21:39 18.09.2011
16 სექტემბერს, დილის ათის ნახევრამდე თბილისის ცენტრში, ბარათაშვილის სახელობის ხიდის მიმდებარე ტერიტორიაზე, ბევრი მოქალაქე შეამჩნევდა წითლად გაწყობილ ლურჯ კარავს, რომელიც სამმა ირანელმა ”ტურისტმა” საქართველოს პრეზიდენტის რეზიდენციის პირდაპირ, მტკვრის მარჯვენა სანაპიროზე, ანჩისხატის ეკლესიისა და სასტუმრო ”ამბასადორის” სიახლოვეს გაშალეს.
სავარაუდოდ, მათ სწორედ ამ ადგილზე დაუღამდათ და გადაწყვიტეს არ ესარგებლათ საკმაოდ ძვირი თბილისური სასტუმროების მომსახურებით. ავტომობილი პირველივე ხელსაყრელ ალაგას გააჩერეს და დაბანაკდნენ.
სამწუხაროდ რიგითი მოქალაქის მიერ მოწოდებული ვიდეომასალის მიხედვით, უფრო ზუსტი დასკვნების გამოტანა გაგვიძნელდა.
ამას გარდა დარჩა რამდენიმე პასუხგაუცემელი კითხვა: რატომ არ შეამჩნია, ან თუ შეამჩნია, რატომ არ მოახდინა რეაგირება პოლიციამ ან სახელმწიფო დაცვამ? საყოველთაოდ არის ცნობილი რომ ანჩისხატის ეკლესიის წინ ხშირად უშლიან მოქალაქეებს პრეზიდენტის რეზიდენციის ფოტოგადაღებას.
აქ კი სამმა ირანელმა (ვიდეოზე კარგად ჩანს ავტომობილის ირანული ნომრები) ტურისტმა ღამე კარავში გაათენა - მოგეხსენებათ ტურისტი და ტერორისტი კარგად ირითმება.
ხუმრობა იქით იყოს და, მართლა სად არის იმის გარანტია, რომ მთელი ღამით პრეზიდენტის სასახლის წინ, სასროლ მანძილზე კარავში დაბანაკებულ სამ უცხოელს ავი განზრახვა არ ამოძრავებს?! ვფიქრობთ, არც ერთ ჩვენთაგანს, ხელისუფლების მხარდამჭერია იგი, თუ მისი მოწინააღმდეგე, არ უნდა ესიამოვნოს თუკი ეს სახელმწიფო დაცვის არაკომპეტენტურობის მაჩვენებელია (”თუკი”-ს იმიტომ ვამბობთ, რომ არ ვიცით - იქნებ თმის ძირამდე ”შესწავლილი” ჰყავდათ სამივე ტურისტი და არც არაფერი იყო საშიში).
მაგრამ ერთი ”უხერხული ინტერესი” კი ნამდვილად რჩება: როგორც იტყვიან, ”კაცნი ვართ” და ბუნებრივ მოთხოვნილებებს ვერსად წაუხვალ. ჰოდა, ძალიან გვეეჭვება, რომ სამივე ”კარვის კაცი” ისეთი ”გამძლე” ყოფილიყო, რომ არც ძილის წინ და არც დილას არაფერი მონდომებოდათ. იმედია, ამ წერილის შემდეგ ნარინჯისფერში გამოწყობილი კომპეტენტური ორგანოები დაათვალიერებენ ”შემთხვევის ადგილს” და ”ნივთმტკიცებებს” შეაგროვებენ.
