საკაბელო ტელეარხი „მაესტრო“, რომელიც 2 დეკემბრიდან საზოგადოებრივ-პოლიტიკური გადაცემებით დაბრუნდება ეთერში, ტელეწარმოებისთვის ფინანსებს ეძებს.„ტელეწარმოება ძვირია და დიდ სახსრებს მოითხოვს“, განაცხადა „მაესტროს“ ხელმძღვანელმა მამუკა ღლონტმა 24 ნოემბერს , გადაცემა „უცნობი კავკასიის“ ეთერში.
ღლონტის თქმით, იმ შემთხვევაში, თუ „მაესტრომ“ შეძლო ფინანსების მოზიდვა, საეთერო დროის დიდი ნაწილი დაეთმობა საინფორმაციო გამოშვებებს, რადგან, მისი თქმით, „რაც დღეს საინფორმაციო სივრცეში ხდება, ეს არის სრული კატასტროფა.“
ღლონტის ცნობით, პოლიტიკურმა ძალებმა მას უკვე შესთავაზეს ფინანსური დახმარება და ის მზად არის ასეთი დახმარება მიიღოს, მხოლოდ ერთი პირობით: ისინი არ უნდა ჩაერიონ ჟურნალისტების საქმიანობაში.
„მაესტროს“ დირექტორს არ დაუსახელებია ეს პოლიტიკური ძალები. მას არც ის დაუზუსტებია, დაეთანხმნენ თუ არა ისინი „მაესტროს“ პირობებს.
„„ჩვენი ტელეკომპანია მზად არის დაფინანსება თვით სააკაშვილისგანაც (საქრთველოს პრეზიდენტი-media.ge) მიიღოს, თუ სანაცვლოდ არაფერს მოითხოვს, ანუ შენარჩუნდება „მაესტროს“ სარედაქციო დამოუკიდებლობა“, განაცხადა ღლონტმა.
„მაესტროს“ ხელმძღვანელს მიაჩნია, რომ დაფინანსების გარეშე ტელეწარმოება საქართველოში შეუძლებელია და მაგალითისთვის ერთმანეთს რადიო „უცნობისა“ და სამაუწყებლო კომპანია „რუსთავი 2“-ის სარეკლამო ტარიფები შეადარა.
„რადიო „უცნობში“ რეკლამის ყველაზე დაბალი ფასი 60 ლარია, ხოლო „რუსთავი 2“-ში 30 აშშ დოლარი. როგორ შეიძლება თბილისში მაუწყებელ რადიოში უფრო ძვირი ღირდეს რეკლამა, ვიდრე ტელეკომპანია „რუსთავი 2“-ში? ეს სპეციალურად ხდება, რომ არ შეიქნას რეკლამით დაფინანსებული სატელევიზიო სტრუქტურები“, განაცხადა ღლონტმა.
მისი აზრით, ამ ეტაპზე, ვიდრე ქვეყანას მოქმედი ხელისუფლება მართავს, დაფინანსება აუცილებელია, მაგრამ ეს უნდა იყოს კანონიერი და უპირობო დახმარება.
კომუნიკაციის ეროვნული კომისია 28 ნოემბერს გადაწყვეტს „მაესტროს“ სპეციალიზირებული მაუწყებლობის ლიცენზიის საერთო მაუწყებლობის ლიცენზიად მოდიფიცირების საკითხს, რაც არხს საზოგადოებრივი-პოლიტიკური გადაცემების ეთერში გაშვების შესაძლებლობას მისცემს.
[media.ge]
