01:14 11.08.2011
რუსი ბლოგერები ქვეყნის პრემიერ-მინისტრის, ვლადიმირ პუტინის სახეს ვერ ცნობენ. პუტინის გარეგნულ ცვლილებებზე ონლაინ-დისკუსია პრემიერის სელიგერში ვიზიტისას გადაღებულ ფოტოზე გაიმართა.
დაკვირვებულმა ბლოგერებმა პუტინის "ახალი ფორმის თვალის ჭრილი" აღმოაჩინეს.
"ბოტოქსი - აი, რაშია საქმე. ცოტაც და ჯექსონივით ხელსახოცით მოუწევს სახის დაფარვა", - წერს ერთ-ერთი ბლოგერი.
"ვინ არის ეს მამაკაცი? - ეს კითხვა ჩემს თავს ფოტოს დანახვისთანავე დავუსვი, მაგრამ მისი იდენტიფიცირება შეუძლებელია. არ ვიცნობ ამ კაცს, დამიბრუნეთ პრემიერი ისეთი, როგორიც წინათ იყო, მისი კოსმეტოლოგი კი ჩამოახრჩვეთ", - ასეთია მორიგი ბლოგერის კომენტარი.
ენამახვილ ბლოგერებს არც ოპოზიციურად განწყობილი მწერალი, ედუარდ ლიმონოვი ჩამორჩა.
"პუტინი სელიგერში - უცნაური სახეა, საინტერესოა, რამ შეცვალა: შიშმა, მღელვარებამ, თუ ალკოჰოლის ბოროტად მოხმარებამ? "წყალში ჩაძირულს გავსო" - ასე იტყოდნენ მოხუცები. მას მართლაც პრობლემები აქვს, არაჯანსაღად და დაბნეულად გამოიყურება", - წერს ლიმონოვი.
