.jpg)
დღეს, პარტია „მთლიანი საქართველო“ ზუგდიდში, სამეგრელო–ზემო სვანეთის რეგიონულ მთავარ ოფისში პარტიის მხარდამჭერებს შეხვდა. მოძრაობაში 100–მდე მხარდამჭერი ოფიციალურად გაწევრიანდა. ლიდერებმა, თანაპარტიელებს „მთლიანი საქართველოს“ წევრობის დამადასტურებელი სპეციალური მოწმობებიც გადასცეს.
გაზიარება
[ილია ჩაჩიბაია. 17:30 11-06-2011]
საზოგადოებას პარტიის უახლოესი გეგმები პოლიტიკური გაერთიანების გენერალურმა მდივანმა ჯემალ შელიამ გააცნო.
„მთლიანი საქართველო“ სამეგრელოს რეგიონში აქტიურ მოღვაწეობას იწყებს. პარტია სისტემატურ შეხვედრებს გამართავს რეგიონის მოსახლეობასთან, გაეცნობა მათ პრობლემებს და დაეხმარება გადაწყვეტაში. დღეს გაიმართა ვლადიმერ ვახანიას წიგნის „წერილები ციხიდან“ განხილვა და ჩამოყალიბდა მოძრაობის ახალგაზრდული ფრთა“ – ამბობს შელია.
შეხვედრაზე ასევე პარტიის წევრებმა საზოგადოებას მიაწოდეს გუშინ 10 ივნისს, ახალგაზრდა იურისტთა ასოციაციის მიერ გამოქვეყნებული კვლევის შედეგები, სადაც საია (სხვა ადგილობრივ და საერთაშორისო უფლებადმცველ ორგანიზაციებთან ერთად) ყურადღებას ამახვილებს პარტია „მთლიანი საქართველოს“ ლიდერის ვლადიმერ ვახანიას პოლიტიკური ნიშნით სრულიად უდანაშაულოდ დაკავების ფაქტზე.
2011 წლის 10 ივნისს, 12:00 საათზე სასტუმრო „თბილისი მერიოტში“ საქართველოს ახალგაზრდა იურისტთა ასოციაციამ სამართლებრივი კვლევის - „სავარაუდოდ პოლიტიკური მოტივაციის მქონე სისხლის სამართლისა და ადმინისტრაციულ სამართალდარღვევათა საქმეები“ - პრეზენტაცია გამართა. გთავაზობთ რამდენიმე ამონარიდს დასკვნიდან:
„საპროცესო კოდექსის 475-ე მუხლის მიხედვით, ყველა მტკიცებულება უნდა იყოს სასამართლოზე წარდგენილი და გამოკვლეული. მტკიცებულების ერთ-ერთი სახე არის ნივთმტკიცება. საპროცესო კოდექსის 485-ე მუხლის მიხედვით, გამოძიებისას სასამართლო ახდენს ნივთიერ მტკიცებულებათა დათვალიერებას. თუკი ნივთიერი მტკიცებულების გამოკვლევა არ ხდება სასამართლოზე, მაშინ დაუშვებელია მისი სასამართლო კამათში მოშველიება ან განაჩენში მოხსენიება. საპროცესო კოდექსის 496-ე მუხლის მიხედვით, განაჩენი უნდა იყოს დასაბუთებული, რაც გულისხმობს, რომ იგი მხოლოდ გამოკვლეულ მტკიცებულებებს უნდა ეყრდნობოდეს.
მაგალითად, ვლადიმერ ვახანიას საქმეში თავად დაცვის მხარე აყენებდა მოთხოვნას ამოღებული ცეცხლსასროლი იარაღის პროცესზე წარმოდგენისა და გამოკვლევის შესახებ, რაც არც პირველი ინსტანციის და არც სააპელაციო სასამართლოების მიერ არ დაკმაყოფილდა.
სისხლისსამართლებრივი პასუხისმგებლობა იარაღის ან ნარკოტიკის შეძენისთვის იარაღის ან ნარკოტიკის შეძენისთვის სისხლისსამართლებრივი პასუხისმგებლობისთვის აუცილებელია დადგინდეს შეძენის ზუსტი დრო და თარიღი.
დაცვის მხარის შუამდგომლობების დაუკმაყოფილებლობის ტენდენცია: რამდენიმე საქმეში დაფიქსირდა შემთხვევები, როდესაც როგორც წინასწარი გამოძიების, ასევე სასამართლო განხილვის ეტაპზე არ მომხდარა დაცვის მხარის მიერ დაყენებული მნიშვნელოვანი შუამდგომლობების დაკმაყოფილება. კვლევაში განხილულ საქმეებში დაცვის მხარეს უარი ეთქვა ისეთი ტიპის შუამდგომლობების დაკმაყოფილებაზე, როგორიცაა: დაცვის მხარის მოწმეების დაკითხვა; კომპლექსური ექსპერტიზის ჩატარება; საქმისათვის არსებითი მნიშვნელობის მქონე ინფორმაციის გამოთხოვნა და საქმისთვის დართვა; ჩანაწერებისა და ვიდეომასალების დართვა და გამოქვეყნება და ა.შ.
