.jpg)
ავტორი ნინო მიქიაშვილი
00:06 04.01.2012
ქართულ ციხეებში პატიმრების ცემა-წამება 2012 წელსაც გაგრძელდება. ამის თქმის საფუძველს იძლევა სასჯელაღსრულების, პრობაციისა და იურიდიული დახმარების საკითხთა სამინისტროს მიერ გამოქვეყნებული 2012 წლის პრიორიტეტების ჩამონათვალი და ის, რომ გასულ წლებში პატიმრების ცემა-წამების გამო, არც ერთი ადამიანი არ დასჯილა. მეტიც, ისინი სხვადასხვა სასამართლო პროცესებზე ბრალმდებლის როლში გამოდიან და ნაწამებ პატიმრებს იქით ადანაშაულებენ - უმისამართოდ ყვიროდა, იგინებოდა და აგრესიული იყოო.
ასე მოხდა 2011 წლის 31 დეკემბერს, 22 წლის გიორგი ოქროპირიძის შემთხვევაში - N18 სამკურნალო დაწესებულების უსაფრთხოების სამსახურის უფროსი, პატიმრების წამებით სახელგანთქმული გიორგი ავსაჯანიშვილი სააპელაციო სასამართლოში ადგა და ოქროპირიძე იქით დაადანაშაულა, უმისამართო გინებასა და ყვირილში. მოსამართლე ნანა ჭიჭილეიშვილი ავსაჯანიშვილს გულდასმით უსმენდა, ისევე, როგორც 22 წლის პატიმარს, რომელმაც კონკრეტულ პირებს (ალექსანდრე თოლორდავას, გიორგი ავსაჯანიშვილს, ზურაბ ბულბულაშვილს) ხელი დაადო და დეტალურად მოყვა რა მეთოდებით აწამებენ, იმისთვის, რომ აიძულონ და ევროპული სასამართლოდან საჩივარი გამოატანინონ. როგორც ჩანს, ნაწამები პატიმრის ჩვენება მოსამართლემ ცნობად მიიღო და თავისი გადაწყვეტილებით პატიმრის წამებაში მხილებულს გაუმაგრა პოზიციები.
ადვოკატ მამუკა ნოზაძის განმარტებით, გასულ წელს გიორგი ავსაჯანიშვილი სასამართლოზე იგივე როლში კიდევ ორ პატიმართან - დენის ყვარელაშვილთან და ზურაბ ბოსტოღანაშვილთან მიმართებაშიც გამოდიოდა.
“ მოსამართლეებმა უკანონობა ამ შემთხვევაშიც ნოტარიულად დაამოწმეს“, - ამბობს მამუკა ნოზაძე. მისივე თქმით, ყვარელაშვილის საქმეც ევროსასამართლოში იყო გასაჩივრებული და ამის გამო პატიმარს სისტემატუირად სცემდნენ, აწამებდნენ და ამ გზით აიძულებდნენ უარი ეთქვა ევროსასამართლოში შეტანილ საჩივარზე. ძირითად საჩივართან ერთად ადვოკატმა ევროსასამართლოში ყვარელაშვილის წამების ფაქტიც გაასაჩივრა.
3 იანვარს გიორგი ოქროპირიძის დამცველმა ერთ-ერთმა ადვოკატმა, დავით ჯანდიერმა მისი დაცვის ქვეშ მყოფის ცემა-წამების ფაქტიც გაასაჩივრა. ამასთან, ოქროპირიძის მშობლებისგან ჩვენთვის ცნობილი გახდა, რომ გლდანის N18 სამკურნალო დაწესებულების დირექტორი, ვაჟა ცხვედიანი სხვაგან გადაიყვანეს და ახლა დირექტორის მოვალეობას მისი მაოდგილე ასრულებს. ცხვედიანიც არაერთ გახმაურებულ საქმეში (მათ შორის ზემოთ დასახელებულ საქმეებში) ფიგურირებს, როგორც პატიმრების მწამებელი.
კალმახილიძის პრიოტეტები
ახლა რაც შეეხება იმ პრიორიტეტებს, რომელთა ჩამონათვალი სააგენტო “ინტერპრესნიუსმა“ სასჯელაღსრულების, პრობაციისა და იურიდიული დახმარების საკითხთა სამინისტროზე დაყრდნობით გაავრცელა:
2012 წელს იგეგმება ოზურგეთის რაიონის, დაბა ლაითურში 4 000-კაციანი ბრალდებულთა და მსჯავრდებულთა დაწესებულების აშენება, რომელიც ხუთ საპატიმრო დაწესებულებას ჩაანაცვლებს (ბათუმის, ხონის, ზუგდიდის, და თბილისის ორთაჭალაში მდებარე N1 და N12). ლაითურში ახალი საპატიმრო დაწესებულების მშენებლობაზე 1 000 ადამიანის დასაქმება იგეგმება, ხოლო მშენებლობის დასრულების შემდეგ - 500-ის. ხათუნა კალმახილიძის სამინისტროში ვარაუდობენ, რომ დაბა ლაითურის საპატიმროს აშენების შემდეგ ინფრასტრუქტურა და საცხოვრებელი პირობები მთელ ციხეთა სისტემაში გაუმჯობესდება.
კალმახელიძის პრიორიტეტებში შედის პროექტი “გისოსებს გარეშე“, რაც გულისხმობს შეზღუდული პასუხისმგებლობის საზოგადოება “პერსპექტივას“ მიერ დასაქმების ობიექტების შექმნას, სადაც მსჯავრდებულები დასაქმდებიან. როგორც სამინისტროს მიერ გავრცელებულ ინფორმაციაშია განმარტებული, სასჯელს აღასრულებს პრობაციის ეროვნული სააგენტო.
კალმახელიძის სამინისტროს მესამე პრიორიტეტად სასჯელაღსრულების დაწესებულებებთან საზოგადოებრივი მისაღების გახსნა აქვს დასახელებული, რითაც “პროცედურები გამარტივდება, კონსულტაცია კვალიფიციური იქნება და სწრაფი სერვისებით კომფორტულ გარემოში მოემსახურებიან“.
ხათუნა კალმახელიძის სამინისტრო დამატებითი სერვისების: საბანკო მომსახურება, უფასო ინტერნეტი, საბავშვო კუთხე, საინფორმაციო დაფა, უფასო იურიდიული კონსულტაცია დანერგვასაც გეგმავს.
“დამატებითი ინფრასტრუქტურის განვითარება სამინისტროს 2012 წლის პრიორიტეტია. კერძოდ, ტუბერკულოზის სამკურნალო დაწესებულების მშენებლობა, ქალთა დაწესებულებაში ნორვეგიული სტანდარტის ბიბლიოთეკის და საგანმანათლებლო ცენტრის მშენებლობა, პროფესიული განათლების სარეაბილიტაციო სახლების მშენებლობა, გრძელვადიანი პაემნების ინფრასტრუქტურის მშენებლობა, იურიდიული დახმარების საკონსულტაციო ცენტრების გახსნა, არასრულწლოვან ბრალდებულთა განათლებისა და რეაბილიტაციისთვის ინფრასტრუქტურის მოწყობა, არასრულწლოვანი ბრალდებულებისთვის შესაფერისი გარემოს უზრუნველყოფა.
სამინისტროს 2012 წლის პრიორიტეტად რჩება პენიტენციური ჯანდაცვა - პირველადი ჯანდაცვის სრულყოფილად დანერგვა, ტუბერკულოზთან ბრძოლის გაგრძელება, პენიტენციური ჯანდაცვის რეფორმის ფარგლებში სამოქალაქო სექტორის ჯანდაცვასთან გათანაბრების პროცესის გაგრძელება.
საინფორმაციო ტექნოლოგიების განვითარებაც სამინისტროს პრიორიტეტია. 2012 წელს იგეგმება ბრალდებულთა, მსჯავრდებულთა და პრობაციონერთა ერთიანი მონაცემთა ბაზის შექმნა, სასამართლოსთან ვიდეო-კავშირის დამყარება, იურიდიული დახმარების სამსახურში სისხლის სამართლის საქმეთა აღრიცხვისა და დამუშავების ელექტრონული პროგრამის დანერგვა, ელექტრონული სამედიცინო ბარათების დანერგვა.
სასჯელაღსრულების ნაწილის გარდა, სამინისტრო პრობაციის მიმართულებითაც აქვეყნებს 2012 წლის გეგმას - განხორციელდება ეფექტური კონტროლი, შეიქმნება კონტროლის დამატებითი მექანიზმი სერვისის სახით არასამუშაო საათებში, გამოიყოფა ფართი ინტენსიური სარეაბილიტაციო პროგრამებისათვის, დაინერგება ინდივიდუალური მიდგომა, რისკების შეფასება ყველა პრობაციონერის მიმართ“, - აი, ასეთია პატიმრების მწამებელი ადამიანების მფარველი კალმახელიძის სამინისტროს პრიორიტეტები.
"ობიექტივი"
