ადამიანის უფლებათა დამცველი ორგანიზაციების შეფასებით საქართველოში არსებულ წინასწარი პატიმრობის იზოლატორებსა თუ საპყრობილეებში დაკავებულთა მიმართ ძალადობის ფაქტებმა იკლო, თუმცა გამონაკლისი შესაძლოა სამეგრელოს რეგიონი იყოს, სადაც პოლიციელები ამ დაწესებულებებში დაკავებულთა ცემას დღემდე “წარმატებით” ახორციელებენ.პოლიციელთა მხრიდან ეჭვმიტანილის მიმართ გამოჩენილმა ძალადობამ 19 წლის ყმაწვილის ჯანმრთელობა ისე შეარყია, რომ გიორგი შენგელია საავადმყოფოში ტვინის მძიმე შერყევით მოხვდა.
24 აგვისტოს ზუგდიდის პოლიციის სამმართველოს წინასწარი დაკავების იზოლატორიდან ქალაქის “წმინდა ლუკას სახელობის სამედიცინო ცენტრში” გადაყვანილი შენგელიას ჯანმრთელობის მდგომარეობის შესახებ ოფიციალურ ინფორმაციას ცენტრის მედპერსონალი არ ახმაურებს.
მიმღების მთავარი ექიმი, ქეთევან წყაროზია სარეგისტრაციო ჟურნალში კითხულობს, რომ პაციენტს აღენიშნებოდა თავბრუსხვევა ტკივილებით, რაც თავის ტვინის შერყევით იყო გამოწვეული, რომელიც, როგორც შენგელია საკუთარი ხელმოწერით იმავე ჩანაწერში ადასტურებს, ორი დღით ადრე დაცემის შედეგად მიიღო.
მთავარმა ექიმმა Presa.ge-სთან ისიც აღნიშნა, რომ პაციენტი გამოკვლევას საჭიროებს და იგი სტაციონარში კვლავ უნდა დააბრუნონ. თუ რატომ გაიყვანეს საავადმყოფოდან მძიმე ავადმყოფი მოულოდნელად, წყაროზიას პასუხის გაცემა უჭირს, მაგრამ აშკარა იყო, რომ ეჭვმიტანილის თანმხლები 20-მდე პოლიციელი ჟურნალისტის გამოჩენამ დააფრთხო.
პოლიციის დეტექტივმა, გიორგი გაწერელიამ, რომელიც საავადმყოფოს მიმღებში “მოვალეობას” ასრულებდა, ვიდეო-კამერაში “სამართალდამცავების პოზიცია” შუა თითის ჩვენებით გამოხატა. თუ რას ნიშნავს ამგვარი მოქმედება, ძნელი მისახვედრი არ არის...
პოლიციელების უზნეობასა და თავხედობაზე არსებული შეხედულება კიდევ უფრო გაამყარა ზუგდიდის პოლიციის სამმართველოს უფროსის მოადგილემ, თორნიკე რუხაძემ, რომელმაც სტაციონარში შენგელიას მოხვედრის ფაქტი იმ დროს უარყო, როცა მიმღებიდან პოლიციელების თანხლებით ეჭვმიტანილის გამოყვანას ათეულობით თვითმხილველი შეესწრო.
Presa.ge -მ მიმღების სარეგისტრაციო ჟურნალში ვერც ის ჩანაწერი აღმოაჩინა, სადაც წესით გიორგი შენგელიას სახის არეში არსებული სისხლჩაქცევები, სილურჯეები და ნაკერები უნდა აღნიშნულიყო. წამების კვალი კი Presa.ge-მ ვიდეო-კამერით დააფიქსირა.
ეჭვმიტანილის ნახვის მცდელობა უშედეგო აღმოჩნდა სახალხო დამცველის აპარატის რეგიონული წარმომადგენლებისთვისაც. შენგელიასთან შეხვედრა ვერც მისმა ადვოკატმა, მებრძოლი ჭკადუამ მოახერხა, რომელიც მისი დაცვის ქვეშ მყოფს მის ოჯახის წევრებთან ერთად ქალაქის სხვადასხვა სამედიცინო დაწესებულებაში 4 საათის განმავლობაში უშედეგოდ ეძებდა.
მებრძოლი ჭკადუა: “ეჭვმიტანილის ნახვის უფლება არც პოლიციაში და არც საავადმყოფოში მომცეს. აშკარაა, რომ სასტიკად ნაცემია. მისი გადამალვა კი ძალადობის კვალის დაფარვას უკავშირდება. შენგელიების ბინის ჩხრეკისას ამოღებულია ნარკოტიკული საშუალება “მარიხუანა” და გადაჭრილი თოფი. ვფიქრობ, რომ პოლიციას სხვა საქმეზე უნდა გასვლა და ეჭვმიტანილი ამის გამო დაამუშავეს”.
იმაში, რომ პოლიციელებმა ბინის სამზარეულოში ცეცხლსასროლი იარაღი დადეს, ეჭვი არც დაკავებულის ბებიას, ნუცა შამუგიას ეპარება.
- “დავიჯერებდი, რომ არა ერთი გარემოება – ზუსტად 20 წუთის წინ, იმ ადგილადან, საიდანაც პოლიციელებმა თითქოს იარაღი ამოიღეს, არყის ბოთლი გადავმალე. იმ ოთახში მას შემდეგ არავინ შესულა. დაკავების მერე შვილიშვილმა მითხრა, ჩემი არ არის ეს თოფი, მაგრამ ახლა უკვე ხომ ჩემიაო”, – ამბობს ნუცა შამუგია.
შვილიშვილის სხეულზე ძალადობის კვალი ბებიამ საავადმყოფოს პალატაში მაშინ შენიშნა, როცა მას პოლიციელებმა დაკავებულისთვის ტანსაცმლის შეტანის უფლება მისცეს. ნუცა შამუგია აცხადებდა, რომ შვილიშვილის სამოსი, რომელიც დაკავებამდე ეცვა, შემოხეული იყო. ტანზე კი სილურჯეები ჰქონდა.
ნუცა შამუგია დაკავებული შვილიშვილის ცემას საკუთარი სახლიდან უყურებდა. მისი ნაამბობიდან ირკვევა, რომ ჩხრეკის დაწყებამდე ნახევარი საათით ადრე შორიახლო მდგარი ექვსამდე პოლიციის ავტომანქანიდან ერთ-ერთში გიორგი შენგელიას უმოწყალოდ სცემდნენ.
ადვოკატი მებრძოლი ჭკადუა, რომელმაც ეჭვმიტანილი პოლიციის იზოლატორში საავადმყოფოდან მიყვანის შემდეგ მოინახულა, აცხადებს, რომ შენგელიას ცემის შედეგად სხეულის ყველა ნაწილი დაზიანებული აქვს და მრავლობითი სილურჯეები აღენიშნება.
დაცვის მხარისთვის ჯერჯერობით უცნობია აღიარებს თუ არა ეჭვმიტანილი პოლიციის მხრიდან მასზე განხორციელებულ ძალადობის ფაქტს, რადგან სახალხო დამცველის წარმომადგენელთან საუბარში შენგელიამ დაზიანებების მიყენების დროდ დაკავებამდე პერიოდი დაასახელა.
[ნანა ფაჟავა, ზუგდიდი, presa.ge]
