18:04 28.01.2012
დღეს, პარლამენტთან აქციაზე დაკავებული ჟურნალისტი ილია ჩაჩიბაია სამართალდამცველებს პროფესიული საქმიანობის განხორცილებისას ხელის შეშლაში ადანაშაულებს და შინაგან საქმეთა სამინისტროს მომხდარ ფაქტზე საქმის აღძვრისკენ მოუწოდებს.
ჩაჩიბაიას განცხადებით, ის ტროტუარიდან იღებდა კადრებს, თუ როგორ აკავებდნენ აქციის მონაწილე ჯაბა ჯიშკარიანს და კიდევ რამდენიმე აქტივისტს.
„კადრების გადაღების დროს, პოლიციელების მხრიდან აქციის მონაწილეთა წინააღმდეგ, ძალის გადამეტება გავაპროტესტე. სწორედ მაშინ მომცვივდნენ პოლიციელები და დამაკავეს. დაკავების მომენტში ჩემმა ნაცნობმა ჟურნალისტებმა დამინახეს და პოლიციელებს უთხრეს რომ ჟურნალისტი ვიყავი. სამართალდამცავებმა მათი თანდასწრებით გამათავისუფლეს, მაგრამ როგორც კი ისევ განვაგრძე დაკავების ფაქტების გადაღება, ისევ დამიჭირეს და მობილური ტელეფონი წამართვეს. პრესბარათი ვაჩვენე, ვუთხარი, რომ ჩემი დაკავების უფლება არ ჰქონდათ, რაც არ გაითვალისწინეს და მანქანაში ჩამტენეს. მათ ჩემი მისამართით ცინიკური და შეურაცმყოფელი საუბარი დაიწყეს. მეუბნებოდნენ: „ ახლა შენმა რადიო „ობიექტივმა“, ოპოზიციამ და ივანიშვილმა გიშველოსო“. უკვე აეროპორტის გზაზე ვიყავით, შინაგან საქმეთა სამინისტროსთან, როცა პოლიციელებს ტელეფონზე უცნობი პიროვნება დაუკავშირდა და სავარაუდოდ ჩემი გაშვება უბრძანა. სწორედ მაშინ ჩამომსვეს მანქანიდან“, – აცხადებს ჩაჩიბაია.
მისივე თქმით, ის როგორც ჟურნალისტი, მოქალაქე და უფლებადამცველი მოითხოვს დაუყოვნებლივ გაათავისუფლონ აქციაზე დაკავებული ახალგაზრდები.
შეგახსენებთ, რომ დღეს სანდრო გირგვილიანის მკვლელობის ექვსი წლისთავთან დაკავშირებით გამართულ საპროტესტო აქციაზე პოლიციამ ჟურნალისტ ილია ჩაჩიბაიას გარდა, აქციის ექვსი მონაწილე – დავით ფაცაცია, მიხეილ მუმლაძე, ჯაბა ჯიშკარიანი, ირაკლი ბერაია, ზაზა სვანაძე და კობა ცერცვაძე დააკავა.
მედიკავშირ „ობიექტივის“ წარმომადგენლის მერაბ ჭიქაშვილის განცხადებით სხვა დაკავებულებს სავარაუდოდ, პოლიციისთვის წინააღმდეგობის გაწევისა და საზოგადოებრივი წესრიგის დარღვევის მუხლებით გაასამართლებენ.
