ქართველ ბლოგერებს ხვალ, 14 აპრილს ეკონომიკური განვითარების სამინისტრო უმასპინძლებს. ეს არის პირველი შემთხვევა ქართული ბლოგინგის ისტორიაში, როცა სამთავრობო უწყება ქვეყნის ბლოგერებით ინტერესდება. ბლოგერებს შეხვდება თავად ეკონომიკის მინისტრი ზურაბ პოლოლიკაშვილი და მისი მოადგილეები.
სამინისტროს საზოგადოებასთან ურთიერთობის დეპარტამენტის უფროსის, თეონა გაბუნიას თქმით, მედიის საინტერესო და პროგრესული მიმართულების ბლოგინგის განვითარებას საქართველოს მთავრობის მხრიდან აქამადე სათანადო ყურადღება არ ექცეოდა. სამინისტროში ხვალ ქართველი ბლოგერებისგან მოისმენენ, რა არის გასაკეთებელი და როგორ შეიძლება ბლოგინგი დაეხმაროს საქართველოს პოპულარიზებასა და მსოფლიოს თვალში იმიჯის ამაღლებაში.
საქართველოში ბლოგინგის პოპულარობა ბოლო წელიწადნახევარში მკვეთრად გაიზარდა. ბლოგერების რაოდენობა ადრე თითებზე ჩამოსათვლელი იყო. მაგალითად, 2008 წელს თბილისმა პოსტსაბჭოთა სივრცის ბლოგერებს უმასპინძლა, სადაც საქართველო სულ რამდენიმე ბლოგერით იყო წარმოდგენილი. თუმცა, მას შემდეგ ფონდმა "ღია საზოგადოება-საქართველომ" და სხვა დონორებმა მნიშვნელოვანი რესურსები ჩადეს საქართველოში ბლოგინგის განვითარების საქმეში.
2009 წლის შემოდგომაზე თბილისში ჩატარდა ახალი მედიის ფორუმი. მას სტუმრობდნენ სოციალური მედიის სპეციალისტები მსოფლიოს სხვადასხვა ქვეყნებიდან. ისინი ქართველებს საკუთარ გამოცდილებას უზიარებდნენ. ამ ფორუმზე გაიმართა ქართული ბლოგკატალოგის პრეზენტაცია.
ქართული ბლოგების აგრეგატორზე blogroll.ge-ზე დღეისათვის 554 ბლოგია დარეგისტრირებული, რომლებშიც საერთო ჯამში 29,108 პოსტი დაიწერა. ბოლო მონაცემებით, ქართულ ბლოგოსფეროში დღეში საშუალოდ 120 ახალი პოსტი იწერება. მათ ერთმანეთისგან სრულიად განსხვავებული ასაკის, შეხედულების და ინტერესის მქონე 539 ბლოგერი წერს.
2009 წლის მიწურულს რამდენიმე ქართველი ბლოგერი იმყოფებოდა რუმინეთის
დედაქალაქ ბუქარესტში, მსოფლიო ბლოგინგის ფორუმზე. საერთაშორისო
ორგანიზაციების მხარდაჭერა 2010 წელსაც გაგრძელდა. მიმდინარე წლის
აპრილში თბილისში უკვე ჩატარდა სოციალური ინოვაციების ბანაკი, 16 და 29
აპრილს გაიმართება საერთაშორისო კონფერენცია ინტერნეტ ტელევიზიის
შესახებ. კონფერენციაზე სტუმრად ჩამოდიან ბლოგერები სინგაპურიდან და დიდი
ბრიტანეთიდან.
[თამაზ კუპრეიშვილი, მედია.გე]
