კომუნიკაციის ეროვნულმა კომისიამ, 2 დეკემბერს, გამოაქვეყნა პრესრელიზი, სადაც ნათქვამია, რომ დღეს, კომისიამ, ტელეკომპანია „მაესტროს“ ლიცენზიის მოდიფიცირება მოახდინა და არხს, საკაბელო ქსელში, საზოგადოებრივ-პოლიტიკური გადაცემებით შეუძლია გავიდეს.„ამიერიდან, ტელეკომპანია „მაესტრო“ ყოველგვარი კანონდარღვევის გარეშე შეძლებს ნებისმიერი თემატიკის გადაცემებით მაუწყებლობას“, ნათქვამია პრესრელიზში.
აქამდე, ტელეკომპანია „მაესტრო“ სპეციალიზებული მაუწყებლობის (შემეცნებითი, გასართობი და მუსიკალური მაუწყებლობა ) ლიცენზიას ფლობდა. არხი საკაბელო ქსელით, თბილისში და რუსთავში მაუწყებლობს.
„მაესტრომ“, გასულ წელს, რამდენჯერმე გაუშვა ეთერში პოლიტიკური გადაცემა, რის გამოც გაფრთხილება მიიღო კომუნიკაციის ეროვნული კომისიისგან.
2 თვის წინ, „მაესტროს“ ლიცენზიის მოდიფიცირების თაობაზე, პარლამენტში პოლიტიკური გადაწყვეტილების მიღებაც გახდა საჭირო.
„მაესტროს“ დამფუძნებელმა და გენერალურმა პროდიუსერმა მამუკა ღლონტმა, 2 დეკემბერს განაცხადა, რომ არ მიმართავს კომუნიკაციის ეროვნულ კომისიას არხისთვის სამაუწყებლო სიხშირის გამოყოფის თხოვნით.
„პრეზიდენტ მიხეილ სააკაშვილის მმართველობის პირობებში „მაესტროს“ სიხშირეს არ მისცემენ, ამიტომ, ჯერჯერობით, გავაგრძელებთ საკაბელო მაუწყებლობას, შემდეგ დემოკრატიული მთავრობა თუ მოვიდა ქვეყნის სათავეში, არხი ჩვეულებრივ სიხშირულ მაუწყებლობას მოითხოვს“, განაცხადა „მაესტროს“ დამფუძნებელმა
ღლონტის ცნობით, 2 დეკემბრიდან, „მაესტროს“ ეთერში გავა შემდეგი საზოგდოებრივ-პოლიტიკური გადაცემები „პროფესია ჟურნალისტი“, „გამოკითხვა“ და „კომენტარის გარეშე“.
„მაესტროს“ სარედაქციო პოლიტიკას, მამუკა ღლონტის ინიციატივით, სამეურვეო საბჭო ხელმძღვანელობს, რომელიც ცნობილი ჟურნალისტებისგან შედგება.
