21.09.2011 15:02
ამ წუთებში ყოფილი გრენქარხნის შენობაში მცხოვრები დევნილები საპროტესტო აქციას მართავენ. ერთ-ერთმა მათგანმა როინ [კარლო] მატკავამ თავის დაწვა სცადა. ჩვენი კორესპონდენტის ცნობით, რომელიც ამ წუთებში აქციის მიმდინარეობას ადევნებს თვალს-ყურს, მატკავამ პროტესტის ნიშნად ბენზინი გადაისხა და თავის დაწვა სცადა, თუმცა მას მეზობლებმა განხორციელების საშუალება არ მისცეს.
_____________________________________
13:35 21-09-2011
ავღანეთში ISAF–ის ოპერაციაში მონაწილე ქართველი სამხედროების შესახებ ავღანეთში არასაკმარისი ინფორმაციაა. ამის შესახებ დღეს ავღანელმა ჟურნალისტებმა საქართველოსა და ავღანეთში შეერთებული შტატების საელჩოების მიერ ორგანიზებულ ვიდეოკონფერენციაზე განაცხადეს.ავღანური მხრიდან ვიდეოკონფერენციაში სააგენტო Pajhwok Afghan News-ს ჟურნალისტები – მოჰამედ ბაშირ გაფარზაი და მეერგჰა ნარსა სამიმი მონაწილეობდნენ. მათი განცხადებით, ქართველი სამხედროების მონაწილეობა ამ მისიაში ძალიან მნიშვნელოვანია ავღანელი ხალხისთვის. თუმცა, ჟურნალისტებმა აღნიშნეს, რომ ქართული კონტინგენტის საქმიანობის შესახებ ავღანეთში ნაკლები ინფორმაცია აქვთ.
"სამწუხაროდ, ქართულ ჯარს არ აქვს საკმარისი კონტაქტი მედიასთან, ჟურნალისტებთან და ჩვენ მათი საქმიანობის გაშუქების საშუალება არ გვაქვს. თუ იქნება მეტი კონტაქტი, ეს ჩვენთვისაც კარგი იქნება და ქართველი ხალხისთვისაც. ავღანელი ხალხიც მადლობელი იქნება ქართველი ჯარისკაცების", - განაცხადა ნარსა სამიმიმ.
ავღანელმა ჟურნალისტებმა ასევე აღნიშნეს, რომ უმთავრესი მოლოდინი, რომელიც ავღანელ ხალხს უცხოეთის სახელმწიფოების ჯარების მიმართ აქვს, ეს უსაფრთხოების გამყარებაა. მათივე შეფასებით, ჰელმანდის პროვინციაში, სადაც ქართული კონტინგენტი მსახურობს, უსაფრთხოების თვალსაზრისით მდგომარეობა გაუმჯობესდა.
"ხალხს ეკონომიკური ჩართულობა და ეკონომიკური მდგომარეობის გაუმჯობესება სურს. ეს კი უსაფრთხოების და ძალადობის აღმოფხრის გარეშე შეუძლებელია. ამიტომ ავღანელი ხალხის უმთავრესი მოლოდინი უსაფრთხოების განმტკიცებაა", - განაცხადა კონფერენციის მსვლელობისას მოჰამედ გაფარზაიმ.
გაფარზაის და სამიმის შეფასებით, ავღანეთის მთავრობა და უსაფრთხოების ძალები ჯერჯერობით, არ არიან მზად პასუხისმგებლობა აიღონ ქვეყნის უსაფრთხოებაზე. თუმცა, მათ აღნიშნეს, რომ შეერთებული შტატები წვრთნის და ტრეინინგებს უტარებს ავღანეთის შესაბამის სამსახურებს.
ავღანელმა ჟურნალისტებმა მათ ქვეყანაში ჟურნალისტების საქმიანობის ნიუანსებზეც ისაუბრეს და აღნიშნეს, რომ ამ მხრივ მთავარ პრობლემებად უსაფრთხოება და დაფინანსების ნაკლებობა რჩება.
13:28 21-09-2011
სრულიად საქართველოს კათოლიკოს-პატრიარქმა ღვთისმშობელს საქართველოს გამთლიანება შესთხოვა.ღვთისმშობლის შობის დღესასწაულთან დაკავშირებით, დიდუბის ღვთისმშობლის შობის ტაძარში წირვა დასრულდა. სრულიად საქართველოს კათოლიკოს-პატრიარქმა მრევლს ქადაგებით მიმართა. უწმინდესმა ქადაგების დროს ღვთისმშობლის მიერ საქართველოს მფარველობაზე და მის მიერ მოხდენილ სასწაულებზე ისაუბრა.
პატრიარქმა ბრძანა, რომ უფალმა ღვთისმშობლი გამოარჩია და მის მიერ იშვა ძე ღვთისა. უწმინდესმა აღნიშნა, რომ ყოვლადწმინდა ღვთისმშობელი მთელი სამყაროს და განსაუთრებით, საქართველოს მფარველია, რადგან ჩვენი ქვყანა ღვთისმშობლის წილხვედრია.
"მაცხოვარი ხედავდა, რომ საქართველო შეინახავდა მართლმადიდებლობას", - ბრძანა უწმინდესმა.
კათოლიკოს-პატრიარქმა შესთხოვა ღვთისმშობელს, გადმოაფაროს საფარველი საქართველოს, დაგვიბრუნოს აფხაზეთი და სამაჩაბლო, გაამთლიანოს ქვეყანა და დათრგუნოს "ყოველი მბრძოლი და მტერი საქართველოსი".
ამასთან, უწმინდესმა აღნიშნა, რომ ხვალ, 15:00 საათზე, კვიპროსის ეკლესიის მეთაური, მთავარეპისკოპოსი ქრიზოსთომოსი ჩამობრძანდება. 15.30 საათზე კი კვიპროსის ეკლესიის მეთაურს სამების ტაძარში მიიღებენ. უწმინდესმა მიმართა მრევლს, ვისაც შესაძლებლობა ექნება, დახვდნენ მთავარეპისკოპოსს ქრიზოსთომოს და მისგან კურთხევა მიიღონ.
დღეს, 19:00 საათზე კი ყოვლადწმინდა სამების საკათედრო ტაძარში პატრიარქი სნეულ და შეზღუდული შესაძლებლობების ბავშვებს დალოცავს.
დიდუბის ღვთისმშობლის ტაძარში დღეს წირვაზე მიაბრძანეს ივერის ყოვლადწმინდა ღვთისმშობლის ხატი, რომელიც ათონის მთაზე ერთ-ერთი სკიტის ბერების მიერ არის დაწერილი.
ხატი ივერის ღვთისმშობლის სახელობის მახათას მთის მონასტრის წინამძღოლის მამა საბა კუჭავას კურთხევით, საქართველოს ტაძრებში მოსალოცად დაბრძანდება. ხატმა უკვე რამდენიმე ტაძარი მოილოცა.
09:33 21-09-2011
მართლმადიდებელი სამყარო დღეს ყოვლადწმინდა ღვთისმშობლის შობას აღნიშნავს. ამასთან დაკავშირებით ტაძრებში წირვა-ლოცვა შესრულდება . როგორც "ინტერპრესნიუსს" საქართველოს საპატრიარქოდან აცნობეს, სრულიად საქართველოს კათოლიკოს-პატრიარქი, უწმინდესი და უნეტარესი ილია მეორე სადღესასწაულო წირვას დიდუბის ღვთისმშობლის სახელობის ტაძარში შეასრულებს.ყოვლადწმინდა ღვთისმშობელი გალილეის პატარა ქალაქ ნაზარეთში დაიბადა. მამა, მართალი იოაკიმე, დავით მეფის ტომიდან იყო, ხოლო დედა, მართალი ანა _ პირველი მღვდელმთავრის, აარონის შთამომავალი. ღვთისმოშიშ ცოლ-ქმარს შვილი ხანდაზმულ ასაკში შეეძინათ. მათ აღთქმა დადეს, თუ ღმერთი შვილს მისცემდა, ახალშობილს ტაძარში მსახურებისთვის უფალს მიუძღვნიდნენ. უფალმა იოაკიმესა და ანას ლოცვა-ვედრება შეისმინა. მთავარანგელოზმა გაბრიელმა ამცნო ანას, რომ იგი მუცლად-იღებდა. ყოვლადწმინდა ღვთისმშობელი საკუთარ სახლში სამი წელი იზრდებოდა.
მართალი იოაკიმ და ანა ეკლესიის მიერ "მშობლებად ღმრთისა" იწოდებიან, როგორც უფალ იესო ქრისტეს ხორციელნი წინაპარნი. მათ განსაკუთრებული მადლი აქვთ ღვთისაგან - უშვილოებს შვილი მიანიჭონ, შეწყვიტონ მიწისძვრები და დააცხრონ ქარიშხლები.
მორწმუნეებისთვის მარხვის გამო დღევანდელი დღე თევზით ხსნილია.
