ილია ჩაჩიბაია: რატომ გამომაძევეს ასტორიიდან (ჟურნალისტური გამოძიება - შესავალი)

12:30 00.00.2014
ჟურნალისტი და ტელეწამყვანი ილია ჩაჩიბაია სათამაშო ბიზნესის მიერ საქართველოსი ჩადენილ კიდევ ერთ დანაშაულს, თანდართულ ფოტოსთან ერთად facebook-ის საკუთარ გვერდზე ასაჯაროებს:

"აი ეს არის რუსების მიერ თბილისში გახსნილი ახალი სლოტ კლუბი, აფიორის და დანაშაულის ბუდე "ასტორია ბეთი". როგორც იცით ჟურნალისტურ გამოძიებას ვატარებ სათამაშო ბიზნესის დანაშაულებებზე და შემოსული ინფორმაციის საფუძველზე გადავწყვიტე პირადად შემემოწმებინა დაწესებულება. საღამოს შენობაში შევედი, სასმელი შევუკვეთე და ვაშლის წვენით ხელში, თითქოს გაქანებული მოთამაშე, ახალი კაზინოს გახსნის სიხარულით, დაწესებულების დათვალიერება დავიწყე. იქაურობა პირტიტველა ბიჭებით იყო სავსე, ჯერაც წვერი რომ არ ამოსვლოდათ. ერთ-ერთს გამოველაპარაკე:

- რამდენი წლის ხარ?
- თხუთმეტის.
- მერედა არ გიშლიან შემოსვლას?
- აქ არავინ გთხოვს პირადობის მოწმობას, თავისუფლად შეუძლია ყველას ითამაშოს,- მრავალმნიშვნელოვნად გაიღიმა და თავის აპარატს მიუბრუნდა. წასვლას რომ ვაპირებდი მაშინ შემომხედა:
- ბევრს ვაგებ. უკვე აღარ შემიძლია იმდენი პრობლემა მაქვს. ხუთ ლარს ხომ ვერ მომცემ კაცურად?

ბავშვური და ოდნავ ძველბიჭური გამომეტყველება მის ცხოვრებას ასახავდა. აშკარად დიდი სევდა ქონდა სახეზე აღბეჭდილი. ვიცოდი კვლავ ითამაშებდა, წააგებდა და ინერვიულებდა, მაგრამ რაღაც ძალამ მაიძულა ჯიბიდან კუპიურა ამომეღო და ამით მისთვის წამიერი სიხარული მაინც მიმენიჭებინა.

შენიღბვის მიზნით აპარატთან დავჯექი, მცირე თანხა შევაცურე და ღილაკს თითი დავაჭირე. ეკრანი ვარსკვლავებით თუ მარწყვებით გაივსო, აღარ მახსოვს ზუსტად. გვერდით მჯდომს ვკითხე ეს რას ნიშნავს მეთქი, გილოცავ მოიგეო. თუ ასეა თანხა გამინაღდეთ მეთქი. 20-25 წლის გოგონა მოვიდა, აპარატს ბევრი უკირკიტა და განმიცხადა თქვენ ნამდვილად მოიგეთ, მაგრამ ბალანსზე არ აისახა, მაპატიეთო. მაშინ დირექტორს თუ მენეჯერს დაუძახეთთმეთქი. შავტუხა, ქერათმიანი რუსი ქალი გამომეცხადა, 2 საათი რაღაცეები ამოწმა და ბოლოს უნოდობლობით და ზიზღით გამსჭვალული თვალებით მომაძახა არაფერი მოგიგიათ, ჩემი პროგრამა არ აჩვენბესო. მოულოდნელად სლოტ კლუბის ერთ-ერთი თანამშრომელი მომიახლოვდა და ხმადაბლა ჩამჩურჩულა: ამათი დედა მოვტ... ასეთი ფაქტები ხშირია, ჯართი აპარატები ჩამოათრიეს და ბევრს ექმნება პრობლემა, რუსები რომ თავზე დაგვაჯდებიან ჩვენს ქვეყანაში წასულია ქართველების საქმე, აქ მუშაობას დიდხანს აღარ ვაპირებო...

მენეჯერმა თანხის გაცემაზე უარი განაცხადა, ნუ იტყვით და თურმე 2 ლარი მომიგია :)) - შევეპასუხე, აქ არასრულწლოვნებს ვხედავ და რატომ უშვებთ, ეს კანონით ისჯებათქო. - როგორ ბედავ, რა შენი საქმეა, ახლავე დატოვე დარბაზი შე ინტრიგანოო. დაცვის თანამშრომლებმა კლუბი მართლაც დამატოვებინეს.

მაშ ასე, სახელმწიფო უმოქმედოა, მეტიც სულ ფეხებზე კიდია ეს სფერო. გაანძრიეთ ხელი!!! კვლავ ვეწვევი ასტორიას თუ დაუჯერებელ ისტორიას და სხვებსაც, მეტ დანაშაულს გამოვააშკარავებ. "ევროპა ბეთის" შემდეგ კიდევ ერთი უსამართლობის ბუდე გამოჩნდა საქართველოში. ჯერ ერთი, ვერ მოიგებს ვერავინ, აპარატები წამგებიანია და თუკი მილიონში ერთს გაუმართლა მოგებას არ აძლევენ. ბავშვების ცხოვრებას ანადგურებენ და ხელისუფლება უმოქმედოა!!!!

P.S ცნობისთვის, "აჭარა გრუპმა", რომელიც თბილისში მსხვილი კაზინოს და სლოტ კლუბების მფლობელია, მოზარდების გაყვლეფის და უამრავი ადამიანის თვითმკვლელობის ფასად თითქმის ერთ მილიარდ ლარად გამომცემლობა სამშობლოს შენობა შეიძინა და უახლოეს ხანებში სასტუმრო გაიხსნება. აქვე გეტყვით, რომ "აჭარა გრუპი" სასტუმრო "ჰოლიდეი ინ"-ის მფლობელიცაა. საიდან ამდენი ფული? ან საიდან მოქალაქეების ამდენი სესხი ბანკებში და მოსახლეობაში გახშირებული თვითმკვლელობები?

პირველ ეტაპზე, აზარტული თამაშების რეკლამირება (ინტერნეტში, ქუჩებში და მასობრივი ინფორმაციის საშუალებებში) უნდა აიკრძალოს!

ვიმოქმედოთ!"