33 წლის მომაკვდავი პატიმრის და უფლებადამცველებს დახმარებას სთხოვს

ავტორი ნინო მიქიაშვილი
15:25 11.10.2011
თბილისის საქალაქო სასამართლოს ადმინისტრაციულ საქმეთა კოლეგიის მოსამართლის, თამარ ონიანის მიერ გამოტანილ გადაწყვეტილებაზე დიდწილად დამოკიდებული იქნება 33 წლის ახალგაზრდა კაცის სიცოცხლის გადარჩენა – ხვალ, 11 ოქტომბერს თამარ ონიანი განიხილავს მომაკვდავი პატიმრის, ზაქარია ქიტიაშვილის საქმეს, რომელიც ამჟამად ქსნის ტუბზონაში, უმძიმეს მდგომარეობაში იმყოფება.

მსჯავრდებულ ზაქარია ქიტიაშვილის მდგომარეობის ირგვლივ “ობიექტივი“ შეხვდა და ესაუბრა პატიმრის დას, მანანა ქიტიაშვილს და ადვოკატ მამუკა ნოზაძეს. ისინი უფლებადამცველებს პატიმრის გადარჩენაში დახმარებას სთხოვენ.

33 წლის ზაქარია ქიტიაშვილს 30 წლით თავისუფლების აღკვეთა აქვს მისჯილი. იგი სასჯელს 2006 წლიდან სხვადასხვა დაწესებულებებში იხდის. 2009 წელს 2 წლით თავისუფლების აღკვეთა დაუმატეს, უკანონო ნივთის, კერძოდ, ტელეფონის შენახვის გამო. ტუბერკულოზის მძიმე ფორმით დაავადების გამო, მსჯავრდებული 2010 წელს ქსნის ტუბზონაში გადაიყვანეს, სადაც დღემდე იმყოფება.

ევროპულ სასამართლოში გასაგზავნი სარჩელის მომზადების მიზნით და მკურნალობასთან დაკავშირებული პრობლემების გამო, ქიტიაშვილის ოჯახმა ადვოკატ მამუკა ნოზაძეს მიმართა, რომელიც ქიტიაშვილის დაცვის საქმეში 2008 წლიდან ჩაერთო.
“ამ დროისთვის ზაქარია ქიტიაშვილს ჯანმრთელობასთან დაკავშირებული პრობლემები ჰქონდა და რუსთავის N6 საპყრობილე შესაბამის რეაგირებას არ ახდენდა, ანუ პატიმარს არ მკურნალობდნენ. არაერთი საჩივრის შემდეგ, 2008 წლის აგვისტოში ზაქარია ქიტიაშვილი მსჯავრდებულთა და პატიმართა სამკურნალო დაწესებულებაში გადაიყვანეს, სადაც მას არ ჩაუტარეს სრულფასოვანი გამოკვლევა, მკურნალობა და ერთი კვირის შემდეგ ისევ რუსთავის N6 საპყრობილეში მიაბრუნეს. იმავე თვეში, აგვისტოში ევროპულ სასამართლოს საჩივრით მივმართე, მის უდანაშაულობასთან და წამების ფაქტთან დაკავშირებით“, – ამბობს ადვოკატი მამუკა ნოზაძე.

მისივე განმარტებით, ევროპულმა სასამართლომ საქმის განხილვა 3 თვის შემდეგ დაიწყო და 2009 წელს დაასრულა. ევროპული სასამართლოს საბოლოო გადაწყვეტილებას პატიმრის ოჯახი და ადვოკატი დღედღეზე ელოდებიან.

პლუს ამას, გასულ წელს, ზაქარია ქიტიაშვილის ჯანმრთელობის მდგომარეობის დამძიმების გამო, მისმა ოჯახმა და ადვოკატმა ხელშეკრულება გააფორმეს ლევან სამხარაულის სახელობის ექსპერტიზის ეროვნულ ბიუროსთან, რომლის დასკვნის საფუძველზე, სასჯელის გადავადების შუამდგომლობით მიმართეს მცხეთის რაიონულ სასამართლოს.

მოსამართლე რომან ხორავამ სასჯელის გადავადების შუამდგომლობის დაკმაყოფილებაზე უარი თქვა, რის შემდეგაც თბილისის სააპელაციო სასამართლოს მიმართეს, მაგრამ ამით არაფერი შეცვლილა – მოსამართლე მზია ლომთათიძემ, პირველი ინსტანციის განჩინება ძალაში დატოვა. თბილისის სააპელაციო სასამართლოს გადაწყვეტილების შემდეგ, ადვოკატმა მამუკა ნოზაძემ ევროპულ სასამართლოში მორიგი საჩივარი გაგზავნა.

“2011 წლის ივლისში, სასჯელაღსრულების, პრობაციისა და იურიდიული დახმარების საკითხთა სამინისტროს წინააღმდეგ, თბილისის საქალაქო სასამართლოში 3 სარჩელი შევიტანე. პირველი სარჩელი მორალური ზიანის ანაზღაურებას ეხებოდა – ზაქარია ქიტიაშვილი საპატიმრო დაწესებულებაში სრულიად ჯანმრთელი შევიდა და იქ დაავადდა. მოსამართლე თეა თადაშვილმა ამ სარჩელზე გადაწყვეტილება 20 სექტემბერს გამოიტანა – სასარჩელო მოთხოვნა არ დააკმაყოფილა. დასაბუთებულ გადაწყვეტილებას ველოდები, რის შემდეგაც 20 სექტემბრის გადაწყვეტილებას ზემდგომ ინსტანციაში გავასაჩივრებ.

მეორე სარჩელი ექსპერტიზის დანიშვნის საკითხს ეხება და მოპასუხე სასჯელაღსრულების დეპარტამენტია. ვითხოვთ დეპარტამენტს დაევალოს მსჯავრდებულისთვის ექსპერტიზის ჩატარება და ამის საფუძველზე სასამართლოსთვის მიმართვა, სასჯელის გადავადებასთან დაკავშირებით. ეს პროცესი ხვალ, 11 ოქტომბერს გაიმართება – საქმეს თბილისის საქალაქო სასამართლოს ადმინისტრაციულ საქმეთა კოლეგიის მოსამართლე, თამარ ონიანი განიხილავს“, – გვითხრა ადვოკატმა მამუკა ნოზაძემ.

მისივე თქმით, 13 ოქტომბერს დანიშნულია მთავარი სხდომა – თბილისის საქალაქო სასამართლო ადვოკატ მამუკა ნოზაძის მესამე სასარჩელო მოთხოვნას განიხილავს, მსჯავრდებულ ზაქარია ქიტიაშვილის სამოქალაქო ტიპის სპეციალიზირებულ კლინიკაში გადაყვანასთან დაკავშირებით. ადვოკატი ვარაუდობს, რომ სასამართლო გადაწყვეტილებას 13 ოქტომბერსვე გამოიტანს.
“რადგან ზაქარია ქიტიაშვილის მდგომარეობა კიდევ უფრო დამძიმდა, ამ ყველაფრის პარალელურად მცხეთის რაიონულ სასამართლოს სასჯელის გადავადების შუამდგომლობით ხელმეორედ მივმართე. მცხეთის რაიონულმა სასამართლომ ჩემი შუამდგომლობა უკანონოდ გადაუგზავნა გორის სასამართლოს, გორმა გარდაბანს და თუ გადაგზავნები ასეთი ტემპით გაგრძელდება, ჩემმა შუამდგომლობამ შესაძლებელია მთელი საქართველო მოიაროს, ხოლო ამასობაში ამ ახალგაზრდა კაცის სიცოცხლე ლეტალურად დასრულდეს.

თავად ვეღარ მოდის ტელეფონთან. პერიოდულად პატიმრები მიკავშირდებიან და მეუბნებიან, რომ ზაქარია ქიტიაშვილი გაშავებული წევს, კვდება ადამიანი. სამართლებრივი კუთხით ყველანაირი რესურსი ამოწურულია. ვსარგებლობ შემთხვევით და მივმართავ უფლებადამცველებს – აიმაღლეთ ხმა და დაიცავით 33 წლის ზაქარია ქიტიაშვილის სიცოცხლე, რათა იგი არ გახდეს ხელისუფლების უკანონო ქმედებების მორიგი მსხვერპლი“, – აცხადებს მამუკა ნოზაძე.
ადვოკატთან ერთად უფლებადამცველებს დახმარების თხოვნით მიმართავს პატიმრის და, მანანა ქიტიაშვილი:

“უპირველესად მივმართავ მედია–კავშირ “ობიექტივის“ ხელმძღვანელს, ირმა ინაშვილს და “წინააღმდეგობის მოძრაობის“ თავმჯდომარეს, დავით თარხან–მოურავს – გთხოვთ, ქმედითად ჩაერიოთ ჩემი ძმის სიცოცხლის გადარჩენაში და მისი მდგომაროება შეატყობინოთ საერთაშორისო ორგანიზაციებსა და ევროსტრუქტურებს.

დახმარების თხოვნით ასევე მივმართავ უფლებადამცველებს და ვიმედოვნებ, რომ შერჩევით არ იმოქმედებენ, ჩემის ძმის უფლებების დაცვასთან მიმართებაში“.

"ობიექტივი"