ ადრეც ვიცოდი და მეგონა, გეგა იქნებოდა პირველი, ვინც მას გააწითლებდა, შესაბამისად საიმონის პროტოტიპის როლს კარგად შეასრულებდა. თუმცა მან ეს არ ქნა და ძალიან გამიხარდა. აქ დავინახე და დავრწმუნდი, რომ ყველაფრის ხელოვნურად გადმოკოპირება არ შეიძლება და ინდივიდუალიზმი ძალიან კარგი რამეა – განსაკუთრებით კი ამ შოუში. აქვე აღვნიშნავ, რომ ჟიურითი (ჩემდა გასაკვირად, მაია ასათიანითაც კი) კმაყოფილი ვარ. ისე, ჟიურიზე ჩასაფრებული ვარ და როგორც კი რამე არ მომეწონება – ეგრევე ”გადავუვლი” :))))) საქმე ისაა, რომ ჟიური ერთ-ერთი ყველაზე მნიშვნელოვანი კომპონენტია შოუსი და ცუდი ჟიური ნიშნავს ცუდ შოუს :)

ახლა რაც შეეხება წამყვანებს – მოკლედ და კონკრეტულად: კარგები არიან!

ტეგები: new style, გულნაზი გოლეთიანი, ირაკლი ძამუკაშვილი, მაია ასათიანი, ნიჭიერი, ნიჭიერი. რუსთავი2

14 კომენტარი →

5 თებერვალი

ლევან გელაშვილი & სოფო პეტრიაშვილი

ბოლო დღეების მანძილზე ”ნიჭიერმა” უამრავი კომენტარი და წერილი მიიღო თხოვნით, დაგვედო სოფო პეტრიაშვილისა და ლევან გელაშვილის ცეკვის ვიდეო. გადაცემაში მხოლოდ მათი ნომრის ფრაგმენტები გავიდა. თხოვნების საპასუხოდ, გადავწყვიტეთ ბლოგზე მათი ნომერი სრულად შემოგთავაზოთ.

სოფომ და ლევანმა ჟიურისგან დადებითი შეფასებები მიიღეს და შემდეგ ტურში წარმატებით გადავიდნენ:

ტეგები: ლევან გელაშვილი, ნიჭიერი, სოფო პეტრიაშვილი, ცეკვა

226 კომენტარი →

4 თებერვალი

Nichieri + Myvideo

”ნიჭიერი” და Myvideo დაძმობილდნენ. დღეიდან Myvideo-ს პირველ გვერდზე თქვენ შეძლებთ ”ნიჭიერის” სვეტის ხილვას არხზე განთავსებული ვიდეოებითურთ.

ჩვენთვის სასიხარულოდ, არხზე განთავსებული ვიდეოების ხილვებმა რამდენიმე დღეში უკვე 115 000-ს გადააჭარბა!

ტეგები: myvideo, ვიდეო, ნიჭიერი

10 კომენტარი →

4 თებერვალი

პირველად იყო შოუ და შოუ იყო “ნიჭიერი”…

ბექა ადამაშვილი, a.k.a. მჩხაპნელი ბლოგიდან Doin.ge

“Show must GO on” - ფრედი მერკური

“ისე არ უწვიმია, როგორც ქუხდა” – ჩემი მეგობარი

ერთის მხრივ, ფრედიც მართალია და მეორეს მხრივ, ჩემი მეგობარიც.

“ნიჭიერს” ელოდებოდნენ ისევე, როგორც ელოდებიან პირველ ბავშვს ოჯახში, ბოლო მატარებელს მეტროში, “skype”-ში გაცნობილ მაგარ გოგოს – პაემანზე, გაზაფხულს – ზამთარში, “ავატარის” ბილეთებს – სალაროსთან, ღილაკზე თითის დაჭერას – სურათის გადაღების წინ, “მე შენ მიყვარხარ”-ზე საპასუხო რეაქციას – სიყვარულში გამოტყდომისას და ა.შ.

ერთი სიტყვით, ვაჟას “მთების” არ იყოს – ყველანი “იდგენ და ელოდნენ“…

"თუ დროის შეჩერება გსურს, მაშინ რაიმეს ლოდინი დაიწყე" - მე

ამ მასშტაბის მქონე მოლოდინმა კი გამოიწვია ის, რომ მავანთ და მავანთ გადაცემა არ “ეყოთ” და ტრადიციული “უფრო მეტს ველოდი“-თი (რა თქმა უნდა, ამ “უფრო მეტი“-ს დაკონკრეტების გარეშე) უკმაყოფილება გამოხატეს კიდეც. თუმცა, შოუ მაინც შედგა და ცალკეული “პერსონაჟებისა” თუ მთლიანი გადაცემის წყალობით ბევრის მოწონებაც დაიმსახურა.

ანუ, თამამად შეიძლება ითქვას, რომ “ნიჭიერმა” ქართულ ტელე-სივრცეში შესამჩნევი კვალი დატოვა.

ჰოდა, ჩვენც მის ნაკვალევს ნაბიჯ-ნაბიჯ მივყვეთ:

პირველი ნაბიჯი: “დუ-უტ, დუტა, დუ-უტ!”

გასაგებია, რომ არ არსებობს წამყვანი, ვინც დუტაზე უკეთესად გაუძღვება გადაცემას. გასაგებია, რომ არ არსებობს შოუმენი, ვინც დუტაზე უკეთესად წაიყვანს კონცერტს. გასაგებია, რომ არ არსებობს მსახიობი, ვისაც შეეძლება დუტაზე კარგად ითამაშოს რეკლამებში. ისიც გასაგებია, რომ დუტაზე უკეთ გათამაშება ჩატარებაც შეუძლებელია… მაგრამ, გაუგებარია, რატომ არ არსებობს ენა, რომელსაც შეეძლება დუტაზე უკეთ წაიკითხოს გადაცემის ტექსტი და მისი დაწყებისთანავე მაყურებელს: “აუ, აქაც დუტაო?” არ ათქმევინოს.

"მე იგივე ვარ მარად და მარად, არ ვსდევ ჟამთა ცვლას..."

დუტა კარგია… კარგზე ბევრად მეტიც. თუმცა, დუტა “ყოველ დროს“, დუტა “ყოველთვის” და დუტა “ყოველგან“, ისევე მოსაბეზრებელია, როგორც ამ ფრაზაში სიტყვა “დუტას” ხშირი გამოყენება…

მეორე ნაბიჯი: “კონგენიალურ..რ..რია”

როდესაც პირველად წამყვანების შესახებ გავიგე, ასოციაციაში მაშინვე მოვიდა თიკა ფაცაციასთან დაკავშირებული დისბალანსური პარამეტრი: “სიმაღლე”!

ამის გამო მეგონა, რომ სიმაღლეში არსებულ სხვაობას, შოუსა და მის ვიზუალურ მხარეზე ცუდი “გავლენის” მოხდენა შეეძლო. თუმცა, გადაცემის მსვლელობისას წამყვანთა წარმატებულმა ტანდემმა ჩემი ძველი წარმოდგენები ისევე დაამსხვრია, როგორც…

"კრამიტთმმუსვრელი"

მე კი, წარმოდგენაგაჩანაგებულს, მაშინვე ილიკო ჩიგოგიძის ფრაზა გამახსენდა: “ცალთვალა იყო კუტუზოვი, მაგრამ დედამიწის გულში რა იდო, იმას ხედავდაო”. წამყვანთა დუეტმა, სასკოლო ენაზე თუ ვიტყვით, “თავისი საქმე ხუთიანზე შეასრულა” და სრულიად შეუმჩნეველი გახადა ის “ნაკლი”, რომელიც ჩემი აზრით თვალისათვის შესაძლოა ცუდი აღსაქმელი ყოფილიყო.

თიკას დასახასიათებლად ალბათ, იდეალური იქნებოდა მისი მშობლიური ქართული ესტრადის ჟამმოჭმული, თუმცა “იუმორინას” მაცოცხლებელი ჰიტის – “მარტის” შემდეგი სიტყვები: “წამის წინ წამწამებს ცრემლი გისველებდა, ახლა მზის სხივების კრთება ათინათი”…

"თვით მაიასაც კი არ უტირია..."

თიკას მთავარი პლიუსიც ის იყო, რომ ემოციების გამოხატვისას ბუნებრიობა არ დაუკარგავს: იცინოდა მაშინ, როცა მართლა ეცინებოდა; ხტუნავდა მაშინ, როცა მართლა ეხტუნებოდა; იცეკვა მაშინ, როდესაც ამის დრო იყო და იტირა მაშინ, როდესაც მაყურებელსაც აეტირა.

არ მინდა რაღაც “ხოტბაჲ და დიდებაჲ”-ს ტიპის ნაწერი გამომივიდეს, მაგრამ საქებარი სიტყვების მეტი ვანიკოზეც არაფერი მეთქმის: კარგი, მხიარული წამყვანს დამატებული კიდევ უფრო უკეთესი მსახიობი მარტივი არითმეტიკული გამოთვლით, ჯამში “ფრიად სასურველ” შედეგს იძლევა.

მოკლედ თუ ვიტყვით, თიკა და ვანიკო შოუს “შოუსანიშნავად” მოერგნენ.

მესამე ნაბიჯი: “ნიჭიერები და დანარჩები”

“2G“(გულნაზი გოლეთიანი)-სა და “3G“(“მესამე თაობის მოცეკვავები” – “New Style”)-ს თემა უკვე იმ მანქანის საბურავებივით გაცვდა, რომლის შეჩერებაც პატივცემულმა ჟიურიმ ერთ-ერთ მონაწილეს სათანადოდ არ დაუფასა.

"ჰერკულესის ხანდაზმულობა"

რაღა თქმა უნდა, იმავე საღამოს გაივსო სხვადასხვა სოციალური ქსელები თუ “მესენჯერები” სტატუს-ფრაზებით: “ქართველი სუზან ბოილი“, “გულნაზ ბოილი” და “სუზან გოლეთიანი“. თუმცა,ცოტა ხანში ამოქმედდა დეკარტეს “მეთოდოლოგიური ეჭვი”-ს კანონიც: “დაეჭვდი ყველაფერში, რაც საეჭვოდ გეჩვენება” და დაიძრა არმია კომენტარებისა, რომელსაც სათავეში ედგა “მთავარსარდალი” სახელად “ეს სცენა დადგმული ხომ არ იყო?!”. არმიის დამრტყმელ ძალას კი წარმოადგენდნენ კომენტარები: “აი, სუზანიც ზუსტად ეგრე მიაბრუნეს უკან” და “ხაჭაპურის სცენა სპეციალურად ჩასვეს, რომ ხალხს თავიდან სხვანაირი წარმოდგენა შექმნოდა“.

მოკლედ, ისეთი ამბავი ატეხეს, სუზან ბოილი რომ შესულიყო “YOUTUBE“-ზე და გულნაზი გოლეთიანი შოტლანდიაში დაეპატიჟა, აღარც ეგ გამიკვირდებოდა. არ ვიცი, დამთხვევა იყო თუ დადგმა, მაგრამ თუნდაც დადგმული ყოფილიყო, მერე რა?

ვერ ვისიამოვნეთ, ვერ შევაქეთ და ტაში ვერ დავუკარით?

შოუს ზუსტად ასეთი ელემენტები ქმნის და ისინიც თუ ”დაჯდა”, მაშინ უკვე “მექანიზმის” მუშაობასაც საფრთხე შეექმნება. ჰოდა, თუ საბოლოო პროდუქტი (თუნდაც დადგმული) ასეთი კარგი სანახავია, უკეთესი არ იქნება თუ მას ინგრედიენტებში ქექვის გარეშე მივიღებთ? :)

"ახალი სტილით - ახალი მწვერვალებისკენ"

“New Style”-ს რაც შეეხება. აქ უფრო სხვა ტიპის კომენტარები სჭარბობდა:

“შუაში რომ იდგა ჩემი მეგობარია“

“სალტოს რომ აკეთებს, იმისი ძმა ჩემი ნათესავის კლასელია“,

“ამ გოგოს “სკაიპით” ველაპარაკებოდი“,

“აუ, იმას მგონი ვიცნობ“

და რა თქმა უნდა, დამსახურებული კომპლიმენტების მთელი ზღვა…

თუმცა, ისეთი მონაწილეებიც იყვნენ, ვისაც პრობლემა ჰქონდა სმენაზე (“ყოველთვის როცა..ა…ა… და…ა…ბერავს ქარი“), წონაზე და ორიენტაციაზე (რა სულ ცუდს ფიქრობთ… საერთოდ შეცდომით რომ ავიდა სცენაზე, ეგ ვიგულისხმე)…

ზოგი უდრეკად იწვა (მინებზე და მანქანას უძლებდა), ზოგიც იმდენად დრეკადი იყო, რომ აბსტრაქტული სიტყვა “თავ-ფეხი” რეალობად აქცია.

"რეზინ-man"

ზოგმა რკინის ლარიანი გადაყლაპა, ზოგმა – წყენა, ზოგმა კი კინაღამ თევზით ჩაი-კოკოლ-ზინა ყელი…

ზოგმა თავი წარმოჩინა (პირდაპირი და არაპირდაპირი გაგებით), ზოგმა – პირი (მუშტის დახმარებით), ზოგმა გული და ზოგმაც…

"შეყვარებულის ადამიანის ცეკვა"

საცირკო ნომრები, სამწუხაროდ, ისეთივე გრძელი არ აღმოჩნდა, როგორც ეს ჯოხი…

"ნახვად ღირდა..."

…ამიტომ ისეთივე უკმარისობის გრძნობა დატოვა, როგორც იმ ველოსიპედიანმა ბიჭმა “ტრიუკების” გაკეთებას ტყუილად რომ დაგვპირდა. იგივე შეიძლება ითქვას სხვა რამდენიმე ნომრის შემთხვევაშიც: ზოგმა სამეჯლისო იცეკვა კარგად, ზოგს ოჯახის გაძღოლა ბავშვობიდანვე დააწვა მხრებზე, ზოგმაც პიანინო გამოიყენა სათანადოდ და ამ ზოგ-ზოგების “თითქმის უჩვენებლობა” იმედია, მხოლოდ მათი შემდეგი გადაცემებისათვის გამო-ზოგ-ვით აიხსნება.

"ოჯახის ტვირთი არც ისე მძიმე სატარებელი ყოფილა"

საბოლოო ჯამში, ნომრები ისეთივე მრავალფეროვნებით გამოირჩეოდა, როგორც ის სატელევიზიო კადრი – ბევრი ზოლებისგან რომ შედგება და მაუწყებლობის დასრულების შემდეგ ეკრანზე რომ ჩნდება ხოლმე.

ამის გამო კი დიდი ჯაფა დაადგა ჟიურის, რომელმაც ზოგი მიწასთან გაასწორა და ზოგი დაზოგა…

მეოთხე ნაბიჯი: “აბა, ჟ(ი)ური!”

აბაჟური -(Fr)-abat-jour - საფარველი, რომელიც ლამპას უკეთდება მხედველობის დასაცავად

ჟიურიც ერთგვარი საფარველია, რომელიც სცენაზეა “მიმაგრებული” და მაყურებლებს – ცუდი ნომრებისგან, ცუდი ნომრის ავტორებს კი – მაყურებელთა დაცინვისგან იცავს.

დასაცავი კი ამ გადაცემაში ორივე ფლანგზე დიდი რაოდენობით აღმოჩნდა და ჟიურის მუშაობა იდეალური იქნებოდა, რომ არა მისი ორი წევრის მიერ ერთ-ერთი მონაწილისათვის ნახევარფინალის საგზურის “ჩუქება“. ალბათ, მიხვდით, ვგულისხმობ იმ ადამიანს, რომელსაც როგორც გვჩვევია ჯერ მთელი საქართველოს მასშტაბით დავცინებთ და შემდეგ ტრადიციულად, ისე შევიყვარებთ, რომ მასთან ქუჩაში სურათების გადაღებაც კი გაგვიხარდება.

არ შეიძლება კიდევ ერთხელ გამოსასვლელად გაიმეტო ადამიანი, რომელსაც ჰგონია, რომ “სათვალე ნაცნობებისაგან დაიცავს”…

სხვა მხრივ კი ჟიური კრიტიკას არ ექვემდებარება და სწორედ ამიტომ, სცენის თავზე საკმაოდ ობიექტურად ინთებოდა ხოლმე სახელები…

…გეგა (ტრიადის ხელმძღვანელი, რომელიც ხშირად ერთ-პიროვნულ გადაწყვეტილებას იღებს და მას ორივე ხელით ახორციელებს, თუნდაც სხვებს ნომრის შეწყვეტის სურვილი სულაც არ ჰქონდეთ. თუმცა, ეს ხდება მხოლოდ მაშინ, როდესაც ტელემაყურებელი უკვე “გულითადი დაცინვის” ფაზაშია გადასული და ნომერი უთუოდ უნდა შეწყდეს)

…მაია (როგორც ბევრი სხვა, თავიდან მეც ვფიქრობდი, რომ უკეთესი იქნებოდა აქ სხვა სახელი დაწერილიყო, მაგრამ შევცდი. “პროფილის” “მარგი ქმედების კოეფიციენტმა” ჩემი სიმპათია პირველი კომენტარიდანვე (“მიდი, ოღონდ არ ჩაგეყლაპოსო“) დაიმსახურა. მომდევნო კომენტარით (“ვინმეს დაბადების დღეზე, რომ იყოთ და ასე იცეკვოთ, ალბათ მოახდენთ შთაბეჭდილებას, მაგრამ… სცენაზე ჯერ მე მგონი ადრეა“) დაამსხვრია ჩემი წარმოდგენა იმაზე, რომ ის მონაწილეების მიმართ მკაცრი ვერ იქნებოდა. ხოლო, გადაცემის მანძილზე გამოხატული ემოციებით საბოლოოდ დამარწმუნა იმაში, რომ “სწორ დროს”, “სწორ არხზე” და “სწორ ადგილზე” იჯდა)

…ნიკა (შენიშვნა არ მაქვს. აფასებდა ზუსტად, ობიექტურად და თან… იდეალურად გაიბუტა)

"ბუტე...ბუტე..." - ვიბუტბუტე

მეხუთე ნაბიჯი: “მგონი, ყელს მივუახლოვდი…”

…და სანამ ამოვალ, დროა ამ წინადადების ბოლოს წერტილი დავსვა და გავჩერდე.

პ.ს: ვისაც კლავიატურა ჰქონდა, “ნიჭიერზე” საკუთარი აზრი უკვე ყველამ გამოთქვა და რამე განსხვავებული თუ ვერ ვთქვი, მეპატიება… :)

ტეგები: ბექა ადამაშვილი, გადაცემა, გეგა ფალავანდიშვილი, ვანიკო თარხნიშვილი, თიკა ფაცაცია, მაია ასათიანი, ნიკა მემანიშვილი, ნიჭიერი, შოუ

34 კომენტარი →

3 თებერვალი

გულნაზი გოლეთიანის ონლაინ-წარმატება

ალბათ უკვე ყველამ იცით, ვინ არის გულნაზი გოლეთიანი. 1 თებერვალს გასულ გადაცემაში ცაგერელი ქალის შეუდარებელმა სიმღერამ მთელი საქართველო მოხიბლა.

გულნაზიმ ნამდვილი რეკორდები დაამყარა ინტერნეტ-სამყაროშიც. მის ვიდეოს ყველაზე მეტი გამოხმაურება მოჰყვა ამ ბლოგზე, Myvideo-ზე, facebook-ზე, თითქმის ყველა ქართულ ფორუმზე. სულ რაღაც ორ დღეში ვიდეომ 37 ათასზე მეტი ხილვა დააგროვა და Myvideo-ს მუსიკის განყოფილებაში ყველა დროის პოპულარულ ვიდეოებს შორის მეოთხე ადგილზე გადაინაცვლა:

72 კომენტარი →

3 თებერვალი

“ნიჭიერის” გვერდები სოციალურ საიტებზე

გადაცემაში გასული ვიდეოების ხილვა შეგიძლიათ არამხოლოდ myvideo-ზე, “ნიჭიერის” არხზე, არამედ უკვე youtube-ზეც. გამოიწერეთ ჩვენი არხები, არ გამოტოვოთ არც ერთი ვიდეო:

myvideo: http://www.myvideo.ge/nichieri

youtube: http://www.youtube.com/nichieri

“ნიჭიერი” ასევე აქტიურადაა Facebook-ზე – ჩვენ უკვე 3 868 მხარდამჭერი გვყავს, რომლებსაც ყოველდღიურად ვეკონტაქტებით. შემოგვიერთდით თქვენც!

ტვიტერის მომხმარებლებო, შეგიძლიათ აგვედევნოთ “ნიჭიერის” ექაუნთზე: http://twitter.com/nichieri

/თუ რაიმეს დატვიტავთ პროექტთან დაკავშირებით, დიდი თხოვნა იქნება, მიუთითოთ ჰეშთეგი #nichieri. ამ გზით ჩვენ ადვილად ვიპოვით თქვენს ტვიტებს და შევძლებთ მათზე პასუხს./

ინტერნეტ-ნიჭიერისთვის ვიდეოები გამოგზავნეთ მეილზე konkursi@nichieri.ge

და ბოლოს, ყველა თქვენი კეთილი სურვილებისა თუ შენიშვნებისათვის შეგიძლიათ მოგვწეროთ მეილზე admin@nichieri.ge

ჩვენ ყველა თქვენს კომენტარსა და წერილს ვკითხულობთ და ვითვალისწინებთ.

შემდეგ “ნიჭიერამდე” კი 5 დღე რჩება.

კასტინგზე, მოსაცდელში

9 კომენტარი →

3 თებერვალი

“მაჩუქე” – გადმოსაწერი ვერსია

ირაკლი ძამუკაშვილის “ღიმილი მაჩუქე, კარგო” – ახლა უკვე MP3 ფორმატში!

მოსასმენად დაწკაპეთ ამ ბმულზე: “ღიმილი მაჩუქე, კარგო”

გადმოწერა შეგიძლიათ ამ ბმულიდან: გადმოსაწერი ვერსია

ტეგები: ირაკლი ძამუკაშვილი, მაჩუქე, ნიჭიერი, ღიმილი მაჩუქე

21 კომენტარი →

3 თებერვალი

პირველი შოუ, პირველი შთაბეჭდილებები

პიკოლინა, ბლოგერი piccolina.ge-დან

სანამ პირველი გადაცემა გავიდოდა, ყველას ჰქონდა რაღაც მოლოდინები და წარმოდგენები პროექტთან დაკავშირებით. სულ თავიდან “ა ტალანტი” გაახსენდა ბევრს (მათ შორის მეც). ეგ გადაცემა გახსოვთ? “ა ტალანტი” რომ ერქვა და არც ერთი ტალანტი იქ არ მიდიოდა, ნუ თუ უნიჭობის წარმოჩენის გამბედაობას ტალანტს არ დავარქმევთ.

ვისაც უცხოური პროექტი, Got Talent ჰქონდა ნანახი, განიხილავდნენ ნანახს და რაღაც მოლოდინები უჩნდებოდათ. ოპტიმისტურ ვარიანტში ამბობდნენ, კარგია, რომ აქაც აკეთებენო, პესიმისტურში – ქართველები მაინც ყველაფერს ვაფუჭებთ, არაფერი მაგისგან არ გამოვაო, მაგრამ მაინც ყველა ელოდებოდა ;))) პრინციპში, რა განწყობაც დაწყებამდე იყო, უმრავლესობას იგივე დარჩა პირველი შოუს შემდეგაც.

რა მოხდა პირველი გადაცემის გასვლის შემდეგ? ფორუმებზე, ბლოგებზე და სოციალურ ქსელებში დაიდო რევიუები. ძირითადად არა მართლა განხილვა, არამედ შედარება: “აი, ბრიტანულში ეს ასე იყო და აქ კიდევ ასეა” ან “ამერიკულში რომ ასე იყო, აქაც ზუსტად გადმოიღეს, ფანტაზია აკლიათ”. მოკლედ, როგორც ბებიაჩემი იტყოდა ენას ძვალი არ აქვსო, ანუ ჭორებს რა გამოლევს :)

პირველ რიგში დაიწყეს, გულნაზი გოლეთიანი რომ გამოიყვანეს, სიუზან ბოილის კოპირება უნდოდათო. არადა ეს ქალი კარგად მღერის, ანუ შესაბამისად ამ ფაქტს ვერ დააიგნორებდნენ. ძროხებს უვლის, ანუ ვერ იტყოდნენ რაღაც კომპანიის მენეჯერიაო. ხოდა რაღა გინდათ? სიმართლე რომ გითხრათ, თავიდან რომ დავინახე გულნაზი თავისი ხაჭაპურებით, ეგრევე ვიფიქრე, დასაცინად არის ეს ქალი განწირული და მასთან ერთად მისი შვილებიც-მეთქი, მაგრამ გამაოცა :))

რაც შეეხება ჟიურის. მაია ასათიანმა სასიამოვნოდ გამაკვირვა ბევრად უარესს ველოდი მისი “პროფილის” შემდეგ. ნიკას რაც შეეხება, ჯეოსტარში მყავდა ნანახი, იქ რომ ვუყურებდი უფრო მკაცრი იყო, აქ კიდევ, მეგონა სხვა ტიპია-მეთქი. გეგას და მაიას რომ გაებუსხა პატარა ბავშვივით ძალიან საყვარელი იყო. ასე მგონია, რომ ჯეოსტარის ჟიურიში სხვა ნიკა იჯდა. გეგაზე ვერაფერს ვიტყვი, ნამეტანი სიმპატიურია :) მაგრამ საშინლად გამაღიზიანა ერთმანეთის ღილაკებზე ხელის დაჭერამ – რა იცი, იქნებ ყველა შენს აზრს არ იზიარებს.

წამყვანებზე არაფერს ვამბობ – შეხვედრისას ვანიკომ ყავის შემოთავაზებთ მოგვთაფლა და უზრდელი ხომ არ ვარ, ამის მერე რომ ცუდი დავწერო მათზე. თიკას ყავა არ შემოუთავაზებია, მარა სანდომიანი ღიმილი აქვს და არც მაგაზე ვწერ არაფერს.

მონაწილეებს და მათ შერჩევას რაც შეეხება, არ მომეწონა, რომ “მაჩუქე ღიმილი” გავიდა და ის ტიპი, ფეხებს რომ კისერზე იდებდა დააიგნორეს, ან ის, მანქანას რომ აჩერებდა ხელით. ან კოკოლის რას ერჩოდნენ, 4 თვეა ის კაცი ყლაპავს და უკან უშვებს იმ საწყალ კოკოლის და ამათ ახლა დაიცვეს? :))) მაგრამ მეორე რაღაცა უნდა ვაღიარო, “მაჩუქე ღიმილი” უფრო მეტ რეიტინგს მოუტანს გადაცემას, ვიდრე რეზინის კაცი. იმიტომ რომ ხალხს მარტო გაკვირვება კი არა, გაცინებაც უნდა. რეზინის კაცით ვერავის გააკვირვებ, მანქანის გაჩერება არც საინტერესოა და არც სახალისო, აი დაკარგული სიყვარულისთვის უნიჭოდ მომღერალი ტიპი კი რაღაც სხვაა. ისევე გაართობს ხალხს, როგორც თავის დროზე “კოხორა” და “დშნ დნნ” ართობდნენ, ეს სჭირდება მაყურებელს.

პოსტის დამთავრებამდე არ შემიძლია არ აღვნიშნო ფავორიტი. კაცი, რომელმაც ყველას გადაუჯოკრა მარტო ერთი ფრაზით “დაკა ბიჭოოოო, დაკააა”, ანუ ვასილ ხაჩიძე. აუცილებლად შეამჩნევდით, რაღაცნაირი გამოხედვა და მიმიკები ჰქონდა და ლაპარაკი კიდევ :)) უბრალოდ რომ აგურები გადაემტვრია, ალბათ არ ვუგულშემატკივრებდი, მაგრამ მისმა ტიპაჟმა მომხიბლა. ერთადერთი არ არის, ვინც მსგავს რაღაცას გააკეთებს, მაგრამ ერთადერთია, ვინც ეგრე გააკეთებს:

დაკა, ბიჭოოოო, დაკაააა!

გკოცნით, გეხვევით, ბლოგერი პიკოლინა

ტეგები: გულნაზი გოლეთიანი, კოკოლი, მაია ასათიანი, მაჩუქე ღიმილი, ჟიური, სიუზან ბოილი, ღილაკები

30 კომენტარი →

2 თებერვალი

ინტერნეტ-ნიჭიერი!

ყველას, ვინც თვლის, რომ ნიჭიერია და უნდა საკუთარი ნიჭი მთელ საქართველოს ანახოს!

თქვენ, ამ ბლოგის მკითხველებს – გეძლევათ შანსი, მიიღოთ მონაწილეობა ”ინტერნეტ-ნიჭიერში”.

ამისთვის სულ სამი ნაბიჯია გადასადგმელი:

ნაბიჯი #1:

უნდა გქონდეთ ნიჭი (ცეკვის, სიმღერის, საღეჭი რეზინით დიდი ბუშტების ბერვის და ა.შ.)

ნაბიჯი #2

გადაიღეთ თქვენი ნიჭის ამსახველი ვიდეო (ვიდეოთვალით, მობილურით, კამერით – ხარისხს დიდი მნიშვნელობა არ აქვს, მთავარია შინაარსი!)

ნაბიჯი #3

გამოგვიგზავნეთ ვიდეო მეილზე konkursi@nichieri.ge

კონკურსისთვის ვიდეოების მიღება იწყება დღეს, 2 თებერვალს და გაგრძელდება ერთი თვის განმავლობაში, 2 მარტამდე.

2-დან 10 მარტის ჩათვლით ამ ვებგვერდზე შესაძლებელი იქნება ინტერნეტ-ნიჭიერების ვიდეოების ხილვა, შეფასება და ხმის მიცემა.

პრიზები

პირველი ადგილი:

iPod Nano

2 VIP ბილეთი ”ნიჭიერის” ნახევარფინალურ კონცერტზე

მეორე ადგილი:

ვებკამერა

2 VIP ბილეთი ნიჭიერის ნახევარფინალურ კონცერტზე

მესამე ადგილი:

”ფლეშკა”

2 VIP ბილეთი ნიჭიერის ნახევარფინალურ კონცერტზე

ველოდებით თქვენს ვიდეოებს და გისურვებთ წარმატებებს!

ტეგები: ipod, ipod nano, ვებკამერა, ინტერნეტ-ნიჭიერი, ნიჭიერი, პრიზი, ფლეშკა

23 კომენტარი →

« წინა პოსტები

მთავარი გვერდი

შოუს შესახებ

მონაწილეები

ინტერნეტ-ნიჭიერი

პროექტის გუნდი

დაგვიკავშირდით

კატეგორიები

Mchxapneli

Piccolina

Tiny

ექსკლუზივი

ვიდეო

ზოგადი

ინტერნეტ-ნიჭიერი

პირველი თებერვალი

ფოტო

კალენდარი

თებერვალი 2010ო ს ო ხ პ შ კ

1 2 3 4 5 6 7

8 9 10 11 12 13 14

15 16 17 18 19 20 21

22 23 24 25 26 27 28

ძიება ბლოგზე

ბოლო კომენტარები

ნანა → ”კოპირებამ” რა ჰქმნა

ნატალიეე → გულნაზი გოლეთიანი

ნატალიეე → ლევან გელაშვილი & სოფო პეტრიაშვილი

მარიკა → ”კოპირებამ” რა ჰქმნა

კუკუშა → პირველი შოუ, პირველი შთაბეჭდილებები

ზენტროპა → ”კოპირებამ” რა ჰქმნა

deus ex machina → ”კოპირებამ” რა ჰქმნა

სტატისტიკა

ჰოსტინგ-პარტნიორი

nichieri

nijieri

nicieri

ამ კვირის ყველაზე კითხვადი სტატიები

ყველა დროის ყველაზე კითხვადი სტატიები

ეს საინტერესოა

რედაქტორის რჩევით

ეს საინტერესოა

არქივი