საქართველოში რუსეთის სახელმწიფო სააგენტო “რია ნოვოსტის” წარმომადგენლობის ხელმძღვანელის, ბესიკ ფიფიას, წინააღმდეგ ყალბი საბუთების გამოყენების ბრალდებით დაწყებული სისხლის სამართლის დევნა და წინასწარი გამოძიება შეწყდა.ბესიკ ფიფიას ადვოკატის ლევან ბუაძის განცხადებით, მის კლიენტს დანაშაული არ დაუმტკიცდა.
ფიფიამ თავის მხრივ განაცხადა, რომ სისხლის სამართლის საქმის წარმოების შეწყვეტის შესახებ მას რუსთავის პროკურორმა ნუგზარ მახათაძემ პირადად შეატყობინა და შესაბამისი დადგენილებაც გადასცა.
„სამართლიანობამ იზეიმა, მადლობელი ვარ ყველასი, ვინც მხარი დამიჭირა“, განაცხადა ჟურნალისტმა.
3 სექტემბერს ქართულმა პოლიციამ კრიმინალური გამოძიება დაიწყო ფიფიას წინააღმდეგ. ფიფიას ბრალი ედებოდა ქართული ორგანოების მიერ მასზე გაცემული მართვის მოწმობის გაყალბებაში. კერძოდ საუბარია 1977 წელს დაკარგული მძღოლის მოწმობის დუბლიკატზე, რომელიც 1991 წელს გასცა საქართველოს შს სამინისტროს შს ზუგდიდის რაიონულმა განყოფილებამ.
ფიფიას თქმით, მართვის მოწმობა შეცდომით იყო გაცემული იმ კატეგორიაზე, რომელიც მას მსუბუქ ავტომანქანასთან ერთად, სამგზავრო და სატვირთო ავტომანქანების ტარების უფლებასაც ანიჭებდა.
რუსეთის საგარეო უწყებამ რამდენიმე დღის წინ გაავრცელა კომენტარი, სადაც ნათქვამი იყო, რომ ფიფია პოლიტიკური მოტივით იდევნება.
