16:06 30.12.2011
სასტუმრო "ჰოლიდეი ინის" წინ პრესის გავრცელების მხარდამჭერი აქცია "ვეძებთ სიტყვის თავისუფლებას" გაიმართა.
აქციაში მონაწილეობდნენ სხვადასხვა მედიასაშუალებების წარმომადგენლები, ჟურნალისტები, იურისტები, პოლიტიკოსები და მედიაექსპერტები. აქციის მონაწილეებს ჰქონდათ ფანრები და პლაკატები წარწერით: "ჩვენ ვაშუქებთ, სააკაშვილი აბნელებს".
აქციის მონაწილეებს ასევე ეჭირათ პლაკატი: "აქ არაფერი იყიდოთ, ამან წაართვა პრესას ჯიხური". აქციის მონაწილეების ინიციატივით, პლაკატს მოგვიანებით იმ ახალ ჯიხურებზე გააკრავენ, რომლებიც პრესის გავრცელების ჯიხურების ადგილზე განთავსდა.
როგორც აქციის ორგანიზატორი გაზეთის "ასავალ-დასავალი" ჟურნალისტი ჯაბა ხუბუა აცხადებს, აპროტესტებენ თბილისში პრესის ჯიხურების აღებას, რაც სხვა არაფერია, თუ არა თავისუფალი პრესის და სიტყვის თავისუფლების წინააღმდეგ მიმართული ტერორი.
აქციაში ასევე მონაწილეობდნე პრესის გამავრცელებლები სპეციალური ურიკებით, რომლებითაც ისინი მერიის მიერ გამოცხადებული აუქციონისა და პრესის ჯიხურების აღების შემდეგ, ჟურნალ-გაზეთებს ავრცელებენ.
გამავრცელებლებს ეცვათ "თავისუფალი პრესის ასოციაციის" მიერ დარიგებული ქურთუკები წარწერით: "მე მიყვარს თავისუფალი პრესა".
