"წინააღმდეგობის მოძრაობის" მიერ ორგანიზებულ თავყრილობაზე ახალი კლიპის "შენს გისოსებში მზეა" პრემიერა გაიმართა. ირმა ინაშვილის მიერ 2007 წელს დაწერილ სიმღერაზე კლიპი რეჟისორმა გიგა ლიკლიკაძემ გადაიღო. სიმღერას ირმა ინაშვილი, გიორგი გაჩეჩილაძე ("უცნობი"), ჯემალ სეფიაშვილი, ნანა შონია და მოძრაობის წევრები და მხარდამჭერები ასრულებენ. ინაშვილის თქმით, 4 წლის წინ სიმღერა თავისუფლებააღკვეთილ ირაკლი ბათიაშვილს მიუძღვნა.
გაზიარება
[00:06 12-05-2011]
მოძრაობამ ორდღიანი თავყრილობის ფარგლებში ტუბერკულოზით დაავადებული პატიმრებისა და ციხეებში გარდაცვლილი მსჯავრდებულების შვილების დასახმარებლად კონცერტი-მარათონი გამართა, რომელშიც მონაწილეობა ზურა დოიჯაშვილმა, ანსამბლმა "თბილისი", კვინტეტმა "ფორტე", კომპოზიტორმა ჯემალ სეფიაშვილმა მიიღეს. საქველმოქმედო მარათონი რადიო "ობიექტივისა" და ინტერნეტ-ტელევიზია "ობიექტივის" პირდაპირ ეთერში გადაიცემოდა.
"წინააღმდეგობის მოძრაობის" ხელმძღვანელმა დავით თარხან-მოურავმა განაცხადა, რომ შემოსული თანხა ხვალ კონცერტზე მისულ გარდაცვლილი პატიმრების შვილებს გადაეცემათ.
"აუცილებელია სამოქალაქო ერთობა და გვინდა, ასეთი აქციებით ხალხი გავაერთიანოთ. უნდა დასრულდეს ხელისუფლების მხრიდან გაუთავებელი განუკითხაობა. ბრძოლას ყოველთვის აქვს აზრი", _ განაცხადა თარხან-მოურავმა.
ორგანიზატორების განცხადებით, "წინააღმდეგობის მოძრაობა" ხვალ საგანგებო პეტიციასაც მიიღებს, რომელიც ყველა საერთაშორისო უფლებადაცვით და ევროპულ ორგანიზაციას გადაეგზავნება.
