17:06 30.04.2012
ამ ამბავთან დაკავშირებული ერთი ცნობილი გამოცანა გამახსენდა, - გარეთ ატლასი, შიგნით ათასი. დარწმუნებული ვარ პასუხი ნებისმიერმა იცის, მაგრამ არა მგონია, მიხვდეთ, რას ნიშნავს, - გარეთ ყვითელი და შიგნით თეთრი. გუშინ სწორედ ასეთი სამარშრუტო ტაქსით ვიმგზავრე. #6 სამარშრუტო ხაზზე ახალი ავტომობილები შემოუყვანიათ, რომლებიც გარედან ყვითლად შეუღებავთ, მტერს რომ თვალი დაუბნელოს, შიგნიდან კი მოყვარეს.
ახალ სამარშრუტო ტაქსებს არც კონდიცირების სისტემა აქვს და არც ელექტრონული გადახდის აპარატით არის აღჭურვილი. მეტიც, რჩება შთაბეჭდილება, რომ სატვირთო ავტომობილი სავარძლების დამონტაჟებით სამგზავროდ გადაუქცევიათ. მგზავრები, რომლებსაც თან ნაღდი ფული არ ჰქონდათ და მეტრომანით სურდათ მგზავრობის საფასურის გადახდა, გაჩერებაზე ბოდიშის მოხდით ჩადიოდნენ. როგორც მძღოლმა ამიხსნა, #6 სამარშრუტო ხაზი "მთავრობის" არ არის, ანუ ტენდერში გამარჯვებულ სატრანსპორტო კომპანია "თბილისის მიკროავტობუსს" არ ეკუთვნის და ამიტომაც არის მათი სამარშრუტო ტაქსები ასე განსხვავებული.როგორც ჩანს, ამ ხაზის მესაკუთრეს ძლიერი "ზურგი" აქვს, ამიტომაც ვერ წაართვეს ბიზნესი და მანქანებიც თავად შემოიყვანა. სამარშრუტო ტაქსის მძღოლის თქმით, #6-ის სამარშრუტო ხაზის მძღოლები მერიის მიერ ტენდერში გამარჯვებულად გამოცხადებულ კომპანიას მხოლოდ საგზურის საფასურს - ერთ ავტომობილზე დღეში 35 ლარს უხდიან, დანარჩენი მოგება კი მძღოლებსა და ხაზის მეპატრონეს შორის ნაწილდება.
ის, რომ სატენდერო პირობები არაერთხელ დაირღვა, არახალია, - დროულად ვერ შემოიყვანეს ახალი მანქანები, მგზავრობის საფასური გააძვირეს. მაგრამ სამარშრუტო ბიზნესში წილების კლანური გადანაწილება, მაშინ როცა საზოგადოებას ტენდერში გამარჯვებული კომპანიები წარუდგინეს, უკვე ზღვარს სცილდება. აშკარაა, რომ ქალაქის ხელისუფლება ტენდერში გამარჯვებულ კომპანიას არა მხოლოდ სატენდერო პირობების დარღვევას აპატიებს, არამედ ამ ბიზნესში დანაშაულებრივ ქმედებებზეც ხუჭავს თვალს. დაზარალებული კი ისევ და ისევ მოსახლეობაა, რომელსაც დაპირებული კომფორტისა და მგზავრობის მისაღები ფასის ნაცვლად, ცეცხლის ფასად ისევ დახუთული ტრანსპორტით მგზავრობა მოუწევს.
ჯაბა სამუშია, თბილისის საკრებულოს თავმჯდომარის მოადგილე: "30 აპრილს ამოიწურა დამატებითი ვადა, რომელიც მერიამ ტენდერში გამარჯვებულ კომპანიას ავტოპარკის სრულად განახლებისთვის მისცა. ქალაქში შესაძლოა ყველა სამარშრუტო ხაზზე იყოს ყვითელი სამარშრუტო ტაქსები, მაგრამ ამის მიუხედავად ტენდერის პირობები არ შესრულდეს. სულ უნდა შემოიყვანონ 2100 სამარშრუტო ტაქსი, რომლებიც მუდმივად ხაზზე უნდა მუშაობდნენ, დამატებით 500 კი რეზერვში უნდა იყოს. ანუ 2600 სამარშრუტო ტაქსიდან დღეს რეალურად შემოყვანილია ნახევარი. "თბილისის მიკროავტობუსმა" ხრიკს მიმართა, - ხაზებზე სამარშრუტო ტაქსების რაოდენობა შეამცირა. კანონით განსაზღვრულია, რომელ სამარშრუტო ხაზზე რამდენი ავტომობილი უნდა მუშაობდეს, - დაახლოებით 25-30 ერთეული. დღეს თითქმის ყველა სამარშრუტო ხაზზე მანქანები ხუთი ერთეულით არის შემცირებული და გადანაწილებულია სხვა ხაზებზე, ძველი სამარშრუტო ტაქსების სანაცვლოდ. ამით შეიქმნა ერთგვარი იმიტაცია, რომ ყველა ხაზზე არის ყვითელი მიკროავტობუსი.
ამიტომ საკრებულოს სხდომაზე ვაპირებთ დავაყენოთ ეს საკითხი და მოვითხოვთ შეიქმნას კომისია, რომელიც შეისწავლის, შეასრულა თუ არა ტენდერში გამარჯვებულმა კომპანიამ ნაკისრი ვალდებულება. სატენდერო პირობებში გაწერილი იყო, თუ როგორი უნდა ყოფილიყო სამარშრუტო ტაქსები ვიზუალურად, უნდა ჰქონოდა კონდიცირების სისტემა, უნდა ყოფილიყო აღჭურვილი ელექტრონული გადახდის სისტემით. როგორც ვიცი, ახალშემოყვანილ სამარშრუტო ტაქსებში ყველა პირობა დარღვეულია. ეს კი მეტყველებს იმაზე, რომ სატენდერო პირობების არაეთგზის დარღვევასთან გვაქვს საქმე. მოვუწოდებთ თბილისის მერიას, გადახედოს კომპანია "თბილისის მიკროავტობუსთან" დადებულ ხელშეკრულებას.
რაც შეეხება #6 სამარშრუტო ხაზს, ეს ერთ-ერთი დიდი და შემოსავლიანი ხაზია თბილისში და ბოლო დრომდე ამ ხაზზე ძველი სატრანსპორტო საშუალებები მუშაობდა. მათი ავტოპარკი არ განახლებულა. ჩვენ გვაქვს საფუძველი ვივარაუდოთ, რომ ამ ხაზის მფლობელებმა თავად შემოიყვანეს სატრანსპორტო საშუალებები და შეთანხმება შედგა მათ და კომპანია "თბილისის მიკროავტობუსს" შორის. ეს ცხდაყოფს იმ აუცილებლობას, რომ შეიქმნას სპეციალური კომისია, რომელიც სამარშრუტო ბიზნესში მიმდინარე ყველა პროცესს დეტალურად და კომპლექსურად შეისწავლის".
kvirispalitra.ge
