ავტორი ნინო მაისურაძე
16:26 02.06.2011
“ქართული პარტიის” ყოფილი წევრი კახა მიქაია 26 მაისს რუსთაველის გამზირზე მოწყობილ სისხლიან კალოს ცოცხალი გადაურჩა, თუმცა რეზინის ტყვია, წყლის ჭავლი და მხუთავი აირი საკმარისად იგემა ნეკნი გაუტყდა და მარჯვენა ფეხიც დაუზიანდა...
– საქართველოში თითქმის ყველა იმ მიტინგში ვმონაწილეობდი, რომლებიც დაარბიეს, მაგრამ ისეთი რამ, რაც 26 მაისს ჩვენმა ხელისუფლებამ გააკეთა, არასოდეს მინახავს! სპეცრაზმელები ერთმანეთს ეჯიბრებოდნენ, ვინ უფრო სასტიკად მოექცეოდა ხალხს.
დაჭერას როგორ გადაურჩით?
– როგორც კი წყლის ჭავლი და რეზინის ტყვიები დაგვიშინეს, ტრიბუნასა და კედელს შორის, დიდ ჭყლეტაში აღმოვჩნდი. ჭავლს და ტყვიებს რა უჭირდა, ყველაზე შემზარავი ის ხმა იყო, რომელსაც სპეციალური მოწყობილობა გამოსცემდა და რომელიც სიკვდილის ხმას ჰგავდა. ზონდერებმა ალყაში მოგვაქციეს, “დუბინკებით” გვცემდნენ, ჭყლეტაში ერთ ნეკნი ჩამემსხვრა და ამ ჯიკავ-ჯიკავში ხალხთან ერთად მეტროპოლიტენის წინ აღმოვჩნდი. ტროტუარზე რკინის მოაჯირი გადავტეხეთ და ფეხზე დამეცა, ზემოდან კი - ხანში შესული ქალბატონი... ამ არეულობაში მეგობრები დავკარგე, მხოლოდ ლევან გაჩეჩილაძის შუათანა ვაჟი გაგა და ჩემი მეგობარი დათო რურუაღა მედგნენ გვერდით. როგორც იქნა, წამოვდექი და თავისუფლების მოედნისკენ გავემართეთ. ჩავუხვიეთ მუზეუმის გვერდით ქუჩაზე, მაგრამ იქ “ზონდერების” დიდი არმია დაგვხვდა, რეზინის ტყვიებს თავში გვესროდნენ. ამიტომ ტყავის ქურთუკი თავზე გადავიფარე, ამ მომენტში ვიღაცამ დაიძახა, მშენებარე სახლთან გასასვლელიაო და იმ პატარა ჩიხში ჯერ ქალები და მოხუცები გავატარეთ, შემდეგ ჩვენ შევძვერით. მხოლოდ სახლის ფუნდამენტი იყო ჩასხმული, საიდანაც არმატურის რკინები იყო ამოშვერილი. ერთ-ერთი მომიტინგე ამ რკინას დაესო. ატყდა წივილ-კივილი, ძლივს ამოვიყვანეთ...
დავიწყეთ გასასვლელის ძებნა, მაგრამ მოვარდა სპეცრაზმი დედის გინებით, – ყოფას გიტირებთო და კვლავ რეზინის ტყვიები დაგვიშინეს. ისევ აირია მონასტერი, რამდენიმე მომიტინგე ღობეს გადავახტით და მეტროპოლიტენის წინ მდებარე დიდი საცხოვრებელი კორპუსის ეზოში აღმოვჩნდით. მესამე სართულიდან ვიღაც ღვთისნიერმა, ალბათ, იქაურმა მცხოვრებმა დაგვიძახა, ბიჭებო, სარდაფის კარია ღია და იქ დაიმალეთო. ჩავედით სარდაფში და დილამდე იქ ვიყავით 12 მამაკაცი და 2 ქალი. დილის 6 საათზე კი 2-2 კაცი 10-წუთიანი ინტერვალით გავედით. სარდაფში ყოფნისას მეუღლემ დამირეკა, ჩვენს სახლს (არსენას და ბესიკის ქუჩების გადაკვეთაზე ვცხოვრობ) ალყა შემოარტყეს, დარაბებში სპეცრაზმელები იყურებიანო. არადა, დარბევამდე რამდენიმე წუთით ადრე ბიძინა გეგიძემ თქვა, თუ დაგვარბევენ, ყველაზე ახლოს კახა მიქაიას სახლია და მასთან შევიკრიბოთო. დარწმუნებული ვარ, ბიძინას ნათქვამი მოისმინეს, აბა, ჩემს დარაბებთან რა საქმე ჰქონდათ, თან მერაბიშვილმა მოსმენის მეტი რა იცის? ამიტომ შინ არც მივსულვარ. ჩემი მეგობარი დათო სორდია დაუჭერიათ, წაუყვანიათ იზოლატორში და ისე უცემიათ, ჩამსხვრეული ნეკნი ხერხემლის ნერვში ჰქონდა შერჭობილი. უთქვამთ, შენ ის არ ხარ, კახა მიქაიასთან ერთად "მეორე არხის" ეთერში ბევრს რომ ტლიკინებდიო...
ამ პირსისხლიანებს ვეტყვი, რომ ჩვენ იარებს მოვიშუშებთ და უკან არ დავიხევთ. ეს ყველაფერი სააკაშვილსა და მერაბიშვილს ძვირად დაუჯდებათ.
ზუგდიდში რა ხდება?
– ზუგდიდში კვლავ გრძელდება ადგილობრივი მოსახლეობის ტერორი. 26 მაისს ყველა ზუგდიდელი "ზონდერი" რუსთაველზე იდგა. ახლა ვადგენ მათ სიას და მალე გამოვაქვეყნებ. ზუგდიდის გამგებელ ქობალიას "ზონდერჯგუფი" ჰყავს, პროკურორ როლანდ ახალაიასაც ჰყავს პირადი პოლიციელები და საკრებულოს ახალგაზრდა თავმჯდომარე ლევან კონჯარიასაც...
სისხლიანი 26 მაისის შემდეგ ზუგდიდში ადგილობრივმა ხელისუფლებამ გამართა ღონისძიება სახელწოდებით "ჯანმრთელობის ფორმულა". ზუგდიდის ცენტრში ცნობილი ქართველი პოლიტიკური მოღვაწის, ერისკაცის, სპირიდონ კედიას ძეგლის გვერდით დადგეს ველოსიპედის ძეგლი. თუ გიჟები არ არიან, ველოსიპედს ძეგლი რატომ უნდა დაუდგა? მათ სიგიჟეზე კი მათივე მოწოდება მეტყველებს – "არც ერთი ველოსიპედი შინ!". თანაც ამ ღონისძიებაზე ველოსიპედებით მოვიდნენ. სააკაშვილი ზუგდიდში რომ ჩამოვა, მოახტება ველოსიპედის ძეგლს და თავს ბედნიერად იგრძნობს.
ზუგდიდში "ტომას ფლეთჩერის" თემა გრძელდება, ოღონდ სხვა მიმართულებით – ზუგდიდელებმა დაინახეს, რომ მე-4 საჯარო სკოლის ინგლისური ენის უცხოელ მასწავლებლებს შალვა დადიანის სახელობის ზუგდიდის დრამატული თეატრის ეზოში დღისით, მზისით, გაქანებული სექსი ჰქონდათ. არ ვიცი, ეს ინგლისური ენის მასწავლებლები ზუგდიდელ ბავშვებს ინგლისურ ენას ასწავლიან თუ თავისუფალი სექსის გაკვეთილებს უტარებენ...
ამ შემთხვევას რეაგირება არ მოჰყოლია?
– ფლეთჩერზე რომ ავტეხეთ ერთი ამბავი, რა მოვიგეთ?! ვინ არის ზუგდიდში ხმის ამომღები, რატომ არ გესმით, რომ ზუგდიდელები დამონებულები არიან?!
კიდევ ერთ ამბავს გიამბობთ... მაისში მერაბიშვილი ბრძანდებოდა ანაკლიაში და ბრძანა, მიქაია უნდა დავასრულოთო. ეს განუცხადებია სამხარეო პოლიციის უფროს გუნავასა და სხვა მაღალჩინოსნებისთვის. ერთ დროს "ზონდერს", ახლა კი ზუგდიდის მაღალჩინოსან თორიას, მეტსახელად "ლოქოს", უთქვამს, მიქაიას საქმეს ჩემს თავზე ვიღებო.
ინფორმაციის წყაროს ვერ დაგისახელებთ. ვნახოთ, რას მიპირებენ, მალე გაირკვევა...
"ყველა სიახლე"
