საქართველოს ფეხბურთის ფედერაციის პრეზიდენტის არჩევნებში ზვიად სიჭინავას კანდიდატურა დღეს ოფიციალურად შევიდა. ფეხბურთის ფედერაციის გენერალურ სამდივნოში სიჭინავა ვეტერანმა ფეხბურთელებმა წარადგინეს. ფედერაციის პრეზიდენტობის კანდიდატს უკვე მომზადებული აქვს პროგრამა, რომლის მიხედვითაც ფედერაციის მართვას და ქართული ფეხბურთის კრიზისიდან გამოყვანას აპირებს. პრეზიდენტად არჩევის შემთხვევაში, ის ყურადღებას გაამახვილებს საფეხბურთო ინფრასტრუქტურის განვითარებაზე, სტადიონების მოწესრიგებასა და მშენებლობაზე, ბავშვთა და სხვადასხვა შიდა ჩემპიონატის მოწყობაზე, ასევე ექიმების, მსაჯებისა და მწვრთნელების კვალიფიკაციის ამაღლებაზე. მთავარი პრიორიტეტი კი ეროვნული ნაკრები და მისი განვითარება იქნება.
