15:18 04.11.2011
ჩვენ, ავტორიტარულ–კლეპტოკრატიული რეჟიმის პოლიტპატიმრები, ვაქვეყნებთ ღია წერილს, რომლითაც გვსურს, გამოვხატოთ ჩვენი პოზიცია ქვეყანაში ამჟამად მიმდინარე მოვლენების მიმართ.
ღვთის წყალობით, საქართველოს პოლიტიკურ არენაზე იკვეთება ამ რეჟიმის საპირწონე ახალი პოლიტიკური ძალა, რომელიც ჯანსაღად მოაზროვნე საზოგადოებას და დატერორებულ მოსახლეობას იმედს უსახავს, რომ ნამდვილად მოხდება მიხეილ სააკაშვილის ავტოკრატიული რეჟიმის დემონტაჟი და დემოკრატიული ტრანსფორმაციის პროცესიც დაიწყება.
ამ ძალის ჩამოყალიბების ხელის შეშლის მიზნით, სააკაშვილმა და მისმა ელიტამ, მათთვის ჩვეულ სტილში უკვე განახორციელეს რიგი უკანონო ქმედებები, რომლებიც ცნობილ ქართველ მეცენატს, კულტურის, მეცნიერების, სპორტის, ხელოვნების და განსაკუთრებით ქართული ეკლესიის ამაგდარის ბიძინა ივანიშვილისთვის საქართველოს მოქალაქეობის გაუქმებაში გამოიხატა.
ჩვენ, პოლიტპატიმრები, ამ დახურული სივრციდან ვიმაღლებთ ხმას და მიხეილ სააკაშვილისგან მოვითხოვთ, დაუყოვნებლივ აღუდგინოს ბიძინა ივანიშვილს საქართველოს მოქალაქეობა და მისი ოჯახის მიმართ რეპრესიები შეწყვიტოს!
ამავდროულად, მოვუწოდებთ პოლიტიკურ ძალებს და ქართულ საზოგადოებას, აიტაცონ ჩვენი მოთხოვნა და მოახდინონ თავიანთი პოტენციალის კოორდინაცია, ყველა ხერხით, არსებული ბერკეტით აიძულონ სააკაშვილი, რათა ბიძინა ივანიშვილს და მის მეუღლეს მოქალაქეობა აღუდგინოს!
ეს საკითხი პრინციპულად მნიშვნელოვანია, რათა საქართველოში შეიქმნას ჯანსაღი პოლიტიკური კონკურენციის პირობები, რაც წინაპირობა იქნება 2012–13 წლებში ჩვენს ქვეყანაში სამართლიანი და დემოკრატიული გარემოს ჩამოსაყალიბებლად , თავისუფალი არჩევნების ჩასატარებლად. დგება დრო, როცა საქართველოში უნდა შეიქმნას ისეთი სისტემა, სადაც ყველა პოლიტიკურ აქტიორს ექნება არჩევნებში მონაწილეობის და გამარჯვების წინაპირობა.
ვიმედოვნებთ, პოლიტპატიმართა ერთი ჯგუფის ეს მიმართვა ჯეროვნად იქნება აღქმული და მხარდაჭერილი, რის შედეგადაც დასახულ მიზანს მივუახლოვდებით.
პატივისცემით, პოლიტპატიმრები:
