მსოფლიოს წამყვანი ექსპერტების 2010 წლის პროგნოზები კარგს არაფერს გვიქადიან. იქნება ომები და მსოფლიოს წამყვან სახელმწიფოებს შორის გავლენის სფეროებისთვის დაუნდობელი ბრძოლა.
ამ პროგნოზების თანახმად, 2010 წელს ჩრდილოატლანტიკური ალიანსი (ნატო) გააგრძელებს კრემლთან თანამშრომლობას, მაგრამ ამას გააკეთებს მხოლოდ და მხოლოდ ავღანური მიმართულებით. ესეც იმ მიზნით, რომ მოსკოვი დასავლეთმა ამ დაუსრულებელ ომში როგორმე „შეითრიოს“. ხოლო რუსეთი სიტუაციიდან გამოძრომას ვერ მოახერხებს და მას „მეორე აფგანი“ წინასწარ უზრუნველყოფილი აქვს.
როგორც რუსეთის სახელმწიფო დუმის საერთაშორისო კომიტეტის ხელმძღვანელმა კონსტანტინ კოსაჩევმა აღნიშნა, „დღეს არ შეიძლება დავუშვათ მეორე სომალის გამოჩენა საკუთარ საზღვრებთან. ან ნატოს ოპერაცია იქნება წარმატებული, ან ჩვენ ყველანი ფაქტის წინაშე აღმოვჩნდებით“.
ცვლილებები მოხდება შეერთებული შტატების შიდა პოლიტიკურ სიტუაციაშიც – ექსპერტების აზრით, იქ მესამე პოლიტიკური ძალა გამოჩნდება. პოლიტიკოსებზე გაბრაზებული ამერიკელები კიდევ ერთ პოლიტიკურ ძალას შექმნიან, რომელსაც ლიდერის პოზიციების დაკავება შეეძლება.
გარდა ამისა, აშშ რუსეთთან ბირთვული იარაღის შემცირებაზე შეთანხმებას მიაღწევს და ურთიერთობას გააუმჯობესებს კუბასთან – ჟურნალისტები ფიდელ კასტროს გარდაცვალებას არ გამორიცხავენ და მისი ძმა რაული, რომელიც ქვეყნის მმართველი გახდება, ეკონომიკური სარგებლის მიღების მიზნით აშშ–სთან ურთიერთობებს დაალაგებს.
ვენესუელის დამთხვეული პრეზიდენტი უგო ჩავესი სამხედრო გადატრიალების შედეგად დამხობილი იქნება. ჰიპერინფლაცია, ეკონომიკური კოლაფსი და დამნაშავეობის არნახული მაჩვენებელი სამხედროებს კოზირს მისცემს, რომლებიც ხელში ჩაიგდებენ კიდევაც ხელისუფლებას.
სამხედრო გადატრიალებას მოელიან პაკისტანშიც, სადაც პრეზიდენტი ასიფ ალი ზარდარი არაპოპულარულია არა მარტო მოსახლეობაში, არამედ მინისტრებში და ქვეყნის არმიაშიც. სამხედრო პუტჩის შემდეგ ახალი ხელისუფლება ვაშინგტონის პოლიტიკას შეეწინააღმდეგება.
ირანის მიერ ბირთვული იარაღის შექმნა კვლავაც აქტუალური საკითხი იქნება. ხოლო რადგანაც ქვეყნის პრეზიდენტი მაჰმუდ აჰმადინეჯადი კომპრომისებზე არ წავა, ირანის წინააღმდეგ ეკონომიკური სანქციები იქნება შემოღებული. ისრაელი ირანის ბირთვული ობიექტების დაბომბვას არ დაიწყებს, ის მოერიდება საკუთარ ქალაქებზე დარტყმას და ისრაელის წინააღმდეგ საპასუხო ნაბიჯებს ლიბანური „ჰეზბოლას“ მხრიდან.
რუსეთში ვლადიმირ პუტინი ყველას მიახვედრებს, რომ პრეზიდენტად კენჭისყრას აპირებს. ხოლო დიდ ბრიტანეთში არჩევნების შემდეგ პრემიერ–მინისტრი კონსერვატორი დევიდ კამერონი გახდება. თუმცა ის იძულებული იქნება, ლიბერალ–დემოკრატებთან კოალიცია ჩამოაყალიბოს. ეს ხელს შეუშლის ზომების მიღებას კოლოსალური საგარეო ვალის დაფარვისთვის, ფუნტ სტერლინგების სიძლიერე ჩამოიშლება, ხოლო ქვეყანაში სერიოზული რეცესია დაიწყება.
არც მეტი არც ნაკლები, მაგრამ საუბრობენ იმაზეც, რომ სამხრეთიდან ჩრდილოეთით ევროპისკენ პირველი ანტიჯვაროსნული სვლა დაიწყება. ეს იქნება ახალი შუა საუკუნეები ძველი სამყაროსთვის(ევროპისთვის). ასეთი ტენდენცია უკვე ახალი წლის დასაწყისიდან შეინიშნება – დანიაში ფანატიკოსი თავს დაესხა კარიკატურისტს, რომელმაც ჯერ კიდევ ხუთი წლის წინ გაბედა და წინასწარმეტყველი მუჰამედი გამოსახა, ხოლო ახალგაზრდა არაბებმა ღარიბული პარიზული კვარტალებიდან ახალი წელი 1100–ზე მეტი მანქანის გადაწვით „აღნიშნეს“.
ექსპერტთა პროგნოზებით, ამ ტენდენციას განსაკუთრებით მწვავედ გერმანია და საფრანგეთი იგრძნობენ.
ანალიტიკური ცენტრი „ნეოკონის“ პრეზიდენტი და ელცინის ყოფილი მრჩეველი მიხაილ ხაზინი ნავთობის გაძვირებას პროგნოზირებს. ამას ხსნის მათ შორის დოლარის ინფლაციით და იმ მრავალმილიარდიანი ემისიებით, რასაც ობამამ გაპრეზიდენტების შემდეგ მიმართა.
„ჩვენთვის ობამას გამარჯვება – ეს ნავთობზე მაღალი ფასებია!“ – თვლის ხაზინი. – „ეს ნიშნავს, რომ ნავთობის ფასებზე მატებას უკრაინაში ბენზინის გაძვირება მოჰყვება“, – შიშობენ კიევში.
ამავე პროგნოზების მიხედვით, 2010 წელში ბელორუსი, მოლდოვა, საქართველო და უკრაინა გააგრძელებენ ნელ, მდორედმავალ დრეიფს ევროკავშირის მიმართულებით. „მაგრამ ეს პროცესები რუსეთის შიდა პრობლემების ფონზე თვალში არ მოგვხვდება“, – თვლის რუსი პილიტოლოგი რუსტემ ჯანგუჟინი.
ასევე პოლიტიკური ინფორმაციის რუსული ცენტრის გენერალური დირექტორი ალექსეი მუხინი პროგნოზირებს, რომ ბელორუსის ურთიერთობა რუსეთის ფედერაციასთან გამწვავდება. „ამის დემონსტრირებისთვის ისიც საკმარისია, რომ ბელორუსის პარლამენტმა, ჩათვალე რომ თავად ალექსანდრ ლუკაშენკომ მსოფლიო სავალუტო ფონდის 700 მილიონი დოლარის ტრანშის სანაცვლოდ, აფხაზეთის და სამხრეთ ოსეთის აღიარებაზე გადაწყვეტილება შემოდგომისთვის გადადო“, – აცხადებს მუხინი.
რუსებს ჩინეთის სახალხო რესპუბლიკის განვითარებაზე ოპტიმისტური შეხედულებები აქვთ, – ალბათ იმიტომ, რომ თუ იქ ცუდი სიტუაცია იქნება, ჩინელები ციმბირის მცოცავი დაპყრობის ტემპებს გააორმაგებენ. ჩინეთს კვლავ შეუძლია, რომ მთლიანი შიდა პროდუქტის ზრდის ათპროცენტიან ზღვარზე გავიდეს. მაგრამ ეკონომიკურმა წარმატებამ და ადვილმა ფულმა ჩინური აქციების და უძრავი ქონების ბაზრები „გადაათბო“ და როდესაც ისინი აორთქლდებიან (საბანკო კრიზისის, სავაჭრო ომის და ზრდის ტემპის შენელების ფონზე), მთელ მსოფლიოს დეფლაციის ტალღა გადაუვლის.
გარდა ამისა, ჩინეთში ეკოლოგიურ კატასტროფას პროგნოზირებენ. „ახალ ჩინეთად“ იქცევა ბრაზილია, რომელიც ეკონომიკის ზრდის ტემპების მიხედვით დანარჩენ განვითარებად ქვეყნებს გაუსწრებს.
[გეგა ბერიძე, presa.ge]
