10 სექტემბერს “დაიცავი საქართველოს” რეგიონალური ოფისიდან უცნობმა პირებმა მოძრაობის ბანერი მოიპარეს. ოფისის აივნიდან 5.50-3.50მ სიგრძის ბანერი სავარაუდოდ ღამის 4 საათისთვის გაქრა. “დაიცავი საქართველოს” წევრებმა იგი ქურდობიდან 3 დღით ადრე, ცოტნე დადიანის ¹1-ში მდებარე სახლის მეორე სართულზე დაკიდეს.საკნების აქციის მონაწილეები და “დაიცავი საქართველოს” წევრები ქურდობაში ხელისუფლებას ადანაშაულებენ. აქციის ორგანიზატორი, კახა მიქაია ირწმუნება, რომ ბანერის ქურდობა არშემდგარი პროვოკაციით გაგულისებულმა ხელისუფლებამ ჩაიდინა.
კახა მიქაია: “7 სექტემბერს, მოძრაობის ოფისის გახსნის დღეს ზუგდიდში ლევან გაჩეჩილაძის ვიზიტი იგეგმებოდა. ხელისუფლება აპირებდა პროვოკაციის ინსპირირებას ე.წ. “მიშას ზვიადისტების”, ნაცმოძრაობის ზონდერჯგუფებისა და პოლიციის მეშვეობით, რასაც შემდეგ სამოქალაქო შუღლის გაღვივება მოჰყვებოდა ისეთ ფეთქებადსაშიშ რეგიონში, როგორიცაა სამეგრელო და კერძოდ ზუგდიდი.
მოსალოდნელი საფრთხის თავიდან აცილების მიზნით საზოგდოებრივმა მოძრაობამ “დაიცავი საქართველო”, მიიღო გადაწყვეტილება ვიზიტის გადადების შესახებ. ხელისუფლებამ ვერ განახორციელა თავისი ზრახვები და სწორედ ეს გახდა ქურდობის ჩადენის მიზეზი. თავდასხმებიდან ისინი ქურდობაზე გადავიდნენ”.
მოძრაობის წევრები ¹1 ეჭვმიტანილად შსს კონსტიტუციური უსაფრთხოების დეპარტამენტსა და რაიონის მუნიციპალიტეტის გამგეობას მიიჩნევენ, რადგან ამ დაწესებულებათა შენობები ტერიტორიულად ყველაზე ახლომდებარეა.
საკნის “პატიმრები” მოსალოდნელ დარბევაზეც საუბრობენ და მის ორგანიზატორად თავდაცვის ახალ მინისტრს, ბაჩო ახალაიას მიიჩნევენ.
- “ამ დღეებში ზუგდიდში იგეგმება ხელისუფლების მიერ დადგმული მორიგი უნიჭო სპექტაკლი სახელწოდებით “ანგარიში ხალხს”, რის ჩატარებასაც ხელს უშლის ქალაქში მიმდინარე საპროტესტო აქცია. ჩვენი ინფორმაციით ხელისუფლებამ უკვე მიიღო გადაწყვეტილება საკნების დარბევის შესახებ. მოსალოდნელ შედეგებზე მთელი პასუხისმგებლობა ხელისუფლებას დაეკისრება”, - განაცხადა კახა მიქაიამ.
[ნანა ფაჟავა]
