გაზეთმა ,,ქრონიკა" 24 აგვისტოს "ქიზიყის" აღმასრულებელი რედაქტორის ილია მარტყოფლიშვილის სკანდალური ინტერვიუ კიდევ ერთხელ გამოაქვეყნა. გთავაზობთ ამ სტატიას საინტერესო ნაწყვეტებს:,,ქრონიკის" 10 აგვისტოს ნომერში გამოვაქვეყნეთ დედოფლისწყაროს რაიონში მოღვაწე დამოიკიდებელი ჟურნალისტისა და ინტერნეტ-გაზეთ ,,ქიზიყის" რედაქტორის, ილია მარტყოფლიშვილის ინტერვიუ, სადაც იგი გამგეობის სოციალური უზრუნველყოფის სამსახურის უფროსს, ლევან ჯამალაშვილსა და ადგილობრივი "კუდის" თანამშრომელს, სოსო ბენაშვილს ზეწოლაში ადანაშაულებდა. მისი თქმით, ეს ორივე პიროვნება პერიოდულად უთვლიდა, თუ არ გაჩერდები, სადაც დაგიჭერთ, იქ გიხმარებთო. ინტერვიუში იმაზეც იყო საუბარი, თუ როგორ მიუვარდა "კუდის" თანამშრომელი, სოსო ბენაშვილი მარტყოფლიშვილთან მომუშავე ჟურნალისტს, თამილა გურაშვილს სახლში და როგორ დაემუქრა, ბავშვს გაუფრთხილდიო. როდესაც ამ მასალაზე ვმუშაობდი, მაშინ თამილა გურაშვილი ისე იყო შეშინებული, ინტერვიუზე უარი განაცხადა, ჯერჯერობით თავს შევიკავებო. თუმცა, მოგვიანებით, მარტყოფლიშვილის ნაამბობის გამოქვეყნების შემდეგ არაერთხელ შემეხმიანა და ფაქტები დაადასტურა. მეტიც, როგორც ის ამბობს, "ქრონიკის" გამოსვლისთანავე მასთან სოციალური უზრუნველყოფის სამსახურის თანამშრომლები მივიდნენ და ბინის ხელახალი დათვალიერება მოითხოვეს (იგი, როგორც მარტოხელა დედა, სახელმწიფო დახმარებას იღებს). მას შემდეგ, რაც გურაშვილმა ისინი დაითხოვა, ანუ სახლში არ შეუშვა, საერთოდ აღარ გამოჩენილან. "ქრონიკაში" გამოქვეყნებული ინტერვიუს შემდეგ კახეთის ადამიანის უფლებათა ცენტრმა სამხარეო პროკურატურას მიმართა, რათა აღძრულიყო სისხლის სამართლის საქმე აღნიშნულ ფაქტთან დაკავშირებით. როგორც ჩვენთვის გახდა ცნობილი, სისხლის სამართლის საქმე უკვე აღიძრა და 21 აგვისტოს გამომძიებელმა გიორგი ლომთაძემ დაზარალებულად ცნობილი ჟურნალისტებიც დაკითხა. თუ როგორ ჩაიარა დაკითხვამ, ამის შესახებ კვლავ ილია მარტყოფლიშვილი მოგვითხრობს:
_ კი, მთელი სამი საათის განმავლობაში გვკითხავდა გამომძიებელი. მე და თამილა გურაშვილმა წერილობითი ჩვენება მივეცით, ხელიც მოვაწერეთ, რაც ინტერვიუში ვთქვი, იგივე გავიმეორე იქაც. თამილამაც ყველაფერი დაადასტურა, დაწვრილებით დაწერა, რაც მოხდა.
_ ესე იგი, რა გამოდის, გამგეობას და ადგილობრივი "კუდის" თანამშრომელს უკვე ბრალი ედებათ ადამიანის უფლებების დარღვევაში?
_ ჩემი დაკითხვის დროს გამომძიებელი აღნიშნავდა, რომ სიტყვა"ხმარება" შეიძლება ჩაითვალოსო როგორც მუქარაო და არა როგორც პირდაპირ რაღაც... ასეთ განმარტებას იძლევა.
_ კი, მუქარაა, მაგრამ მუქარასაც გააჩნია, შეიძლება გაუპატიურების მცდელობადაც ჩაითვალოს.
_ კი... მან თქვა, არ ვიცი, როგორ წავა ძიებაო... შედარებით კარგი შთაბეჭდილება დაგვრჩა, უფრო ცუდს ველოდით, ტელეფონში მკაცრი ტონით გველაპარაკებოდა. ჯერჯერობით ნორმალურად წავიდა ყველაფერი.
_ რა თქვა გამომძიებელმა, სოსო ბენაშვილისა და ლევან ჯამალაშვილის დაკითხვასაც ვაპირებო?
_ კი, რა თქმა უნდა, ორივეს დაკითხავს... პირად საუბარში გამომძიებელმა ისიც თქვა: მე არ მეგონა, თუ ამდენად რთულად იყო საქმე, ვიფიქრე, გაზეთმა გააზვიადა, მაგრამ ახლა დავრწმუნდი, რომ მართლა ჰქონდა ადგილი ზეწოლასო. ორივე ცალკ-ცალკე დაგვკითხა... გუშინ პატრიარქი იყო ჩამოსული დედოფლისწყაროში, `კუდის~ მეორე თანამშრომელი მოვიდა ჩემთან ეკლესიაში, მე მის უწმინდესობას ვუღებდი ფოტოებს და დაინტერესდა, ყველაფერი კარგად გადაიღეო? კი, რაღაც მოვახერხე-მეთქი. მისი გვარი და სახელი არ ვიცი, სახეზე ვიცნობ. ჯამალაშვილიც იქ იყო, გამიარ-გამომიარა, მაგრამ არაფერი უთქვამს.
_ ერთ მეგობრულ რჩევას მოგცემ... ცოტა ფრთხილად იყავი, ემანდ ვინმემ არაფერი ჩაგიდოს, თორემ მერე `ქრონიკა~ კი არა, მამა ღმერთი ვეღარ გიშველის.
_ ააა... ჰოო... ვითომ ტაძარშიც იკისრებდნენ რამეს?
_ არა, ეგენი ძალიან მორწმუნეები არიან, არაფერს კადრულობენ...
_ გასაგებია.... აუცილებლად გავითვალისწინებ. ისე, ჩემთან გამომძიებელს რამე პოზიცია არ დაუფიქსირებია. არც გაზეთთან აქვს პრეტენზია, მე მკითხა, ინტერვიუ ნებით მიეციო? რა თქმა უნდა, ერთხელ ჩვენ ზეწოლის ფაქტები არ გავახმაურეთ და ახლა "ქრონიკისთვის" ეს რომ არ გვეთქვა, ყველაფერი დაუსრულებელ სახეს მიიღებდა-მეთქი. ამ ინტერვიუს ქსეროასლიც თან ჰქონდა გამომძიებელს. ვნახოთ, მე მგონი, ჯერჯერობით ყველაფერი კარგად მიდის.
,,ქრონიკა" აღნიშნულ საკითხთან დაკავშირებით ადამიანის უფლებათა ცენტრის კახეთის რეგიონულ ხელმძღვანელს, გელა მთივლიშვილსაც ესაუბრა:
_ ჩვენ როდესაც გაზეთ ,,ქრონიკაში" გამოქვეყნებულ წერილს გავეცანით, აღმოჩნდა, რომ იქ მოყვანილი ფაქტები შეიცავდა სისხლის სამართლის დანაშაულის ნიშნებს. შესაბამისად, გავაკეთეთ მიმართვა კახეთის საოლქო პროკურორის, თამაზ ცაბუტაშვილის სახელზე და მოვითხოვეთ, რომ საპროცესო კანონმდებლობის მიხედვით, აღძრულიყო სისხლის სამართლის საქმე. საქართველოში მოქმედი კანონის თანახმად, პროკურატურა თვითონაც იყო ვალდებული, რომ აღნიშნულ ფაქტზე გამოძიება დაეწყო, მაგრამ როგორც წესი, ასეთ რამეს არ აკეთებენ ხოლმე. რამდენადაც ჩვენთვის ცნობილია, ჟურნალისტების მიმართ მუქარის ფაქტებზე გამოძიება დაიწყო და ისინი უკვე დაკითხეს.
_ ეგ ვიცი, რომ დაკითხეს, მაგრამ ერთი რამე მაინტერესებს, პროკურატურამ ოფიციალური პასუხი გამოგიგზავნათ?
_ არა, საოლქო პროკურატურიდან ამ დრომდე არაფერი მიგვიღია. ამიტომ ჩვენთვის უცნობია, რა მუხლით აღიძრა სისხლის სამართლის საქმე. თუმცა მე ხმამაღლა შემიძლია ვთქვა, რომ იქ იყო არა მხოლოდ მუქარის ფაქტები, არამედ ისეთი ფაქტებიც, რომლებიც მძიმე დანაშაულს შეიცავს. თუ გამოძიება მარტო მუქარას განიხილავს, ეს ჩემთვის გაუგებარი იქნება. თუმცა, სიმართლე გითხრათ, მე იმედი არ მაქვს, რომ პროკურატურა ამ საქმეს ობიექტურად გამოიძიებს.
_ უკეთეს შემთხვევაში რა შედეგი უნდა იყოს?
_ მე თვითონ პროფესიით იურისტი ვარ და ვიცი, რომ როდესაც ადამიანი ჟურნალისტს სახლში უვარდება და ემუქრება, ეს არის ძალიან სერიოზული დანაშაული, ამ დროს, ,,კუდის" თანამშრომელს, სულ მინიმუმ, გამოძიებას საკმაო მასალები რომც არ ჰქონდეს მოპოვებული, უფლებამოსილება უნდა შეუჩერდეს, ხოლო მტკიცებულებების მოპოვების შემდეგ უნდა დადგეს სისხლის სამართლებრივი პასუხისმგებლობის საკითხი. ასევე უნდა გაუკეთონ სოციალური დახმარების სამსახურის უფროსს. ვნახოთ, მე დიდი იმედი არ მაქვს, რომ ასე მოიქცევიან.
კახეთის საოლქო პროკურატურის გამომძიებელი, გიორგი ლომთაძე თვლის, რომ მე არ ვარ კომპეტენტური და შესაბამისად, არ შეიძლება ვიცოდე ყველაფერი გამოძიების მინდინარეობის შესახებ:
_ ბატონო გიორგი, სისხლის სამართლის საქმე რა მუხლით აღიძრა?
_ გამოძიება დაწყებულია ჟურნალისტური საქმიანობის ხელის შეშლაზე.
_ ვიცი, რომ თქვენ ჟურნალისტები უკვე დაკითხეთ.
_ დიახ.
_ მეორე მახარის დაკითხვასაც აპირებთ?
_ რა თქმა უნდა.
_ როგორ ფიქრობთ, აქ მხოლოდ ჟურნალისტურ საქმიანობაში ხელის შეშლა იკვეთება?
_ აქ ლაპარაკია სისხლის სამართლის საქმეზე და არა ხართ თქვენ ის კომპეტენტური პირი, რომელმაც შეიძლება იცოდეს, რა ბედი ეწევა ამ საქმეს. მხოლოდ ერთს გეტყვით, გამოძიება ობიექტურად და სრულყოფილად ჩატარდება.
_ დიდი მადლობა, იმედია, ასე იქნება.
როგორც მოგვიანებით გახდა ჩვენთვის ცნობილი, გამოძიების პროცესში გამოჩნდა მოწმე, თამილა გურაშვილის მეზობელი, რომელმაც კარგად დაინახა, თუ როგორ მიუვარდა ჟურნალისტს სახლში "კუდის" თანამშრომელი, სოსო ბენაშვილი და როგორ იმუქრებოდა. მოწმის ჩვენება უკვე საქმეში დევს. ვნახოთ, როგორ წარიმართება გამოძიება... წესით, ორი პიროვნება, რომელიც ჟურნალისტებზე ზეწოლას ანხორციელებდა, სამაგალითოდ უნდა დაისაჯოს, რათა რეგიონებში ჩინოვნიკების პარპაში ცოტათი მაინც აილაგმოს.
